މަންފާއާ އެޗްޑީސީ ގުޅިގެން ހައިވޭގައި ދަތުރުދުޢާ ބޯޑެއް ބަހައްޓަައިފި

ދިވެހީންގެ ދީނީ ހޭލުންތެރިކަމަށް ވަަރަށް ފުޅާ ދާއިރާއެއްގައި މަސައްކަތް ކުރާ މަންފާ ޖަމިއްޔާ އާއި ހަައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގުޅިގެން ދަތުރުދުޢާ ލިޔެފައިވާ ބޯޑެެއް ބަހައްޓައިފި އެވެ.

މި ބޯޑް ބަހައްޓާފައި ވަނީ ހައިވޭއަށް އަރާ ހިސާބުގަ އެވެ.

މަަންފާގެ ޖެނެރަލް ސެކެޓްރީ އަލީ މުޢީން ވިދާޅުވީ ހުޅުމާލޭގެ އެކި ސަރަހައްދުތަކުގައި އިތުރު ބޯޑްތައް ބެހެއްޓުމަށް ރާވާފައިވާ ކަަމަށެވެ. އެ މަަސައްކަތް ކުރިއަށް އޮތް ދުވަސްތަކުގައި ކުރިއަށް ގެންދަން ރާވާފައިވާ ކަމަށް ވިދާޅުވި އެވެ.

މީގެ އިތުރުން އެ ޖަމިއްޔާގެ އަމާޒަކީ ރާއްޖޭގެ ގިނަ ސަރަހައްދުތަކެއްގައި މިފަދަ ބޯޑްތައް ބެހެއްޓުން ކަމަށް ވެސް އަލީ މުޢީން ވިދާޅުވި އެވެ.

މަންފާ އަކީ ވަރަށް ފުޅާ ދާއިރާއެއްގައި ދިވެހީންގެ ދީނީ ހޭލުންތެރިކަމަށް މަސައްކަތްކުރާ ޖަމިއްޔާ އެކެވެ. އެ ޖަމިއްޔާ އިން ގެންދަނީ މުޅި ރާއްްޖޭގައި ތަފާތު އެކި ދީނީ ހަރަކާތްތައް ހިންގަމުންނެވެ. އެ ގޮތުން ރައްޔިތުންގެ ދީނީ ހޭލުންތެރި ކަމަށް ހާއްސަކޮށް ދަރުސްތަކާއި ފޯރަމްތައް ބޭއްވުން ހިމެނެ އެވެ.

ތަފާތު އެކި މެސެޖުތައް ހިމެނޭ ގޮތަށް ޒަމާނީ ވައްޓަފާޅިއަށް ވީޑިއޯތައް ތައްޔާާރުކޮށްގެން ގެނެސް ދިނުމާއި ތަފާތު އެކި ވޯކްޝޮޕްތައް ދަނީ ހިންގަމުންނެވެ. އެގޮތުން އެ ޖަމިއްޔާ އިން ކުރިއަށް ގެންދާ ނަމާދު ވޯކްޝޮޕާއި އަޤީދާ ވޯކްޝޮޕަކީ ފާހަގަކޮށްލެވޭ ދެ ޕްރަގްރާމެވެ.

ވަރަށް ގިނަ ރަށްރަށުން އެ ހަަރަކާތްތައް ބާއްވައިދޭން މަންފާގައި އެދެ އެވެ. އެ ޖަމިއްޔާ އިން ދަނީ ކޮންމެ ހަފްތާ ބަންދަކު އަތޮޅުތެރެއަށް ދަތުރުކޮށް މިފަދަ އެކި ޕްރަގްރާމްތައް ހިންގަމުންނެވެ.

އަލީ މުޢީން ވިދާޅުވި ގޮތުގައި 2026 ވަނަ އަހަރު ވެސް އެ ޖަމިއްޔާއިން އެ ހަރަކާތްތަކާއި އިތުރު ބައެއް ހަރަކާތްތައް މާލެއާ މުޅި ރާއްޖޭގައި ހިންގަން ވަނީ ނިންމާފަ އެވެ. އަދި ދައުވަތު ލިބިފައިވާ ވީހާވެސް ގިނަ ރަށްރަށަށް މަންފާގެ ޓީމުތަކުން ޒިޔާރަތްްކޮށް ދީނީ އެކި ޕްރަގްރާމްތައް ހިންގާނެ ކަަމަށް ވިދާޅުވި އެވެ.