ޕިއްޒާ ފުށްގަނޑު މޮޑެން ދަސްކުރަން ބޭނުންތަ؟ މިއޮތީ ރެސިޕީ

މިއަދު ވޮއިސް ގެ ބަދިގެއިން ކިޔުންތެރިންނާއި ހަމައަށް މި ގެނެސްދެނީ ފަސޭހަ ކަމާއި އެކު ޕިއްޒާ ފުށްގަނޑު ތައްޔާރު ކޮށްލާނެ ގޮތެވެ. ކަމުދާނެ ކަމަށް އުއްމީދު ކުރަމެވެ. މި ރެސިޕީން ތައްޔާރު ކުރެވޭނީ 2 ޕިއްޒާ ފުށްގަނޑެވެ.

ބޭނުންވާ ތަކެތި

1 1/4 ޖޯޑު ތާފަނާ ފެން (45-46°c)

1/2 ސައި ސަމުސާ އީސްޓް

1 ސައި ސަމުސާ މާމުއި

1/2 މޭޒުމަތީ ސަމުސާ ލޮނު

1 1/3 ޖޯޑު ފުށް

ތައްޔާރު ކުރާނެ ގޮތް

1) ތައްޓެއްގެ ތެރޭގައި، ފެނާއި، މާމުއި އާއި ލޮނު އެކުލަވާލާށެވެ. ދެން އެއަށް އީސްޓް އެޅުމަށްފަހު 5 މިނެޓް ވަންދެން ބަހައްޓާށެވެ.

2) އެހެން ތަށްޓަކަށް ފުށް ފުރާނާލުމަށްފަހު މެދުގައި ކުޑަ ލޯވަޅެއް ހެދުމަށްފަހު އޭގެ ތެރެއަށް އީސްޓް މިކްސްޗަރ ރަނގަޅަށް އެކުލަވާލުމަށްފަހު ފުށްގަނޑު ތެރެއަށް އަޅާލާށެވެ. އަދި ޕްލާސްޓިކް ސަމުސަލަކުން ރަނގަޅަށް ފުށާއި އީސްޓް މިކްސްޗަރ އެއްކޮށްލާށެވެ.

3) އީސްޓް މިކްސްޗަރ އެއްކޮށް އެކުލަވައި ނިމުމުން، ގާތްގަނޑަކަށް 3 މިނެޓް ވަންދެން އަތުންވެސް ފުށްގަނޑު މޮޑެލާށެވެ. ފުށްގަނޑު ހުންނާނީ ކުޑަކޮށް އަތުގައި ތަތްލަވާ ވަރަށެވެ.

4) ދެން ތަށީގެ މަތި ރަނގަޅަށް ބަންދުކޮށްލުމަށްފަހު ގާތްގަނޑަކަށް 3 ގަޑިއިރު ވަންދެން ނުވަތަ ފުށްގަނޑު ގެ ސައިޒް ދެގުނަ އަށް ވަންދެން ބަހައްޓާށެވެ.

5) ދެން ފުށްގަނޑު ނެގުމަށްފަހު ހިކިފުށް ސާފު ތަނަކަށް ބުރުވާލުމަށްފަހު ފުށްގަނޑު އެތަނުގެ މަތީގައި ބާއްވައި ފުށްގަނޑު ވަށައިގެން ހިކިފުށް އުނގުޅާލާށެވެ.

6) އެއަށްފަހު ފުށްގަނޑު ދެބައި ކޮށްލުމަށްފަހު ކޮންމެ ބައެއް ވަކިވަކިން ދެ އަތްތިލަ ދޭތެރޭގައި ފޮތެއް ލައްޕާގޮތަށް މަޑު މަޑުން ފަށްޖަހަމުން ދާށެވެ. ގާތްގަނޑަކަށް 8 ފަހަރު އެގޮތަށް ފަށްޖެހުމަށްފަހު ބޯޅައެއް ހަދާލާށެވެ.

7) ދެން ޕިއްޒާ ފުށްގަނޑުގެ ސައިޒަށް ފުށްގަނޑު ދަމާލާށެވެ.