ދައުލަތުގެ ބަޖެޓާ ގުޅޭ އެއްވެސް ވާހަކައެއްދައްކަން އިދިކޮޅު އެމްޑީޕީން ލަދުގަންނަން ޖެހޭނޭކަމަށް ހައްޖު ކޯޕަރޭޝަނުގެ މެނޭޖިންގ ޑިރެކްޓަރުގެ މަގާމްގައި ހުންނެވި މުހައްމަދު ޝަކީލް ވިދާޅުވެއްޖެއެވެ.

އެމްޑީޕީގެ ވަގުތީ ޗެއާޕާސަންކަމުގެ މަގާމުގައި ހުންނެވި ހަނިމާދޫ ދާއިރާގެ މެމްބަރު އަބްދުލްޢަފޫރު މޫސާ ވަނީ، އެމްޑީޕީގެ ޗެއާޕާސަން ހޮވާ އިންތިހާބާއި، ގައުމީ މަޖިލީހުގެ އިންތިހާބު ބާއްވަން ޕާޓީގައި ފައިސާނެތްކަމަށް ވިދާޅުވެފައެވެ. އެކަން އެހެންވީ ދައުލަތުގެ ބަޖެޓުން މިއަހަރަށް ދޭންބުނި ފައިސާ އަދިވެސް ލިބިފައިނުވާތީކަމަށް ގަޕޯ ވަނީ ވިދާޅުވެފައެވެ.

މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝަކީލް ވަނީ، އެބާވަތުގެ ވާހަކަތަކަކީ ބަޖެޓަށް ވޯޓު ނުދޭ މީހުން ދައްކަން ޖެހޭ ވާހަކަތަކެއް ނޫންކަން ފާހަގަކުރައްވައި ގަޕޯގެ އެވާހަކަތަކަށް ރައްދު ދެއްވާފައެވެ. އެގޮތުން ޝަކީލް ވަނީ ގަޕޯ އެ ވިދާޅުވީ ދައުލަތުގެ ބަޖެޓުން އެމްޑީޕީއަށް ލިބެންޖެހޭ ކޮން ފައިސާއެއްގެ ވާހަކައެއްތޯ ސުވާލުކުރައްވާފައެވެ.

ދައުލަތުގެ ބަޖެޓު ފާސްކުރަން ގަޕޯ އަދި އެމްޑީޕީގެ އެއްވެސް މަޖިލިސް މެންބަރަކު ވޭތުވެދިޔަ ތިން އަހަރު ވޯޓެއް ދިނިންތޯ ސުވާލުކުރައްވަމުން ޝަކީލް ވަނީ ބަޖެޓްގެ ވާހަކަދައްކަން އިދިކޮޅު އެމްޑީޕީއަށް ނިސްބަތްވާ މަޖިލީހުގެ މެމްބަރުން ލަދުގަންނަން ޖެހޭނޭކަމަށް ވިދާޅުވެފައެވެ.

އެމްޑީޕީގެ ތެރެއިން ކުރީގެ ރައީސް ނަޝީދުގެ ފިކުރުގެ ބޭފުޅުން ވަނީ، ޕާޓީގެ އެތެރޭގެ އިންތިހާބު ބޭއްވުން އަވަސްކުރުމަށް ގޮވާލާފައެވެ. އެގޮތުން އެ ފެކްޝަނުން ވަނީ އިންތިހާބު އެމްޑީޕީއަށް ބޭނުންވާ ފަންޑް ހޯދުމުގެ މަސައްކަތް ފަށާފައެވެ.

ނަޝީދުގެ ފެކްޝަނުން ބުނެފައިވަނީ އިންތިހާބު ފަސްކުރަން ހުށެހެޅީ، ނަޝީދު އެމްޑީޕީގެ ޗެއަރޕާސަން ކަމަށް ހޮވިވަޑައިގަންނަވާނެ ކަމުގެ ޔަގީންކަން މީކާއިލް ނަސީމް އާއި ރައީސް ސާލިހް އަށް އޮތުމުންނެވެ. އަދި އެ ބޭފުޅުން ފާހަގަކުރާ ގޮތުގައި، މި ނިންމެވުމަކީ ވަކި ބަޔަކަށް ފައިދާކުރާނެ ނިންމުމެކެވެ. އެގޮތުން، އިންތިހާބު ލަސްނުކޮށް ބޭއްވުމަށްޓަކައި އެ ބޭފުޅުން ވަނީ އިންތިހާބަށް ބޭނުންވާނެ ފައިސާ ހޯދުމަށްޓަކައި ރުފިޔާ އެއްކުރުމުގެ މަސައްކަތް ފަށާފައެ