މެއި ޑޭ މުޒާހަރާ އަކީ ރާއްޖޭގެ ތަރީޚް ބަދަލުކޮށްލި މުޒާހަރާ އެއް: ޢިމްރާން

2015 ވަނަ އަހަރުގެ މެއި މަހުގެ 1 ވަނަ ދުވަހު، އޭރުގެ އިދިކޮޅު ފަރާތްތަކުން ކުރި މުޒާހަރާ، މެއި ޑޭ މުޒާހަރާ، އަކީ ރާއްޖޭގެ ތަރީޚް ބަދަލުކޮށްލި މުޒާހަރާ އެއް ކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް ޢިމްރާން އަބްދުالله ވިދާޅުވެއްޖެ އެވެ.

މެއި ޑޭ ގެ މުޒާހަރާއަށް މިހާރު 8 އަހަރު ވެފައިވާއިރު، އެދުވަހުގެ މުޒާހަރާގައި ޢިމްރާން ދެއްކެވި ވާހަކަތަކަށް އަދި އަދަށް ދާންދެންވެސް ގިނަ ބައެއްގެ ފާޑުކިޔުންތައް އަންނަނީ އަމާޒުވަމުންނެވެ.

އެވާހަކަތަކަށް ރައްދު ދެއްވަމުން ޢިމްރާން މިއަދު ކުރެއްވި ޓްވީޓެއްގައި ވިދާޅުވީ، ކުރީގެ ރައީސް ޔާމީން އަބްދުލްގައްޔޫމް ގެ ކިބައިން ދިވެހިން ސަލާމަތްވީ މެއި ޑޭގައި ދިވެހިން ދެއްކި އެއްބައިވަންތަ ކަމުން ކަމަށެވެ.

އަދި އަނިޔާވެރިންނާއި، އަނިޔާއަށް ތާއީދު ކުރާ މީހުންނަށް ގަބޫލު ނުކުރެވުނު ނަމަވެސް، މެއި ޑޭ މުޒާހަރާ އަކީ ރާއްޖޭގެ ތަރީޚް ބަދަލުކޮށްލި މުޒާހަރާ އެއް ކަމަށްވެސް އޭނާ ވިދާޅުވި އެވެ.

މެއި ޑޭގެ މުޒާހަރާ ހިނގި އިރު، އިދިކޮޅުގައި ހުންނެވި އަދި މިހާރު ފުލުހުންގެ ބެލެނިވެރި މިނިސްޓްރީއާ ހަވާލުވެވަޑައިގެން ހުންނެވި އިމްރާން، އެ މުޒާހަރާގައި ވާހަކަ ދައްކަވަމުން ވަނީ، އަނިޔާވެރި ގޮތަކަށް އޮކްޓޯބަރު 2012ގައި އަވަހަރާކޮށްލި އަފްރާޝީމްގެ މަރުގެ ހަގީގަތް ޔާމީންއަށް އެނގިވަޑައިގަންނަވާނެ ކަމަށާ ޑޮކިއުމެންޓްތައް އަތުގައި އެބަހުރި ކަމަށް ވިދާޅުވެފައެވެ.

"[އަފްރާޝިމް އަވަހާރަކޮށްލުމުގައި އަމަލީ ގޮތުން ބައިވެރިވިކަން ސާބިތުވެ މަރަން ހުކުމްކޮށްފައިވާ] ހުމާމު ބުނީ ތެދެއް. ހުމާމު ބުނީ ޑރ. އަފްރަޝީމް ޝަހީދުކުރި މީހުން އެންމެ ރަނގަޅަށް އެނގޭނީ ރައީސް ޔާމީނާއި އަހުމަދު އަދީބާ ދެ މީހުންނަށޭ. އެ ދެ މީހުންނަށް އެނގޭނެ. އާދެ، މި ގައުމުގައި ތިބި އެންމެ ބޮޑު ދެ އަނިޔާވެރިން އެ ދެ މީހުންނަކީ. އަޅުގަނޑުމެން އެއްވެ މި ތިބީ މި އަނިޔާވެރިކަމާ ދެކޮޅަށް، މި އަނިޔާވެރިކަން ނިންމަން،" 1 މެއި 2015ގައި އޭރުގެ އިދިކޮޅު އިއްތިހާދުން ބޭއްވި ބޮޑު އެއްވުމުގައި އިމްރާން ވިދާޅުވި އެވެ.

"އަފްރާޝީމް[ގެ މަރާ] ގުޅިގެން ގާތްގަނޑަކަށް ހަތް މީހުން މަރާލާފައި މި ބިންމައްޗަށް ވެއްޓުނީ. ކޮބާތޯ ޔާމީނަށް އެނގޭ ހަގީގަތް... މި ހުރީ އަޅުގަނޑު އަތުގައި ހުރި ޑޮކުމަންޓްތައް މިއަދު ވަގުތު ނެތް [ތަފްސީލަށް ދާން]. ދިވެހި ލޮބުވެތި ރައްޔިތުން، މި ހުރީ އަޅުގަނޑު އަތުގައި ޑޮކުމެންޓްތައް."

މުޒާހަރާގެ ތެރެއިން ޢިމްރާން އެފަދައިން ވިދާޅުވި ނަމަވެސް، ރައީސް ޔާމީނުގެ ވެރިކަން ބަދަލުވެ އިމްރާނަށް ހޯމް މިނިސްޓަރުކަން ލިބިވަޑައިގެންނެވި ފަހުން އެއިރު ހުރިކަމަށް ވިދާޅުވި ހެކިތަކާ ގުޅިގެން ނޫސްވެރިން ސުވާލުކުރުމުން އެތައް ފަހަރެއްގެ މަތިން އެ ސުވާލަށް ޖަވާބުދެއްވަން އިމްރާނުވަނީ ދެކޮޅުހައްދަވާފައެވެ.

ރައްޔިތުންގެ މަޖިލީހުގައި އެކަމާމެދު ސުވާލުކުރުމުން އިމްރާން ވިދާޅުވެފައިވަނީ މޭޑޭގައި އޭނާގެ އަތްޕުޅުގައި ހުރި ހެކިތައް ފުލުހުން އޭނާ އަތްޕުޅުން އަތުލައިގެން ގެންދިޔައީ ކަމަށެވެ. ނަމަވެސް އެ ހެކި ހޯއްދަވަން ފަހުން މަސައްކަތްކުރެއްވިތޯ ސުވާލުކުރުމުން އެ ސުވާލަށް އިމްރާނު ޖަވާބެއް ނުދެއްވައެވެ.