ސަރުކާރުގެ އަމާޒަކީ ރައީސް ޔާމިން ސިޔާސީ މައިދާނުން ގެއްލުވާލުން: އަބްދުއްރަހީމް

މި ސަރުކާރުގެ އަމާޒަކީ ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު ސިޔާސީ މައިދާނުން ގެއްލުވާލުންކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައިވަނީ ޗެނަލް-13 އިން ގެނެސްދިން ނިއުސްޓޯކް ޕްރޮގްރާމުގައި ވަހަކަދައްކަވަމުން ނެވެ.

އަބްދުއްރަހީމް ވިދާޅުވީ މި ސަރުކާރަށް ލިބުނު 5 އަހަރުގެ ދައުރުގެ ބޮޑުބައި ރައީސް ޔާމިނަށް ހޭދަކުރައްވަން ޖެހިވަޑައިގަތީ ޖަލުގައި ކަމަށެވެ. އެގޮތުން 3 އަހަރާއި ގާތްކުރާ މުއްދަތަކަށް އެ މަނިކުފާނު ޖަލުގައި ހޭދަކުރައްވާފައިވާކަން އޭނާ ފާހަގަކުރެއްވި އެވެ.

ސިޔާސީ ވާދަވެރިކަމުގެ ތެރެއިން ރައީސް ޔާމިނުގެ މައްޗަށް ފުލުފުލުގައި ދައުވާތައް އުފުލަމުންދާއިރު، ދަށު ކޯޓުގައި މިހާރު އޮތް ފުއްގިރި މައްސަލަ އަވަސް އަރުވާލައިގެން ކުރިއަށް ގެންދަނީވެސް އަނެއްކާވެސް އެމަނިކުފާނުގެ މައްޗަށް ހުކުމް ކުރުމަށްކަމަށް އަބްދުއްރަހީމް ވިދާޅުވި އެވެ.

"އަޅުގަނޑު ޤަބޫލުކުރަނީ ރައީސް ޔާމިނުގެ ޝަރީއަތް އަވަސް އަރުވާލައިގެން މިހާރު އެމީހުން މި ގެންދަނީ އަނެއްކާ އަނެއް ހުކުމް ރައީސް ޔާމިނުގެ މައްޗަށް ޖަހާށޭ. މި މީހުން ވެރިކަމަށް އައުމަށް ދެއްކި އެއް ވާހަކައަކީ ހަވާ ފަޓާސްބަރިއެއްހެން ޝަރީއަތް ކުރަނީއޭ. އިންސާފެއް ނުލިބެއޭ، އެހެންވީމަ އިންސާފު ހޯދާ ދޭށޭ ތިމަންނާމެން މި އައީ. އެކަމަކު އައި މީހުން މި ވީގޮތަކީ މި ދިވެހިރާއްޖެ ދުވަހަކު ނުދެކޭވަރުގެ އަނިޔާވެރި ބަޔަކަށް މިވީ"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް ވިދާޅުވީ މި ޝަރީއަތް ކުރިއަށް ދާއިރު، ރައީސް ޔާމިނަށް ލިބެން ޖެހޭ ވަރަށް ގިނަ ހައްޤުތަކުން އެމަނިކުފާނު މަހުރޫމުކޮށްފައިވާ ކަމަށެވެ.

އެއީ އިންސާފު ހޯދުމަށް ނުވަތަ އެމަނިކުފާނުގެ މައުސޫލުކަން ސާބިތުކޮށްދިނުމަށް އޮތް ވަރަށް ބޮޑު ހުރަހެއްކަމަށާއި، އެފަދައިން އެކަން ކުރަމުން ދިއުމަކީ އިންތިހާއަށް ކަންބޮޑުވުން އޮތް ކަމެއްކަމަށް އަބްދުއްރަހީމް ވިދާޅުވި އެވެ.

އޭނާ އިތުރަށް ވިދާޅުވީ ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓަށްވުމުން، އެމަނިކުފާނުގެ މައްސަލަތަކަކީ އެތައް ބައެއްގެ މަސްލަހަތާއި ގުޅިފައިވާ މައްސަލަތަކެއް ކަމަށެވެ. އެހެންކަމުން، އެމަނިކުފާނުގެ ޝަރީއަތް ކުރިއަށްދަނީ އިންސާފުވެރިކަމާއެކުގައި ތޯ ބަލާ ކަށަވަރުކުރުމަށް ކަމާ ގުޅުންހުރި އިދާރާތަކަށް ގޮވާލައްވާކަމަށް އަބްދުއްރަހީމް ވިދާޅުވި އެވެ.