ރާއްޖޭގެ އިޤްތިޞާދު މިއަދު އޮތީ ފޫގޮސްފައިކަމަށާއި، ރައްޔިތުންގެ ޞިއްޙީ ނިޒާމު އޮތީ ފުލުންގޮސްފައިކަމަށް އެމްޑީޕީގެ ކުރީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.
އެމްޑީޕީގެ 5 ވަނަ ކޮންގްރެސް ނިންމުމުގެ ރަސްމިއްޔާތުގައި ވާހަކަ ދައްކަވަމުން ޝާހިދު ވިދާޅުވީ، މިއަދުގެ ސަރުކާރުގައި ބޯހިޔާވަހިކަން އޮތީ ބޮއްސުންލާފައިކަމަށާއި ވަޒީފާގެ ފުރުޞަތުތައް މިއޮތީ ބަންދުވެފައިކަމަށެވެ. އަދި ދިވެހިރާއްޖޭގެ ފަތުރުވެރިކަމުގެ ޞިނާޢަތު އޮތީ ހާސްކަމެއްގައިކަމަށާއި، ޓެކްސްތަކުގެ ދަންތުރަޔާއި ޑޮލަރު މާރުކުރުމުގެ ނަމުގައި ރާއްޖޭގެ އެންމެ އަގުބޮޑެތި އިންވެސްޓްމަންޓްތަކަށްވެސް މިއަދު އޮތީ ވާނުވާ ޖަހާފައިކަމަށް ޝާހިދު ސިފަކުރެއްވިއެވެ.
ހަމައެއާއެކު ކުދި އަދި މެދުފަންތީގެ ވިޔަފާރިތައް އޮތީ އިނދަޖައްސާ، ކުޑަކަކުލަށް ތިރިކޮށްފިކަމަށްވެސް އޭނާ ވިދާޅުވިއެވެ.ޝާހިދު ވިދާޅުވީ މި ޙާލަތު ބަދަލުކުރެވޭނީ އާންމު ރައްޔިތުންގެ ދިރިއުޅުމުގެ ފުދުންތެރިކަމާއި ގުޅޭނެ ސިޔާސަތު، ރައްޔިތުންގެ ވިންދު ބަލާ، ރައްޔިތުންގެ އަޑުއަހާ، ރައްޔިތު މީހާގެ ސީދާ ޙާލަތު އަބަދުވެސް ވަޒަންކުރާ ޕާޓީއަކަށް ކަމަށާއި، އެޕާޓީއަކީ އެމްޑީޕީ ކަމަށެވެ.
އަދި ދަތުރުފަތުރާއި އިޖްތިމާޢީ ރައްކާތެރިކަމާއި، އެމްޑީޕީއިން މި ރާއްޖޭގެ ރައްޔިތުންގެ ދިރިއުޅުމަށް ގެނައި އުންމީދުގެ ހުޅުކޮޅު ސަރުކާރުން ނިއްވާލާފައި ވާކަމަށް ޝާހިދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
