އެމްޑީޕީ ރިޔާސީ ޕްރައިމަރީގައި ވާދަކުރައްވާނެކަން އިޢުލާނު ކުރައްވާފައިވާ، އެ ޕާޓީގެ ރައީސް ޢަބްދުﷲ ޝާހިދަށް، ރާއްޖޭގެ އެންމެ ބޮޑު ދެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ދެ ރައީސާއިންގެ ތާއީދު އޮތްކަން ހާމަކުރައްވައިފިއެވެ.
މާލެ ސިޓީގެ ޑަބްލިއުޑީސީގެ ރައީސާ ޢާއިޝަތު ރީޝާ އަދި އައްޑޫ ސިޓީގެ ޑަބްލިއުޑީސީގެ ރައީސާ ފާތިމަތު ހިޖުރާ ވަނީ، ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ޝާހިދަށް ފުރިހަމައަށް ތާއީދުކުރައްވާނެ ކަމަށް ވިދާޅުވެފައެވެ. ދެ ސިޓީގެ ޑަބްލިއުޑީސީގެ އިސް ވެރިންގެ އިތުރުން، އައްޑޫ ސިޓީ އަދި މާލެ ސިޓީގެ ބައެއް ކައުންސިލަރުން ވެސް ވަނީ ޝާހިދަށް ތާއީދުކުރައްވާކަން ފާޅުކުރައްވާފައެވެ.
އައްޑޫ ސިޓީގެ ޑަބްލިއުޑީސީގެ ރައީސާގެ އިތުރުން ބައެއް ކައުންސިލަރުންގެ ތާއީދު ޝާހިދަށް ލިބިވަޑައިގެންނެވިކަން ހާމަކޮށްފައިވާއިރު ޝާހިދު ވަނީ މިދިޔަ ހުކުރުދުވަހު އައްޑޫސިޓީއަށް ދަތުރުފުޅެއް ކުރައްވާފައެވެ. އެ ދަތުރުފުޅުގައި ޝާހިދު ވަނީ އެ ސިޓީގެ އެމްޑީޕީގެ އިސް ފަރާތްތަކާއި، ކައުންސިލަރުން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވައި ޕާޓީގެ ކުރިމަގާ ގުޅޭގޮތުން މަޝްވަރާ ކުރައްވާފައެވެ.
2028 ވަނަ އަހަރު ބާއްވާ ރިޔާސީ އިންތިޚާބަށް އެމްޑީޕީ ޓިކެޓު ހޯއްދެވުމަށް ޕްރައިމަރީގައި ވާދަކުރައްވާނެކަން ޝާހިދު އިޢުލާނު ކުރެއްވުމާ ގުޅިގެން، ޕާޓީގެ ގިނަ އަދަދެއްގެ މެންބަރުންނާއި ދާއިރާތަކުގެ އިސް ބޭފުޅުން ދަނީ އެމަނިކުފާނަށް ތާއީދު އިތުރުވަމުން އަންނަކަން ހާމަކުރަމުންނެވެ.
Advertisement
This content is created and paid for by advertisers and does not involve Voice Journalists
