މާލޭ ފެންބޮޑުވިއިރު ފެން ހިންދާ ޕަންޕުތައް ހުރީ އޮން ނުކޮށް: ޑރ މުއިއްޒު
މިއަދު ހެނދުނު ވެހުނު ވިއްސާރައިގައި މާލޭގެ ބައެއް ސަރަހައްދުތަކުގައި ފެންބޮޑުވެފައިވާއިރު، މަގުތަކުގައި ފެން ހިންދާ ޕަންޕުތައް ހުރީ އޮން ނުކޮށްކަމަށް މާލޭ ސިޓީގެ މޭޔަރު ޑރ މުޙައްމަދު މުއިއްޒު ވިދާޅުވެއްޖެ އެވެ.
ހެނދުނު 6:30 ހާއިރު މާލެއަށް ގުގުރުމާއެކު ބޯކޮށް ވާރެވެހުމުގެ ސަަބަބުން މާފަންނާއި ހެންވޭރުގެ ބައެއް ސަރަހައްދުތަކުގައި ވަނީ ވަރަށް ބޮޑަށް ފެންބޮޑުވެފައެވެ. އަދި މަގުމަތީގައި ފެންބޮޑުވުމުގެ ސަބަބުން ބައެއް ގޭގެއަށްވެސް ވަނީ ފެން ވަދެފައެވެ. މީގެއިތުރުން ބައެއް ސަރަހައްދުތަކުގައި ވެހިކަލްތައް ދުއްވުމަށް ދަތިވާވަރަށް ވަނީ ފެންބޮޑުވެފައެވެ.
އެކަމާއި ގުޅޭގޮތުން މާލޭ ސީޓީގެ މޭޔަރު ޑރ މުޙައްމަދު މުއިއްޒު ކުރެއްވި ޓްވީޓެއްގައި ވިދާޅުވީ މާލޭގައި ފެން ބޮޑުވިއިރު ސްޓޯމް ވޯޓާ ސިސްޓަމް ބަލަހައްޓާ ފަރާތްތަކުން ހުރީ ޕަންޕުތަކުގެ ސްވިޗް އޮން ނުކޮށް ކަމަށެވެ. އަދި ފެން ބޮޑުވެގެން ދިޔައިރު ޕަންޕުތައް ނުޖައްސާ ގިނަ އިރުވެެގެން ދިއުމަކީ ވަރަށް ދެރަކަމެއްކަމަށް ޑރ މުއިއްޒު ވިދާޅުވިއެވެ.
"ސްޓޯމް ވޯޓާ ސިސްޓަމް ބަލަހައްޓާ ފަރާތްތަކުން ޕަންޕުތައް ސްވިޗް އޮން ނުކޮށް ގިނައިރުތަކެއް ވެގެން ދިއުމަކީ ދެރަކަމެއް. އަދި ކިރިއާ ޕަންޕުތައް ޖެއްސުނީ"
މާލޭ ސިޓީގެ މޭޔަރު ޑރ މުޙައްމަދު މުއިއްޒު
ޑރ މުއިއްޒު އިތުރަށް ވިދާޅުވީ މާލޭގެ މަގުތައް ރަނގަޅު ފެންވަރަކަށް ހެދުމަށް މާލޭ ސިޓީ ކައުންސިލުން ފެށި މަޝްރޫއުވެސް އަނބުރާ ގެންގޮސްފައިވާ ކަމަށެވެ. އަދި އެކަމުގެ ސަބަބުން މަގުތައް ވެސް ނުހެދި ހުރިކަން ޑރ މުއިއްޒު ފާހަގަކުރެއްވި އެވެ.
މާލޭ ސިޓީ ކައުންސިލުން އަމީނީ މަގު ޒަމާނީ ފެންވަރަކަށް ތަރައްގީ ކުރުމުގެ މަސައްކަތް ކުރަމުންދަނިކޮށް ޕްލޭނިން މިނިސްޓްރީ މެދުވެރިވެގެން އެ މަސައްކަތް ވަނީ އާރުޑީސީއާއި ހަވާލުކޮށްފައެވެ. ސިޓީ ކައުންސުލުން ޕްލޭނުކޮށްފައި އޮތީ އަމީނީ މަގުގެ އިތުރުން މާލޭގެ ގިނަ މަގުތަކެއް އެ މަޝްރޫއުގެ ތެރެއިން މަރާމާތުކުރުމަށްވެ.
އެހެންކަމުން ސިޓީ ކައުންސިލުން އެ މަސައްކަތް ކުރާ އަގުގެ ތިން ގުނަ އަގު ބޮޑުކޮށް އާރުޑީސީއާއި އަމީނީ މަގުގެ މަސައްކަތް ހަވާލުކޮށްފައިވާއިރު، އަދި މިހާތަނަށް ނިންމާލެވިފައިވަނީ އެންމެ ސެގްމަންޓެއްކަން ފާހަގަކޮށްލެވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
