ޤާސިމް ވިދާޅުވީ ޖޭޕީން ވަކިވަނީ މަޤާމު ދިފާޢުކުރަން ކަމަށް!
ޖުމްޙޫރީ ޕާޓީގެ ސްލޮޓުތަކުގައި ސަރުކާރުގެ އެކި މަޤާމުގައި ތިއްބެވި ފަރާތްތައް އެ ޕާޓީ ދޫކުރައްވާ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ތާޢީދުކުރައްވާކަން އިއުލާނުކުރައްވަމުން ގެންދަވަނީ އެ ބޭފުޅުން މިހާރު ތިއްބެވި މަޤާމު ދިފާޢުކުރެއްވުމަށް ކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާޙިމް ވިދާޅުވެއްޖެ އެވެ.
ޤާސިމް މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި ޖުމްޙޫރީ ޕާޓީން ވަކިން ނިކުމެ އިންތިޚާބުގައި ވާދަކުރަން ނިންމާ އެކަން އިއުލާނުކުރުމާއި ގުޅިގެން ސަރުކާރުގެ އެކި މަޤާމުތަކުގައި ތިއްބެވި ފަރާތްތައް ޖޭޕީން ވަކިވަމުންދާތީ ހިތްޕުޅު ހަމަޖެހިވަޑައިނުގެން ކުރެއްވި ޓްވީޓެއްގަ އެވެ.
ޖޭޕީގެ ސްލޮޓުތަކުގައި ސަރުކާރާއި ސަރުކާރު ކުންފުނިތަކުގައި ތިއްބެވި ބައެއް ފަރާތްތައް އިސްތިއުފާދެއްވަމުން ވިދާޅުވެފައިވަނީ އެބޭފުޅުން ޖޭޕީން ވަކިވުމަށް އެދިވަޑައިގަތީ ރައީސް ޞާލިހަށް ތާޢީދުކޮށް އެމަނިކުފާނަށް ދެވަނަ ދައުރެއް ހޯއްދަވާދެއްވުމުގެ މަސައްކަތުގައި ބައިވެރިވުމަށް ކަމަށެވެ.
އެހެން ނަމަވެސް ޤާސިމްގެ ޓްވީޓުގައި ވަނީ އެ މޭރުމުން ވާހަކަދެއްކެވުމަކީ ޖުމްހޫރީ ޕާޓީ ބަދުނާމުކުރުންކަމަށް ސިފަކުރައްވާފަ އެވެ. އަދި ޤާސިމް ވަނީ ސަރުކާރު ދިފާއުކުރެއްވުމުގެ ނިޔަތުގައި ޖުމްހޫރީ ޕާޓީ އާއި ޕާޓީގެ ލީޑަޝިޕް ބަދުނާމުވާގޮތަށް ވާހަކަނުދެއްވުމަށް އެދިވަޑައިގެންފަ އެވެ.
ޤާސިމް ވިދާޅުވީ ޖުމްޙޫރީ ޕާޓީގެ ސްލޮޓުތަކުގައި ސަރުކާރުގެ މަޤާމުތަކުގައި ތިއްބެވި ފަރާތްތައް ރައީސް ޞާލިހަށް ތާއީދުކުރައްވަން ނިންމެވީ މަޤާމުގެ ދިފާއުގައި ކަމަށެވެ. އަދި ޖޭޕީން އިސްތިއުފާދެއްވާއިރު އެފަދައިން ސަބަބު ބަޔާންކުރުން ކީއްތޯ އައްސަވާ ޤާސިމް ވަނީ ސުވާލުކުރައްވާފަ އެވެ.
"ސަރުކާރުގެ މަޤާމުތަކުގައި ތިއްބެވި ޖޭޕީގެ ބައެއްބޭފުޅުން އެ ބޭފުޅުންގެ މަޤާމު ދިފާޢުކުރެއްވުމުގެ ނިޔަތުގައި ޕާޓީއާއި ޕާޓީގެ ލީޑަރޝިޕް ބަދުނާމު ނުކުރައްވާ، ކަމުގެ ހަޤީޤަތާއި އެއްގޮތަށް ވަޒީފާގެ ބޭނުމަށްޓަކައި ޕާޓީން ވަކިވާކަން ޢިއްލާން ކުރެއްވުން ކީއްތޯ؟ "
ޖުމްހޫރީ ޕާޓީގެ ލީޑަރު ޤާސިމް އިބްރާހިމް
ރިޔާސީ އިންތިޚާބުގައި ޖޭޕީގެ ލީޑަރު ވާދަކުރައްވާނެކަން އިއުލާނުކުރެއްވުމާއި ގުޅިގެން ސަރުކާރުގެ މަޤާމުތަކުގައި ތިއްބެވި ޖޭޕީގެ ބޭފުޅުން އިސްތިއުފާދެއްވުމަށް ރައީސް ޞާލިހަށް ތާއީދުކުރައްވާ ބޭފުޅުން ގެންދަވަނީ ގޮވާލައްވަމުންނެވެ.
އަދި ޖޭޕީގެ މެމްބަރުން އިސްތިއުފާ ނުދެއްވައިފިނަމަ "ވަރަށް ހަޑިކޮށް" މަގާމުތަކުން ވަކިކުރާނެ ކަމުގެ އިންޒާރުވެސް ރައީސް ޞާލިހަށް ތާއީދުކުރައްވާ މެމްބަރުން ދެއްވަމުން ގެންދަވާއިރު، ޖޭޕީގެ ސްލޮޓުތަކުގައި ސަރުކާރުގެ އިސް މަޤާމުތަކުގައި ތިއްބެވި ބައެއް ބޭފުޅުން ވަނީ ޖޭޕީން އިސްތިއުފާދީފަ އެވެ. އަދި ރައީސް ޞާލިހަށް ތާއީދުކުރާކަން ރަސްމީކޮށް އިއުލާނުކުރައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
