އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކާ ފަރާތްތައް ދަފްތަރުކުރުމަށް ބޭނުންކުރާ "ދިރިތި" ޕޯޓަލްގެ ޚިދުމަތްތައް "ވަން ގަވް" ޕޯޓަލްއަށް ބަދަލުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ނިންމައިފިއެވެ.

އެމް.އެފް.ޑީ.އޭ އިން މިއަދު ނެރުނު އިޢުލާނެއްގައި ބުނެފައިވަނީ، ސަރުކާރުގެ ޚިދުމަތްތައް އެއް ފުރާޅެއްގެ ދަށުން ފޯރުކޮށްދިނުމަށް ކުރަމުންދާ މަސައްކަތުގެ ދަށުން، "ދިރިތި" ޕޯޓަލް މެދުވެރިކޮށް މިހާރު ދެމުންދާ ދަފްތަރުކުރުމުގެ ޚިދުމަތް ޖޫން 7 އިން ފެށިގެން "ވަން ގަވް" ޕޯޓަލްއަށް ބަދަލުވާނެ ކަމަށެވެ.

މި ބަދަލާ ގުޅިގެން، މާދަމާ މެންދުރުފަހު 14:00 އިން ފެށިގެން "ދިރިތި" ޕޯޓަލްއިން ދެމުންދާ ޚިދުމަތްތައް މެދުކަނޑާލާނެ ކަމަށާ، 7 ޖޫން އިން ފެށިގެން މި ޚިދުމަތަށް އެދި ހުށަހަޅަންޖެހޭނީ "ވަން ގަވް" ޕޯޓަލް މެދުވެރިކޮށް ކަމަށް ބުނެފައިވެއެވެ.

އެމް.އެފް.ޑީ.އޭ އިން އިތުރަށް ބުނެފައިވަނީ، ޚިދުމަތް މެދުކަނޑާލާ މުއްދަތުގެ ތެރޭގައި "ދިރިތި" ޕޯޓަލްގައި މިހާރު ދަފްތަރުކޮށްފައިވާ ފަރާތްތަކުގެ މަޢުލޫމާތު "ވަން ގަވް" ޕޯޓަލްއަށް ބަދަލުކުރުމުގެ މަސައްކަތް ކުރިއަށްދާނެ ކަމަށެވެ.

މިކަމާ ގުޅޭގޮތުން އިތުރު މަޢުލޫމާތު ސާފުކުރެއްވުމަށް އެ އޮތޯރިޓީގެ ހޮޓްލައިން ނަންބަރު 7603204 ނުވަތަ 3034221 އަށް ގުޅުއްވުމަށް އެމް.އެފް.ޑީ.އޭ އިން ވަނީ އެދިފައެވެ.