މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން އަލަށް އެކުލަވާލި "ކާބޯތަކެތި ބަންދުކުރުމާއި، ލޭބަލްކުރުމުގެ ގަވާއިދު" އަށް ފުރިހަމައަށް ޢަމަލުކުރުމަށްޓަކައި، ކާބޯތަކެތި އުފައްދާ އަދި އިމްޕޯޓްކުރާ ފަރާތްތަކަށް 6 މަސްދުވަހުގެ މުއްދަތެއް ދީފިއެވެ.
ކާބޯތަކެތި ބަންދުކުރުމާއި، ލޭބަލްކުރުމުގެ ގަވާއިދު 09 ޖޫންގައި ދިވެހި ސަރުކާރުގެ ގެޒެޓުގައި ޝާއިޢުކޮށް މިހާރު ވަނީ ޢަމަލުކުރަން ފަށާފައިވާ ކަމަށެވެ.
އެ އޮތޯރިޓީން މިއަދު ނެރުނު އިޢުލާނެއްގައި ބުނެފައިވަނީ، ކާބޯތަކެތި ބަންދުކުރުމާއި، ލޭބަލްކުރުމުގެ ގަވާއިދުގައިވާ ގޮތުން، ގެޒެޓުގައި ޝާއިޢުކުރާ ދުވަހުން ފެށިގެން މި ގަވާއިދަށް ޢަމަލުކުރަން ޖެހެއެވެ.
ނަމަވެސް، މިހާރު ބާޒާރުގައި ހުރި ތަކެއްޗާއި، އަލަށް އުފައްދާ އަދި ރާއްޖެއަށް އެތެރެކުރާ ތަކެތި މި ގަވާއިދުގެ މިންގަނޑުތަކަށް ފެއްތުމަށްޓަކައި ވާންޖެހޭ ތައްޔާރީތައްވުމަށް، 6 މަސްދުވަހުގެ އިތުރު މުއްދަތެއް ދީފައިވާ ކަމަށެވެ.
އެމް.އެފް.ޑީ.އޭ އިން ވަނީ ކާބޯތަކެތި އުފައްދާ ފަރާތްތަކާއި، އިމްޕޯޓްކުރާ ފަރާތްތަކުގެ އިތުރުން އެކްސްޕޯޓްކުރާ ފަރާތްތަކުން ވެސް މި މުއްދަތުގެ ތެރޭގައި ގަވާއިދާ އެއްގޮތަށް ލޭބަލްކުރުމުގެ ކަންކަން ނިންމުމަށް އިލްތިމާސްކޮށްފައެވެ.
މި ގަވާއިދާ ގުޅޭގޮތުން އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން އެ އޮތޯރިޓީގެ ފުޑް ކޮންޓްރޯލް ޑިވިޝަންގެ ނަންބަރު 3034217 އަށް ގުޅުމަށް ނުވަތަ [email protected] އަށް މެއިލް ކުރުމަށް އެމް.އެފް.ޑީ.އޭ އިން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
