ޤާސިމް އިބްރާޙީމް ރައީސް އޮފީހަށް ވަޑައިގެންފި

ޖުމްހޫރީ ޕާޓީގެ ލީޑަރު ގާސިމް އިބްރާހިމް ކުއްލި ގޮތަކަށް ރައީސް އޮފީހަށް ވަޑައިގަންނަވައިފިއެވެ.

މިއަދު ސޯޝަލް މީޑިއާގައި އާއްމު ވެފައިވާ ވީޑިއޯއަކުން ފެންނަނީ ގާސިމް ރައީސް އޮފީހަށް ހިންގަވާފައި ވަޑައިގަންނަވާ މަންޒަރެވެ. އަދި ޖޭޕީގެ ތަރުޖަމާނު އަލީ ސޯލިހު ވެސް ވަނީ ރައީސް އިބްރާހިމް މުހައްމަދު ޞާލިހު އާއި ގާސިމް ބައްދަލު ކުރެއްވި ކަން "ވޮއިސް"އަށް ކަށަވަރު ކޮށްދެއްވާފައެވެ. އެހެންނަމަވެސް، ބައްދަލުމުގެ ތަފްސީލް ހާމައެއް ނުކުރައްވައެވެ.

ގާސިމް ކުއްލި ގޮތަކަށް ރައީސް އޮފީހަށް ވަޑައިގެންފައިވާއިރު، ކުރިއަށް އޮތް ރިޔާސީ އިންތިހާބުގައި އެމްޑީޕީ އާއި އެކު ކޯލިޝަން ހެދުމަށް އެ ޕާޓީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ޖޭޕީއަށް ހުށަހަޅުއްވާފައި ވަނިކޮށް، ޖޭޕީގެ ކޮންގްރެސް ގައި ވަނީ، ޖޭޕީން ކެންޑިޑޭޓެއް ނެރުމަށް، ނުވަތަ ޖޭޕީ އިސްވެ ކޯލިޝަން ސަރުކާރެއް އެކުލަވައި ލުމަށް ގަރާރެއް ފާސްކޮށްފައެވެ.

ނަމަވެސް އެ ގަރާރަށް އަމަލު ކުރުން ލާޒިމް ނޫން ކަމަށާ، އެއާއި މެދު ގޮތެއް ނިންމާނީ ޖޭޕީގެ އައު ކައުންސިލުން ކަމަށް ގާސިމް ވަނީ ބުނެފައެވެ.

ޖޭޕީގެ ކޮންގްރެސް އިން މިފަދަ ނިންމުމެއް ނިންމުމާއި ގުޅިގެން އެމްޑީޕީގެ ރައީސް ޞާލިހް ގެ ފެކްޝަން ގައި ހިމެނިވަޑައިގަންނަވާ ބައެއް މެންބަރުން ވަނީ އެކަމާއި ކަންބޮޑުވުން ފާޅުކުރައްވާފައެވެ. ޚާއްސަކޮށް ރައީސް ޞާލިހުއަށް އެންމެ ވަފާތެރި އެއް މެންބަރެއް ކަމުގައިވާ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވަނީ ޖޭޕީން ކެންޑިޑޭޓެއް ނެރޭ ނަމަ، މިހާރުގެ ކޯލިޝަނުން ޖޭޕީ ވަކި ވާނެ ކަމަށާ، ކެބިނެޓް ގައި ތިއްބެވި ޖޭޕީގެ މިނިސްޓަރުންވެސް ވަކި ކުރަންޖެހޭނެ ކަމަށް ވިދާޅުވެފައެވެ.

ޝަރީފް އެފަދައިން ވިދާޅުވެ ރޭ ވެސް ޓުވީޓް ކުރައްވާފައިވާއިރު, ގާސިމް އާއި އެކު ރައީސް ޞާލިހު ބޭއްވެވި މި ބައްދަލުވުމަކީ ކޯލިޝަން ހެދުމާއި ގުޅޭ ބައްދަލުވުމެއްކަމަށް ވަރަށް ބޮޑަށް ޔަގީން ކުރެވެއެވެ.