ނައިފަރުގައި އިސްލާމީ މަރުކަޒެއް އަޅާ، ޤައުމީ ޔުނިވާސިޓީގެ ކެމްޕަހެއް ހުޅުވައިދޭނަން: ޑރ މުއިއްޒު

ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ނައިފަރުގައި އިސްލާމީ މަރުކަޒެއް ބިނާކޮށް، ޤައުމީ ޔުނިވާސިޓީގެ ކެމްޕަހެއް އެޅުމަށް އެ ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވައުދުވެވަޑައިގެންފި އެވެ.

ޑރ މުއިއްޒު މިފަދައިން ވައުދުވެވަޑައިގެންފައި ވަނީ ނައިފަރުގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާގައި، އެ ރަށަށް ކޮށްދެއްވާނެ މުހިންމު ކަންކަން އިއުލާނުކޮށްދެއްވަމުން ނެވެ.

އެގޮތުން ޑރ މުއިއްޒު ވިދާޅުވީ ނައިފަރަކީ ވަރަށް ތައުލީމީ އާބާދީއެއް އޮންނަ ރަށެއް ކަމަށެވެ. ޒަމާނުއްސުރެ ނައިފަރު ފާހަގަކުރެވިފައިވަނީ ތައުލީމަށް ލޯބިކުރާ، ތައުލީމީ ދަރިންތަކެއް އުފައްދާފައިވާ ރަށެއްގެ ގޮތުގައިކަން ޑރ މުއިއްޒު ފާހަގަކުރެއްވި އެވެ.

އެ ވާހަކައާއި ގުޅުވާ ޑރ މުއިއްޒު ވިދާޅުވީ، ނައިފަރުގައި ގައުމީ ޔުނިވާސިޓީގެ ކެމްޕަހެއް ހުޅުވުމަކީ ރަށުގައި ތިބެގެން ތައުލީމު ހާސިލްކުރަން ބޭނުންވާ ދަރިވަރުންނަށް ލުއި ފަސޭހަކަން ލިބިގެންދާނެ ކަމެއް ކަމަށެވެ. އެހެންކަމުން ނައިފަރުގައި އެފަދަ ކެމްޕަހެއް ހުޅުވާދެއްވާނެ ކަމަށް ޑރ މުއިއްޒު ވިދާޅުވި އެވެ.

އޭގެ އިތުރުން ޑރ މުއިއްޒު ވިދާޅުވީ އެ ރަށުގައި އިސްލާމީ މަރުކަޒެއް ހުޅުއްވާދެއްވާނެ ކަމަށެވެ. އަދި އިސްލާމީ މަރުކަޒުން ލިބޭ ޚިދުމަތްތައް ވެސް ޤާއިމްކޮށްދެއްވާނެ ކަމަށެވެ. މިއީ ވެސް ނައިފަރު ފަދަ ރަށެއްގައި ޤާއިމްކުރުމަށް އެކަށީގެންވާ މަރުކަޒެއް ކަމަށާއި، އެކަމުގެ ސަބަބުން ދީނީ ކަންކަމަށް ރައްޔިތުންގެ މެދުގައި އޮންނަ ލޯބި އިތުރުކުރުމަށް ބާރަކަށް ވެގެންދާނެ ކަމަށް ޑރ މުއިއްޒު ވިދާޅުވި އެވެ.

އެ ކަންކަމުގެ އިތުރުން ވެސް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ނައިފަރަށް ގިނަ ކަންތައްތަކެއް ކޯށްދިނުމަށް ނިންމާފައިވާކަމަށް ޑރ މުއިއްޒު ވިދާޅުވި އެވެ. އޭގެ ތެރޭގައި:

*400 ހައުސިން ޔުނިޓު އެޅުން

*45 ހެކްޓަރުގެ ބިން ހިއްކުން

*40 ޓަނުގެ އައިސް ޕްލާންޓެއް ހެދުން

*ބަނދަރު ޒަމާނީ ފެންވަރަަކަށް ތަރައްގީކުރުން

*މަގުތައް ހެދުން

*މިހާރު އަޅާފައިވާ ހައުސިން ޔުނިޓުތަކަށް ފެނާއި ކަރަންޓުގެ ޚިދުމަތް ފޯރުކޮށްދިނުން

ޑރ މުއިއްޒު ވިދާޅުވީ އެމަނިކުފާނު ކުރައްވާނީ ރައްޔިތުން އެދޭގޮތަށް، ތަރައްގީގެ ކަންކަން ހަލުވި ސްޕީޑުގައި ގެންގޮސްދެއްވާނެ ވެރިކަމެއް ކަމަށެވެ. އަދި ރައްޔިތުން އެމަނިކުފާނަށް އިތުބާރުކޮށް ރިޔާސީ އިންތިޚާބުގެ ކުރިއަށް މި އޮތް ދުވަސްތަކުގައި ކެމްޕޭނުގެ ފޯރިގަދަކުރުމަށް ޑރ މުއިއްޒު ވަނީ އެދިވަޑައިގެންފަ އެވެ.