ހާލުގައި ޖެހޭ ކޮންމެ ފަހަރަކު ޕާކިސްތާނުގެ އެހީތެރިކަން ލިބޭ، މިއީ އިހުސާސްތެރިކަން އަދާކުރަންވީ ވަގުތު: ފައްޔާޒު

ދިވެހިރާއްޖެ އަވައްޓެރި ގައުމުތަކުގެ އެހީތެރިކަމަށް ބޭނުންވާ ކޮންމެ ފަހަރަކު ޕާކިސްތާނުގެ އެހީތެރިކަން ދިވެހިންނަށް ލިބޭކަމަށާއި، މިއަދު އެ ގައުމަށް ދިވެހިންގެ އެހީތެރިކަން ބޭނުންވެފައިވާއިރު، މި ވަގުތަކީ އިހުސާންތެރިކަން އަދާކުރަންވީ ވަގުތުކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ޕާކިސްތާނަށް ބޯކޮށް ވާރޭވެހި ފެންބޮޑުވުމުގެ ސަބަބުން ހާލުގައި ޖެހުނު މީހުންނަށް އެހީތެރިވުމަށް ބާއްވާ "ހެލްޕް ޕާކިސްތާން" ޓެލެތޯން ފެށުމަށް ބޭއްވި ޚައްސަ ހަފްލާގައި ވާހަކަދައްކަވަމުންނެވެ.

އެ ހަފްލާގައި ވާހަކަދައްކަވަމުން އިކޮނޮމިކް މިނިސްޓަރު ވަނީ ތާރީހުގައި ޕާކިސްތާނުން ދިވެހިންނަށް ފޯރުކޮށްދީފައިވާ ދީލަތި އެހީތަކަށް އަލިއަޅުވާލައްވާފައެވެ. އަދި ދެ ގައުމުގެ ޒަމާންވީ ރަހުމަތްތެރިކަމަށްވެސް އަލިއަޅުވާލައްވާފައެވެ.

ފައްޔާޒު ވިދާޅުވީ ޕާކިސްތާނަކީ ރާއްޖޭގެ ސިއްހީ ދާއިރާއާއި ތައުލީމީ ދާއިރާ ކުރިއެރުވުމަށް މުހިންމު ޚިދުމަތްތަކެއް ކޮށްދެމުން އަންނަ ގައުމެއްކަމަށެވެ. އޭގެތެރޭގައި ދިވެހި ދަރިވަރުންނަށް ކިޔެވުމުގެ ފުރުސަތުތައް އެ ގައުމުން ފަހިކޮށްދެމުން ދިއުމާއި، ކޯވިޑް ނަވާރައިގެ ހައްސާސް ދަނޑިވަޅުގައި އެ ގައުމުން ވެ ދެއްވާފައިވާ އެހީތެރިކަން މިނިސްޓަރު ފާހަގަކުރެއްވިއެވެ.

މިނިސްޓަރ ފައްޔާޟް ވިދާޅުވީ، ޕާކިސްތާނަށް މިހާރު ކުރިމަތިވެފައިވަނީ މިއިން ޒަމާނަކު އެ ޤައުމު ދެކިފައިނުވާ ފަދަ ހިތްދަތި ޙާލަތެއް ކަމަށެވެ. ބޯކޮށް ވާރޭވެހި ފެންބޮޑުވުމުގެ ސަބަބުން މުޅި ޤައުމު ސުންނާފަތިވެފައިވާކަން ފާހަގަކުރައްވާ މިނިސްޓަރ ވިދާޅުވީ، މިއީ ޕާކިސްތާނުން ރާއްޖެއަށް ވެދިން އެހީތެރިކަން ހަނދާންކޮށް، ދިވެހިން ޕާކިސްތާނަށް އެހީވާންވީ ވަގުތުކަމަށެވެ.

ކޮންމެ މީހަކުވެސް އެމީހަކަށް ވެވުނު މިންވަރަކުން އަވައްޓެރި ޕާކިސްތާނުގެ ރައްޔިތުންނަށް އެހީތެރިކަން ފޯރުކޮށްދިނުމަށް ފައްޔާޒު ވަނީ އެދިވަޑައިގެންފައެވެ. އަދި ދިވެހިންގެ ހެޔޮ ދުއާ އަބަދުވެސް ޕާކިސްތާނުގެ ރައްޔިތުންނާއި އެކުގައި ވާނެކަމަށް މިނިސްޓަރު ވިދާޅުވިއެވެ.

ބޯކޮށް ވާރޭ ވެހުމުގެ ސަބަބުން ޕާކިސްތާނަށް ލިބުނު ގެއްލުންތަކުން އަރައިގަތުމަށް އެހީތެރިކަން ފޯރުކޮށްދިނުމަށް "ހެލްޕް ޕާކިސްތާނު" ގެ ނަމުގައި ޚާއްސަ ޓެލެތޯންއެއް ފަށާފައިވާއިރު، އެއީ ރާއްޖޭގައި ހުންނަ ޕާކިސްތާނުގެ ހައި ކޮމިޝަނާއި، ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަނުން އިސްނަގައިގެން، ދަޢުލަތުގެ މީޑިއާ، ޕަބްލިކް ސަރވިސް މީޑިއާ، ޕީ.އެސް.އެމްއާއި ރާއްޖޭގެ މީޑިއާތައް ގުޅިގެން ކުރިއަށްގެންދާ ހަރަކާތެއްކަން ފާހަގަކޮށްލެވެއެވެ.

"ހެލްޕް ޕާކިސްތާން" ޓެލެތޯނަކީ ޕާކިސްތާނުގެ ރައްޔިތުންނަށް އެހީތެރިވުމަށް ހިންގާ ހަރަކާތްތަކުގެ ފެށުމެއްކަމަށާއި، ޓެލެތޯން އެއް ދުވަހަށް ކުރިއަށްގެންދިޔަ ނަމަވެސް، ޕާކިސްތާނަށް އެހީވުމަށް އިތުރު ހަރަކާތްތައްވެސް ކުރިއަށްއޮތްތަނުގައި ހިންގާނެކަމަށް ޕާކިސްތާން މޯލްޑިވްސް ފްރެންޑްޝިޕް އެސޯސިއޭޝަނުން ބުނެއެވެ.