45 ހެކްޓަރުގެ ބިން ހިއްކާ ނައިފަރުގައި 400 ހައުސިން ޔުނިޓު އަޅާނަން: ޑރ މުއިއްޒު

45 ހެކްޓަރުގެ ބިން ހިއްކާ ނައިފަރުގައި 400 ހައުސިން ޔުނިޓު އެޅުއްވުމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވައުދުވެވަޑައިގެންފި އެވެ.

އެމަނިކުފާނު އެފަދައިން ވައުދުވެވަޑައިގެންފައި ވަނީ ޅ. އަތޮޅަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅުގެ ނައިފަރުގައި ބޭއްވި ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.

ޑރ މުއިއްޒު ވިދާޅުވީ ނައިފަރުގެ ރައްޔިތުންނަށް ދިމާވެފައިވާ އެންމެ ބޮޑު މައްސަލައަކީ އެކަށީގެންވާ ބޯހިޔާވަހިކަން ނުލިބުމުގެ މައްސަލަކަން ފާހަގަކުރެވިފައިވާ ކަމަށެވެ. އަދި އެ ޝަކުވާތައް ރައްޔިތުންގެ ފަރާތުން ވެސް ހިއްސާކުރައްވާފައިވާ ކަމަށެވެ.

އެހެން ކަމުން ވެރިކަން ލިބިވަޑައިގެންފި ނަމަ ފަޅު ހިއްކާ 45 ހެކްޓަރުގެ ބިން ހިއްކާނެ ކަމަށާއި، އަދި ބޯހިޔާވަހިކަމުގެ މައްސަލައަށް ޙައްލު ހޯއްދަވާދެއްވުމުގެ ގޮތުން އެ ރަށުގައި 400 ހައުސިން ޔުނިޓު އަޅުއްވާދެއްވާނެ ކަމަށެވެ. އަދި ނައިފަރަށް ދިމާވެފައިވާ އެ މައްސަލަތައް ޙައްލުކޮށްދެއްވާނީ ޚާއްސަ އަހަންމިއްޔަތުކަމެއް ދީގެންކަން ޑރ މުއިއްޒު ފާހަގަކުރެއްވި އެވެ.

އޭގެ އިތުރުން ޑރ މުއިއްޒު ވިދާޅުވީ މިހާރު އެރަށުގައި އަޅާފައިވާ ހައުސިން ޔުނިޓުތަކުގައި އަސާސީ ޚިދުމަތްތައް ގާއިމްވެފައި ނެތުމުގެ ސަބަބުން ރައްޔިތުންނަށް ވަރަށް ބޮޑެތި ތަކުލީފުތައް އުފުލަން ޖެހިފައިވާ ކަމަށެވެ. އެގޮތުން އެ ފްލެޓުތަކަށް ކަރަންޓާއި ފެނުގެ ޚިދުމަތް އެކަށީގެންވާ ގޮތެއްގައި ފޯރުކޮށްދެމުން ނުދާކަން ޑރ މުއިއްޒު ފާހަގަކުރެއްވި އެވެ.

އެއާއެކު ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ޚާއްސަ އިސްކަމެއް ދީގެން އެ މައްސަލަތައް ޙައްލުކޮށްދީ އެ ހައުސިން ޔުނިޓުތަކުގައި އުޅޭ ފަރާތްތަކަށް އަސާސީ ޚިދުމަތްތައް ކަށަވަރުކޮށްދެއްވާނެ ކަމަށެވެ.

ހަމައެއާއެކު ނައިފަރުން ގޯތި ދޫކުރުމަށް ރަށު ކައުންސިލަށް އޮތް ހުރަސްތައް ނައްތާލާ، މިހާރު ކައުންސިލުން ނިންމާފައިވާ ގޮތަށް 80 ގޯތި ދޫކުރުމަށް ހުއްދަދެއްވާނެ ކަމަށް ވެސް ޑރ މުއިއްޒު ވިދާޅުވި އެވެ.

ޑރ މުއިއްޒު ވިދާޅުވީ ހައުސިން މައްސަލައަކީ އިޖްތިމާއީ މައްސަލަތަކަށް ވެސް މަގުފަހިކުރުވާ ކަމެއް ކަމަށެވެ. އެކަށީގެންވާ ހައުސިން ނިޒާމެއްގެ ތެރެއިން އިޖްތިމާއީ ގިނަ މައްސަލަތަކަށް ވެސް ޙައްލު ލިބިގެންދާނެ ކަމަށާއި، ހައުސިން މައްސަލައަކީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި އެންމެ އިސްކަންދީގެން ޙައްލުކުރާނެ މައްސަލަތަކަށް ޑރ މުއިއްޒު ވަނީ ވިދާޅުވެފަ އެވެ.