ހަނގުުރާމައާ ގުޅިގެން 626 ފްލައިޓް ކެންސަލްވި: މިނިސްޓަރު އަމީން

ގަލްފް ޤައުމުތަކުގެ މެދުގައި މިހާރު ހިނގަމުންދާ ހަމަލާބަދަލުކުރުންތަކާ ގުޅިގެން މިދިޔަ 45 ދުވަސްތެރޭ 600 ވުރެ ގިނަ ފްލައިޓް ކެންސަލް ވެފައިވާ ކަމަށް ޓްރާސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު މެދުއިރުމައްޗާއި ގަލްފުގެ ހަމަނުޖެހުންތަކާ ގުޅިގެން ރާއްޖެއަށް ކުރިމަތިވާ ގޮންޖެހުންތަކުން އަރައިގަތުމަށް ކުރައްވާ މަސައްކަތްތަކުގެ އަދާހަމަ މަޢުލޫމާތު ދެއްވުމަށް މިއަދު ހަވީރު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގަ އެވެ.

މިނިސްޓަރު ވިދާާޅުވީ ހަނގުރާމައާ ގުޅިގެން, ޝެޑިއުލް ކުރެވިފައިވާ 626 ފްލައިޓް މިއަދާ ހަމައަށް ކެންސަލްވެފައިވާ ކަމަށެވެ. ނަމަވެސް ކަމާގުޅޭ އިދާރާތަކުން ކުރި މަސައްކަތުން ބައެއް އެއާލައިންތަކުގެ ދަތުރުތައް މިހާރު ފެށިފައިވާކަން މިނިސްޓަރު ފާހަގަ ކުރެއްވި އެވެ.

އެގޮތުން ގަތަރު އެއަރވޭސް އާއި އެމެރޭޓްސް އެއާލައިންގެ ދަތުރުތައް އަލުން ވަނީ ފަށާފަ އެވެ. ނަމަވެސް އެ ދެ އެއާލައިންގެ ދަތުރުތައް ކުރިއެކޭ އެއްގޮތަށް ކުރިއަށް ނުދާކަން މިނިސްޓަރު ފާހަގަ ކުރެއްވި އެވެ. ކުރީން ކޮންމެ އެއާލައިނަކުން ދުވާލަކު ހަތަރު/ފަސް ފްލައިޓް އައި ނަމަވެސް މިހާރު އަންނަނީ ދުވާލަކު ދެ ފްލައިޓެވެ.

މިނިސްޓަރު ވިދާޅުވީ ހަނގުރާމަ ފެށި ދުވަސްކޮޅަށް ވުރެ މިހާރު އެރައިވަލްސް 25 ޕަސެންޓް އިތުރުވެފައިވާ ކަމަށެވެ.