ހައްޖު ކޯޓާ 2000 އަށް އިތުރުކުރެވިދާނެ ކަމުގެ ޔަގީންކަން އެބޮތް: ޑރ މުއިއްޒު

ވެރިކަން ލިބިވަޑައިގެންފި ނަމަ މިހާރު ސައުދީން ދިވެހިރާއްޖެއަށް ދޫކުރާ ހައްޖު ކޯޓާ 2000 ކޯޓާއަށް އިތުރުކުރެވިދާނެ ކަމުގެ ވަރަށް ބޮޑު ޔަގީންކަމެއް އޮތްކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ދެއްވައިފި އެވެ.

ޅ ނއިފަރުގައި އޮތް ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ ހައްޖު ކޯޕަރޭޝަން އަޕްގްރޭޑްކޮށް، އެ ކޯޕަރޭޝަނުން ދޭ ޚިދުމަތްތައް ފުޅާކުރުމަކީ ޕްރޮގްރެސިވް ކޮންގްރެސް ކޯލިޝަނުން ވަރަށް ޚާއްސަ އިސްކަމެއް ދީގެން ކުރައްވާނެ މަސައްކަތްތަކެއް ކަމަށެވެ.

އެގޮތުން ހައްޖަށް ދާން ބޭނުންވެގެން ނަންނޯޓުކޮށްފައި ތިބި މީހުންގެ ދިގު ލިސްޓެއް މިހާރު ވެސް ހައްޖު ކޯޕަރޭޝަންގައި އެބޮތް ކަމަށާއި، ވެރިކަމަށް ވަޑައިގެން ދެ އަހަރުތެރޭގައި އެ ލިސްޓުގައި ތިބި އެންމެނަށް ހައްޖަށް ދިއުމުގެ ފުރުސަތު ފަހިކޮށް "ވެއިޓިން ލިސްޓު" ނިމުމަކަށް ގެންނާނެކަމަށް ޑރ މުއިއްޒު ވިދާޅުވި އެވެ.

އެމަނިކުފާނު ވިދާޅުވީ ރައީސް ޔާމިނާއި ސައުދީގެ ރައީސަކީ ވަރަށް ގާތް ދެބޭފުޅުން ކަމަށެވެ. ރައީސް ޔާމިނުގެ ޒައާމަތުގައި ސައުދީ ސަރުކާރުގެ އެހީތެރިކަން ރާއްޖެއަށް އެކި ގޮތްގޮތުން ލިބެމުން ދިޔަ ކަމަށާއި، ސައުދީއާއެކު އެމަނިކުފާނުގެ ޒައާމަތުގައި ގާއިމްކުރެވުނު ޚާރިޖީ ސިޔާސަތުގެ ބޭނުން ހިފާ، މިހާރު ހައްޖަށް ދިއުމަށް ދިވެހިރާއްޖެއަށް ދޫކޮށްފައިވާ ކޯޓާ 1000 އިން 2000 އަށް އިތުރުކޮށްދިނުމަށް ސައުދީ ސަރުކާރުގައި ދަންނަވާނެކަމަށް ޑރ މުއިއްޒު ވިދާޅުވި އެވެ.

އެމަނިކުފާނު ވިދާޅުވީ ރައީސް ޔާމިނުގެ ޒައާމަތުގައި ސައުދީ ސަރުކާރާއި އެކުގައި އުފައްދާފައިވާ ގާތް ގުޅުމަށް ބަލާއިރު، އެމަނިކުފާނުގެ އެހީތެރިކަމާއެކު، ސައުދީގައި ދަންނަވައިގެން ކޯޓާ އިތުރުކުރުމުގެ މަސައްކަތް ފައްޓަވާނެ ކަމަށެވެ. އަދި އެ ކޯޓާ އަހަރަކު 2000 ކޯޓާއަށް އިތުރުކުރެވޭނެ ކަަމުގެ ވަރަށް ބޮޑު ޔަގީންކަމެއް އޮތްކަމަށް ޑރ މުއިއްޒު ވިދާޅުވި އެވެ.

ރައީސް ޔާމިނުގެ ޒައާމަތުގައި ސައުދީ ސަރުކާރާއެކި އެކު ޚާރިޖީ ގާތް ގުޅުމެއް އުފައްދަވާ އެ ގުޅުންތައް ދަމަހައްޓާފައިވާއިރު، ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި އޭރު ސައުދީ ސަރުކާރާއެކު އެކު އުފައްދާފައިވާ ގުޅުންތައް އިޔާދަކޮށް ވަރުގަދަކުރާނެކަމަށް އެ ކޯލިޝަނުން ވަނީ ބުނެފަ އެވެ.

އެގޮތުން ޕީޕީއެމް ގެ އެޑްވައިޒަރު އަދި ކުރީގެ އިސްލާމިކް މިނިސްޓަރު ޑރ ޝަހީމު ވެސް ވަނީ އަރަބި އިސްލާމީ ގައުމުތަކާއި ޕީޕީއެމް-ޕީއެންސީ ކޯލިޝަންގެ ވެރިކަމުގައި ގާތް ގުޅުމެއް އުފައްދާނެކަމަށް ވައުދުވެވަޑައިގެންފަ އެވެ. ޑރ ޝަހީމު ވަނީ އަރަބި އިސްލާމީ ޤައުމުތަކުގެ ރައްޔިތުން ކައިގެން ތިބިހާ ހިނދަކު ދިވެހީން ބަނޑަށް ނުޖެހޭނެ ކަމަށާއި، އެ ގައުމުތަކުގެ އެހީތެރިކަން ދިވެހީންނަށް ލިބިގެންދާނެ ކަމުގެ ޔަގީންކަން ދެއްވާފަ އެވެ.