ރައީސް ޞާލިޙަކީ މުޅި ރާއްޖޭގައިވެސް ހުރި އެންމެ ވަރުގަދަ ސިޔާސީ ތަޖުރިބާކާރު: ޢިމްރާން

ރައީސް އިބްރާހިމް މުޙައްމަދު ޞާލިޙަކީ މުޅި ރާއްޖޭގައިވެސް ހުންނެވި ސިޔާސީ އެންމެ ވަރުގަދަ ތަޖުރިބާކާރު ކަމަށް ދާޚިލީ ވަޒީރު ޢިމްރާން އަބްދުالله ވިދާޅުވެއްޖެއެވެ.

ޢިމްރާން މިހެން ވިދާޅުވީ ރޭ ޅ.ހިންނަވަރުގައި ބޭއްވި ރިޔާސީ ކެމްޕޭނު ޖަލްސާގައި ވާހަކަދައްކަވަމުންނެވެ.

ޢިމްރާން ވިދާޅުވީ ރައީސް ޞާލިޙާއި އެކު މަސައްކަތް ކުރައްވާތާ ވަރަށް ދުވަސް ވެއްޖެ ކަމަށާއި، ވޭދުވެދިޔަ ވެރިންގެ ވެރިކަންތަކާއި ޚިލާފަށް މިވެރިކަމުގައި ރާއްޖޭގެ ހުރިހާ ރަށެއް ބާރު ސްޕީޑްގައި ތަރައްޤީ  ގެންވަމުންދާތީ، އަސްލު އެވާގޮތަކީ ކޮބައިކަން ހިތަށް އަރާކަމަށެވެ.

"މިއަދު މިރަށަށް އަރައިގެން އައިސް މިމަންޒަރުތައް ރީތިކޮށް ފެނިލީމަ މިއަދު ވަކިން ބޮޑަށް އިޙްސާސް ކުރެވިއްޖެ، އަތޮޅު ތެރޭގެ އާދައިގެ ރަށަކަށް އުފަން، އެރަށުގައި ދިރިއުޅެ އާއިލާއާއި އެކު ބޮޑުވެ، ގާތްކަމާއި ލޯތްބާއި ކުލުނު އިޙްސާސްކުރެވި، ރައްޔިތުންގެ ވިންދު ރަނގަޅަށް ހިތުގަ ޖަހާ، އެއަށްފަހުގަ މާލެ ވަޑައިގެން ކިޔަވައި ވިދާޅުވެ، ރާއްޖޭގެ އިޤްތިޞާދީ އުފެއްދުންތެރިކަން އެންމެ ވަރުގަދަ އެއް އާއިލާއާއި ގުޅިވަޑައިގެން އެބޭފުޅުންނާއި އެކު ތަޖުރިބާ ހޯއްދަވައި، ރާއްޖެއިން ބޭރަށް ދަތުރުކުރައްވާ އެންމެނާއި އެކުގައި މަސައްކަތް ކުރައްވައި، މަޖިލީހުގައި 25 އަހަރު މަސައްކަތް ކުރެއްވުމަށް ފަހު ވަޑައިގެން ވެރިކަމަށް އިށީނދެވަޑައިގަތީމަ ދެން އެނގޭ މިރާއްޖޭގަ ކުރިއަށްދާން، އެނގޭ މިރާއްޖެ ތަރައްޤީ ކުރަން، އެނގޭ މިރާއްޖޭގެ ރައްޔިތުންނަށް އަޅާލަން"

ދާޚީލީ ވަޒީރު ޢިމްރާން އަބްދުالله

ޢިމްރާން ވިދާޅުވީ މިކަންކަމާއި ވާދަ ނުކުރެވޭނެ ކަމަށާއި ރައީސް ޞާލިޙަކީ 8 ކެންޑިޑޭޓުންގެ ތެރެއިން އެންމެ ސިޔާސީ ތަޖްރިބާކާރު ކެންޑިޑޭޓު ނޫން ކަމަށާއި ރައީސް ޞާލިޙަކީ މުޅި ރާއްޖޭގައި ހުރި އެންމެ ވަރުގަދަ ސިޔާސީ ތަޖުރިބާކާރު ކަމަށެވެ.

ޢިމްރާން ވިދާޅުވީ އެހެން ވިދާޅުވުމުން ބައެއް ބޭފުޅުން ހިތްޕުޅުގައި ޖެހިގެން ޖަލްސާ ނިމުމުން އެއްޗެއް ވިދާޅުވެދާނެ ކަމަށެވެ.

"އިސްލާޙީ މަސައްކަތުގައި އެންމެ ދަތި މަރުޙަލާއިން ފެށިގެން، އެންމެ ގޮންޖެހުން ބޮޑު ދުވަސްތަކުން ފެށިގެން މިއަމާން އައްސޭރިއާއި ހަމައަށް މިގެނެސްދިނީ މިޚިކްމަތްތެރިކަމާއި ވިސްނުމާއި ކެތްތެރިކަމާއި ފިކުރުއިސްކުރީމަ މިކަންމިކުރެވުނީ"

ދާޚީލީ ވަޒީރު ޢިމްރާން އަބްދުالله

ޢިމްރާން ވިދާޅުވީ މިރާއްޖޭގައި ވެރިކަން ކުރެވޭނީ މިރައީސް އަށް ކަމަށެވެ.

ހިންނަވަރުގައި ބޭއްވުނު ޖަލްސާގައި އިދިކޮޅު ކޯލިޝަންގެ ގިނަ އިސްވެރިންތަކެއް ވަނީ ބައިވެރިވެފައެވެ.