ސާފިންބޯޑު އުފުލުމަށް މޯލްޑިވިއަންއިން ނަގާ އަގު ކުޑަކޮށްދޭނަށް: ރައީސް

ސާފިން ކުރުމަށް ބޭނުންކުރާ ބޯޑު އުފުލުމަށް މޯލްޑިވިއަންގެ މަތިންދާބޯޓުތަކުން ނަގާ އަގު ކުޑަކޮށްދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ އާއްމު ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައީސްގެ ޖަވާބު" ސިލްސިލާ ޕްރޮގްރާމުގެ ދަށުން ގދ. ގައްދޫ، ފެހިވިނަ، އަޙްމަދު ރަޝީދު މިއަދު ކުރެއްވި ސުވާލަށް ޖަވާބު ދެއްވަމުންނެވެ.

އެގޮތުން އަޙްމަދު ރަޝީދުގެ ސުވާލުގައި ބުނީ މޯލްޑިވިއަނުން މިނަގާ ސާފް ބޯޑުގެ ސާވިސް ޗާޖުގެ އަގު މިއޮތީ ވަރަށް ބޮޑަށް މައްޗަށް ގޮސްފައި ކަމަށާއި ގާތްގަނޑަކަށް ބުނާނަމަ އަޕް އެންޑް ޑައުން ޓިކެޓް އަދި ސާވިސް ޗާޖާއެކީ 800 ޑޮލަރު މިހާރު މީހަކަށް ހޭދަކުރަންޖެހޭ ކަމަށެވެ.

އޭނާގެ ސުވާލުގެ ޖަވާބުގައި ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވީ މި މައްސަލައަކީ ސާފިންގައި އުޅޭ ފަރާތްތަކަށް މިހާރު ވަރަށް ބޮޑުވެފައި އޮތް ކަމެއް ކަމަށް ޤަބޫލުކުރައްވާކަމަށާއި،  އަދި އެ ސަރަހައްދަކީ ހާއްސަކޮށް ގައްދޫއަކީ ސާފިންގެ ދާއިރާގައި ކުރިއަރަމުން އަންނަ ރަށެއްކަމަށް ފާހަގަކުރެވޭ ކަމަށެވެ.

"އިރާދަކުރެއްވިއްޔާ ތި ވިދާޅުވި ކަންތަކުގައި އަޅުގަނޑު މަސައްކަތް ކޮށްދޭނަން. ތި ވިދާޅުވާ އަގު މޯލްޑިވިއަނުން ސާފް ބޯޑު ގެނައުމަށް ނަގާ ޗާޖު ވަރަށް ބޮޑު އެހެންނޫންތޯ. އެހެންވީމާ އަޅުގަނޑު އެކަމާ ވާހަކަ ދައްކައިގެން އިރާދަކުރެއްވިއްޔާ އެކަމަށް ރަނގަޅު ހައްލެއް ގެނެސްދޭނަން. އަގު ކުޑަކޮށްދޭނަން ވީހާވެސް ބޮޑަކަށް."

ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.

ރައީސުލް ޖުމުހޫރިއްޔާ ޑރ. މުހައްމަދު މުއިއްޒު ކޮންމެ ދުވަހަކު ކަހަލަ ގޮތަކަށް ގެންދަވަނީ މި ޕްރޮގްރާމް މެދުވެރިކުރައްވާ ކޮންމެވެސް ބޭފުޅެއް ސުވާލަށް ޖަވާބުދެއްވަމުންނެވެ.