ޕެންޝަން ފަންޑު މެދުވެރިކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ސަރުކާރުގެ ޓްރެޝަރީ ބިލް (ޓީ-ބިލް) ގައި އިންވެސްޓްކުރުމަކީ ސީދާ ފައިސާ ޗާޕުކުރުން ކަމަށް ވިދާޅުވެ އެ ނިންމުމުގެ ސަބަބުން ޤައުމުގެ މާލީ ނިޒާމަށް ބޮޑެތި ގެއްލުންތަކެއް ލިބޭނެ ކަމަށް އެމްޑީޕީގެ ރައީސް ޢަބްދުالله ޝާހިދު ވިދާޅުވެއްޖެއެވެ.
ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ މި ފިޔަވަޅުގެ ނަތީޖާއެއްގެ ގޮތުން އިންފްލޭޝަން މައްޗަށް ގޮސް ދިވެހި ރުފިޔާގެ އަގު އިތުރަށް ދަށަށް ދާނެ ކަމަށެވެ. އެއާ އެކު ޑޮލަރު ހޯދުމުގެ ދަތިކަން ބޮޑުވެ ޑޮލަރުގެ އަގު "އިންތިހާ" އަށް އުފުލިގެންދާނެ ކަމަށް އޭނާ ފާހަގަކުރެއްވިއެވެ.
ޝާހިދު ވިދާޅުވި ގޮތުގައި ޕެންޝަން އޮފީހުގެ ބޯޑު މެންބަރުންނާއި އެ އޮފީހުގެ އިސް މުވައްޒަފުން އިސްތިއުފާ ދެމުން ގެންދާ ދަނޑިވަޅެއްގައި ވެސް އެ ކަމަށް ބެލުމެއް ނެތި 2.4 ބިލިއަން ރުފިޔާ ޗާޕުކުރުމަށް ނިންމާފައިވެއެވެ.
މި ޢަމަލަކީ ރައްޔިތުންގެ މުސްތަޤުބަލާއި މުޅި ޤައުމުގެ މާލީ ނިޒާމު ހަލާކުކޮށްލުން ކަމުގައި ޝާހިދު ސިފަކުރެއްވިއެވެ.
”ރައީސް މުއިއްޒު ފައިސާ ޗާޕު ނުކުރައްވާނެކަމަށް ވިދާޅުވެފައިމެ އެ ވައުދާއި ޚިލާފުވެ، މާލީ ނިޒާމަށް މިވަރު ބޮޑު ގެއްލުމެއް ލިބިދާނެގޮތަކަށް ކަންކުރެއްވުމަކީ ވަރަށް ދެރަވަރުކަމެއް“ ޝާހިދު ވިދާޅުވިއެވެ.
ރާއްޖޭގައި ސަރުކާރުން ވިއްކާ ޓީ-ބިލްތަކަކީ ދިވެހި ރުފިޔާ އިން ޑިސްކައުންޓް އަގެއްގައި ވިއްކާ ސެކިއުރިޓީޒްތަކެކެވެ. މި ބިލްތަކުގެ މުއްދަތު ހަމަވުމުން ސަރުކާރުން އަނބުރާ ދައްކާނީ ބިލުގެ މޫނުމަތީ އަގު (ފޭސް ވެލިއު) ގަ އެވެ.
އާންމުކޮށް ސަރުކާރުގެ ޓީ-ބިލްތައް ގަންނަނީ މޯލްޑިވްސް ރިޓަޔާމަންޓް ޕެންޝަން އެޑްމިނިސްޓްރޭޝަން (ޕެންޝަން ފަންޑު) އާއި، ވިޔަފާރި ބޭންކުތަކުގެ އިތުރުން ސަރުކާރު ހިއްސާވާ ކުންފުނިތަކުންނެވެ. އަދި އަމިއްލަ ބައެއް ބޮޑެތި ކުންފުނިތަކުންވެސް އިންވެސްޓްމަންޓެއްގެ ގޮތުގައި ޓީ-ބިލް ގަނެ އެވެ. މިއީ ދައުލަތުގެ ކޭޝްފްލޯ މެނޭޖްކުރުމަށް ދުނިޔޭގެ ގިނަ ގައުމުތަކުގައިވެސް ބޭނުންކުރާ އާންމު އުސޫލެކެވެ.
Advertisement
This content is created and paid for by advertisers and does not involve Voice Journalists
