ފޯޅަވަހި މައްސަލައިގައި އެމްއާރްއެމް އިން ސަރުކާރަށް ތާއީދު ނުކުރަން ނިންމައިފި

ފޯޅަވަހި މައްސަލައިގައި ސަރުކާރުން ގެންގުޅޭ ސިޔާސަތަށް ތާއީދު ނުކުރުމަށް ކުރީގެ ރައީސް އަލްއުސްތާޒް މައުމޫނު ޢަބްދުލް ޤައްޔޫމް އިސްވެހުންނަވައި ހިންގާ އެމްއާރްއެމް އިން ނިންމައިފިއެވެ.

ރޭ 8:30 ހާއިރު އެމްއާރްއެމް އިން ކުއްލި އެކްސްކޯ ބައްދަލުވުމެއްވަނީ ބާއްވާފައެވެ. އެމްއާރްއެމް އިން ބުނެފައިވަނީ 71 ޕަސެންޓްގެ ބޮޑު އަޤްލަބިއްޔަތުން ފޯޅަވަހީގެ މައްސަލައިގައި ސަރުކާރުން ގެންގުޅޭ ސިޔާސަތަށް ތާއީދު ނުކުރާކަން ހާމަ ކުރުމަށް ނިންމާފައިވާކަމަށެވެ. އަދި މިކަމުގައި  އެމްއާރްއެމް އިން ގެންގުޅޭ ވިސްނުން ވަރަށް އަވަހަށް ހާމަކުރާނެ ކަމަށެވެ. 2022 ވަނަ އަހަރުވެސް އެމްއާރްއެމް އިން ވަނީ މިކަމާއި މެދު ކަންބޮޑުވުންތައް ހާމަކޮށްފައި ކަން ފާހަގަ ކޮށްލަން ޖެހެއެވެ.

ފޯޅަވަހި ނުވަތަ ޗާގޯސް އާއި ރާއްޖެއާ ދެމެދު އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށައެޅި މައްސައިގައި ރާއްޖެ އާއި ފޯޅަވަހި ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެއެވެ.

އިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ. މި މައްސަލާގައި މޮރިޝަސްއިން ވަކާލާތު ކުރަމުން ދިޔައީ އިން ކަނޑައެޅުމުގައި ބްލެންހެމް ފަރުން މިން އަޅަން ފެށުމަށެވެ. ނަމަވެސް ރާއްޖޭން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންކުރުމަށެވެ.

ދެ ފަރާތުގެ ވާހަކައަށް ބެލުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.

އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.

މިކަމާއި ދެކޮޅަށް ރާއްޖޭގެ އެތައް ބަޔަކު ދަނީ އަޑު އުފުލަމުންނެވެ. އެގޮތުން ފޯޅަވަހީގެ ސިޔާދަތީ ބާރު  ރާއްޖެއިން ދޫކޮށްލުމުން ރާއްޖޭގެ ކަނޑުގެ ބޮޑު ބައެއް ރާއްޖެއަށް ގެއްލުނީ ކަމަށް ބުނެފައިވެއެވެ.