ކެންސަރުބައްޔަށް ފަރުވާދިނުމަށް ބޭނުންކުރާ "ޑާޒަލެކްސް" ގެ ފޭކް އިންޖެކްޝަންތަކެއް ބައިނަލްއަޤްވާމީ މާކެޓްގައި ދައުރުވަމުންދާތީވެ އެކަން ރާއްޖެއިން ދުނިޔޭގެ ސިއްހަތު ޖަމިއްޔާގެ ސަމާލުކަމަށް ގެނެސްފިއެވެ.

ވޮއިސްއަށް މައުލޫމާތު ލިބިފައިވާ ގޮތުގައި "ޑާޒަލެކްސް" ގެ ފޭކް އުފެއްދުންތަކެއް ރާއްޖޭގައި ދައުރުވަމުންދާކަމަށް އެނގިފައިވަނީ ފުޑް އެންޑް ޑްރަގް އޮތޯރިޓީން ކުރި ރެންޑަމް އިންސްޕެކްޝަނަކުންނެވެ. ފޭކް އިންޖެކްޝަންތައް ދައުރުވަމުންދާކަން ފާަހަގަވުމާ ގުޅިގެން ރާއްޖެއިން ޑަބްލިއުއެޗްއޯގެ ސަމާލުކަމަށް ގެނެސްފައިވާއިރު، ހަމަ މިބާވަތުގެ އިންޖެކްޝަން ވަނީ މެކްސިކޯއިންވެސް ފެނިފައެވެ.

ދުނިޔޭގެ ސިއްހަތު ޖަމިއްޔާއިން މިހާރު ވަނީ އެކަމަށް ސަމާލުވުމަށް އެދި ނޯޓިސް ނެރެފައެވެ. މިކަމާ ގުޅިގެން ޑަބްލިއުއެޗްއޯއިން ނެރުނު ބަޔާނެއްގައި ބުނެފައިވަނީ، ދިވެހިރާއްޖެއާއި މެކްސިކޯއިން ފެނިފައިވާ "ޑާޒަލެކްސް" (DARZALEX - daratumumab) އިންޖެކްޝަންގެ ދެ ބެޗެއްގެ ބޭހަކީ ނަކަލު ބޭސްތަކެއް ކަމަށް ފާހަގަކުރެވިފައިވާކަމަށެވެ. 

ސިއްހީ ހިދުމަތްތެރިންނާއި، ބޭސްފަރުވާއާ ގުޅޭ ކަންކަން ރެގިއުލޭޓްކުރާ އިދާރާތަކުގެ އިތުރުން އާންމު ރައްޔިތުންނަށް ނެރުނު މި އިންޒާރުގައި ޑަބްލިއުއެޗްއޯއިން އިތުރަށް ބުނެފައިވަނީ، މި މައްސަލަ ރާއްޖެ އާއި މެކްސިކޯއިން ރިޕޯޓްކޮށްފައިވަނީ، މިއަހަރުގެ މެއި އަދި ޖޫންމަހުގައިކަމަށެވެ. 

ދުނިޔޭގެ ސިއްހަތު ޖަމިއްޔާއިން ބުނެފައިވަނީ މި ފޭކް އުފެއްދުންތައް ބާޒާރަށް ނެރެފައިވަނީ، ރަސްމީ ހުއްދަ ނެތް ފަރާތްތަކުންކަމަށެވެ. އެގޮތުން އެ އުފެއްދުންތައް ބައެއް ހޮސްޕިޓަލްތަކަށް ވެސް ލިބިފައިވާކަން ފާހަގަކުރެވިފައިވާކަމަށް ވަނީ ބުނެފައެވެ. ނަމަވެސް އެއީ ރާއްޖެ ނުވަތަ މެކްސިކޯއިން ކަމެއް ފާހަގަކޮށްފައެއް ނުވެއެވެ.

ޑާޒަލެކްސް އަކީ ލޭގެ މަދު ބަލިތަކާއި، ކަށީގެ މަދަށް ޖެހޭ ކެންސަރުގެ ބާވަތްތައް ކަމަށްވާ "މަލްޓިޕަލް މައިލޯމާ" އަދި "އެމިލޮއިޑް ލައިޓް-ޗެއިން (AL) އެމިލޮއިޑޯސިސް" އަށް ފަރުވާ ދިނުމަށް ބޭނުންކުރާ މޮނޯކްލޯނަލް އެންޓިބޮޑީއެއްކަމަށް ދުނިޔޭގެ ސިއްހަތު ޖަމިއްޔާއިން ބުނެއެވެ. މި ފޭކް އުފެއްދުންތަކަކީ އޭގެ އަސްލު އޮޅުވާލައިގެން، އަދި އުފެއްދި ފަރާތާ ބެހޭ ދޮގު މައުލޫމާތު ހިމަނައިގެން ގަސްތުގައި ތައްޔާރުކޮށްފައިވާ އުފެއްދުމެއްކަމަށްވެސް ވަނީ ބުނެފައެވެ. 

ޑަބްލިއުއެޗްއޯއިން ވަނީ އެ އުފެއްދުންތައް ބޭނުންނުކުރުމަށް އިންޒާރުދީފައެވެ. ފޭކް ބޭސްތަކުގައި ހިމެނޭ ބެޗް ނަމްބަރަކީ MYS7381 އަދި STV1K01 އެވެ. އެހެންކަމުން، މި ބެޗް ނަންބަރުތައް ހުރި އެއްވެސް ޑާޒަލެކްސް އުފެއްދުމެއް ނަކަލު ބޭހެއްގެ ގޮތުގައި ބަލައި، ބޭނުން ނުކުރުމަށް ވަނީ އިންޒާރުދީފައެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން ކެންސަރުބައްޔަށް ފަރުވާދިނުމަށް ބޭނުންކުރާ "ޑާޒަލެކްސް" ގެ ފޭކް އިންޖެކްޝަންތަކެއް ޑަބްލިއުއެޗްއޯގެ ސަމާލުކަމަށް ގެނެސްފައިވާއިރު، މިކަމަކީ ރާއްޖޭގެ ސިއްހީދާއިރާގެ ރެގިއުލޭޓްކުރާ ފަރާތްތަކުގެ އިތުބާރު ބައިނަލްއަޤްވާމީ މުޖުތަމައުގައި ބޮޑުވެގެންދާނޭކަމެކެވެ. އެގޮތުން މިކަމުގެ ސަބަބުން ރާއްޖޭގެ ލެބޯޓްރީތަކާއި ތަހްލީލްކުރުމުގައި ގެންގުޅޭ މިންގަނޑުތަކާމެދު ބޮޑު ޔަގީންކަމެއް ލިބިގެންދާނޭކަމަށް ބައެއް ފަރާތްތަކުން ފާހަގަކުރެއެވެ.