ރައީސް ޞާލިހަށް ތާއީދުކުރަން މި ނިންމީ އެއްވެސް ޝަރުތަކާ ނުލާ: ޑރ މައުސޫމު
ކުރިއަށް އޮތް ރިޔާސީ އިންތިޚާބުގައި އެއްވެސް ޝަރުތަކާއި ނުލާ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ތާއީދުކުރަން ނިންމަވާފައިވާކަން ޓުއަރިޒަމް މިނިސްޓަރު ޑރ.ޢަބްދުالله މައުސޫމު ޢިއުލާނު ކުރައްވައިފި އެވެ.
ރައީސް ޞާލިހަށް ތާއީދުކުރައްވަން ނިންމަވާފައިވާކަން ޑރ މައުސޫމު ޢިއުލާނުކުރައްވާފައިވަނީ ޖޭޕީން މެމްބަރުން ވަކިވަނީ މަޤާމު ދިފާޢުކުރެއްވުމަށް ކަމަށް އެ ޕާޓީގެ ލީޑަރު ޤާސިމް އިބްރާހިމް ވިދާޅުވިތާ ކުޑަ އިރުކޮޅެއް ފަހުން ކުރެއްވި ޓްވީޓެއްގަ އެވެ.
ރައީސް ޞާލިހާއެކު ކަންގަވާފައިވާ ފޮޓޯއެއް ހިއްސާކުރައްވާ ޑރ މައުސޫމު ވިދާޅުވީ އެމަނިކުފާނު ރައީސް ޞާލިހަށް ތާއީދުކުރައްވަން ނިންމެވީ އެއްވެސް ޝަރުތަކާއި ނުލާ ކަމަށެވެ. އަދި އެގޮތަށް ނިންމެވީ އެއީ ދައުލަތަށް އެންމެ ފައިދާ ހުރި ގޮތްކަމަށް ޤަބޫލުކުރައްވާތީ ކަމަށެވެ.
"ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ދެވަނަ ދައުރެއް ލިބުމަކީ ރާއްޖެއަށާއި ރައްޔިތުންނަށް އަދި ކިއެއްތަ މުޅި ދިވެހި ދައުލަތަށް އެންމެ ފައިދާބޮޑު ގޮތްކަމަށް އަހުރެންނަށް ވިސްނުނު ހިނދު ރައީސް އިބޫއަށް އެއްވެސް ޝަރުތަކާ ނުލާ ތާއީދުކޮށް ބައިޔަތުހިފާ މިކަން އެންމެ ކަތުންނަށް އަންގާލުމަށް މި ފޮޓޯއާއި މިވާހަކަ ހިއްސާކޮށްލީމެވެ"
ޓުއަރިޒަމް މިނިސްޓަރު މައުސޫމު
ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވާނެކަން ރަސްމީކޮށް އިއުލާނުކުރެއްވުމާއި ގުޅިގެން ޖޭޕީގެ ސްލޮޓުތަކުގައި ސަރުކާރުގެ އެކި މަގާމުތަކުގައި ތިއްބެވި ފަރާތްތައް ގެންދަވަނީ އެ ޕާޓީން އިސްތިއުފާދެއްވަމުން ނެވެ.
އަދި ރައީސް ޞާލިހަށް ތާއީދުކުރައްވާ އެމަނިކުފާނަށް ދެވަނަ ދައުރެއް ހޯއްދަވާދެއްވުމުގެ މަސައްކަތުގައި ބައިވެރިވާނެކަން އިއުލާނުކުރައްވަމުން ނެވެ.
ސަރުކާރުގައި ތިބި ރައީސް ޞާލިހަށް ތާއީދު ނުކުރައްވާ މެމްބަރުން އިސްތިއުފާދެއްވުމަށްވެސް ރައީސް ޞާލިހުގެ ވަފާތެރިކަން ދަނީ ގޮވާލައްވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
