ހޯލްސޭލް އަދި ރީޓެއިލް ވިޔަފާރިތަކުން ގެންގުޅޭ ފެން ގުދަންތައް ޤަވާއިދުން ބަލާފާސްކުރަމުން ނުދާކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.

މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން އަމިއްލަ ފަރާތަކުން ހުށަހެޅި ސުވާލުތަކަކާ ގުޅިގެން އެމްއެފްޑީއޭއިން ދިން މައުލޫމާތުގައި ބުނެފައިވަނީ، ރީޓެއިލް އަދި ހޯލްސޭލް ލެވެލްގައި ބަންދުކުރި ފެން ހިފާގެން ގެންގުޅުމާއި އެއްތަނުން އަނެއްތަނަށް އުފުލާ ގުދަންކުރުމުގެ މަސައްކަތާއި ވިއްކުމަށް ބަހައްޓާ ފިހާރަތައް ޤަވާއިދުން ބަލާފާސްކުރަމުން ނުދާކަމަށެވެ. އެތަންތަން ބަލާފާސްކުރަން ދަނީ ޝަކުވާއެއް ހުށަހެޅުމުންނެވެ.

އެމްއެފްޑީއޭއިން ބުނީ، އެ އޮތޯރިޓީން ޤަވާއިދުން އިންސްޕެކްޓްކޮށް ހުއްދަ ދޫކުރަމުންދަނީ ފުޅީގައި ބަންދުކުރި ފެން އުފައްދާ ކާރުހާނާތައް އެކަނިކަމަށެވެ.

އެމްއެފްޑީއޭއިން ބުނީ މިދިޔަ އަހަރުން ފެށިގެން މިއަހަރުގެ ފެބުރުއަރީމަހުގެ ނިޔަލަށް އެގޮތަށް ހުށަހެޅުނު ޝަކުވާއަކާ ގުޅިގެން ފިހާރައެއް ބަލައި ފާސްކުރިއިރު މިންގަނޑަށް ނުފެތޭތީ އިސްލާހްކުރަން އަންގާފައިވާކަމަށެވެ. 

މި މުއްދަތުގެ ތެރޭގައި ފެން އުފައްދާ ފަރާތްތަކުގެ 14 ތަނެއް ބަލާފާސްކޮށް 9 ތަނަކަށް ވަނީ ހުއްދަ ދޫކޮށްފައެވެ. މީގެ ތެރެއިން މާލެ ސަރަހައްދަށް ފެން ފޯރުކޮށްދޭ ތަންތަނުގެ ގޮތުގައި 6 ތަނެއް ބަލާފާސްކޮށް 5 ތަނަކަށް ވަނީ ހުއްދަ ދޫކޮށްފައެވެ.

ކާބޯތަކެތީގެ ހިދުމަތްދޭ ތަންތަން ހިންގުމުގެ ޤަވައިދާ އެއްގޮތަށް ކާބޯތަކެއްޗާއި ފެން ފިނި އަދި ހިޔާލިބޭ ތަނެއްގައި ރައްކާކުރުމަށް އޮންނަ އުސޫލާ ހިލާފަށް ކިހާފަރާތަކުން އަމަލުކޮށްފައިވޭތޯ ކުރި ސުވާލުގެ ޖަވާބުގައި އެމްއެފްޑީއޭއިން ބުނެފައިވަނީ، ކާބޯތަކެތީގެ ރައްކާތެރިކަން ކަށަވަރުކުރުމަށް ލާޒިމްކޮށް އެޅޭނޭ ފިޔަވަޅުތައް ބަޔާންކޮށްފައި ވީނަމަވެސް، މި ޤާނޫނުގެ ދަށުން ތަންފީޒުކުރަންޖެހޭ ޤަވާއިދުތައް ފާސްކުރުމުގެ މަރުހަލާ ކުރިއަށްދާތީވެ، އެފަދަ ކަންތައްތަކަށް ފިޔަވަޅުއެޅުމަށް ގޮންޖެހުންތަކެއް ހުރިކަމަށެވެ. 

ނަމަވެސް ޤަވާއިދުތައް ފާސްވާ ހިސާބުން ފެށިގެން އެފަދަ ހުރިހާ މައްސަލަތަކަށް ފިޔަވަޅު އެޅިގެންދާނޭކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ވަނީ ބުނެފައެވެ.

މާލެ ސަރަހައްދުގައި ރައްކާތެރި ނޫންގޮތުގައި ކާބޯތަކެތި ވިއްކަމުންދިއުމަކީ ވަރަށް އާއްމު ކަމެއްގެ ގޮތުގައި ވަރަށް ގިނަ ފަރާތްތަކަކުން ފާހަގަކުރާ މައްސަލައެކެވެ. އެގޮތުން ރަތްދައްކާ އަވީގައި ހިޔާނުކޮށް ޕިކަޕްތަކަށް ލައިގެން ބިދޭސީން ފެން ސަޕްލައި ކުރުމާއި ފިހާރަތަކަށް ވިއްކަން ގެނެސްފައި ހުންނަ ފެންކޭސްތައް އަވީގައި ބަހައްޓާ މައްސަލަ ބޮޑުކަން ފާހަގަކުރެއެވެ.