ޗައިނާއަކީ ރާއްޖޭގެ ތަރައްގީގެ މުހިންމު ހިއްސާދާރެއް، ދެ ގައުމުގެ ގުޅުން ވަރުގަދަ ކުރާނަން: ރައީސް ޔާމިން

ޗައިނާއަކީ ދިވެހިރާއްޖޭގެ ތަރައްގީގެ މުހިންމު ހިއްސާދާރެއްކަމަށާއި، ދެ ގައުމުގެ ދެމެދުގައި އޮތް ޒަމާންވީ ގުޅުން އިތުރަށް ވަރުގަދަކުރެއްވުމުގެ މަސައްކަތްޕުޅު ކުރައްވާނެކަމަށް ވާދަވެރި ސިޔާސީ ލީޑަރު އަދި ކުރީގެ ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޗައިނާގެ 73 ވަނަ ގައުމީ ދުވަހުގެ މުނާސަބަތާ ގުޅިގެން އެގައުމުގެ ރައީސް ޒީ ޖިންޕިންގް އަށް ފޮނުއްވި ތަހުނިޔާގެ މެސެޖެއްގައެވެ. އެ ތަހުނިޔާގައި އިދިކޮޅު އިއްތިހާދުގެ ލީޑަރިސްއާއި އާންމު މެމްބަރުންގެ ހެޔޮ އެދުންތައްވެސް ވަނީ އަރިސްކުރައްވާކަމަށް ވިދާޅުވެފައިވެއެވެ.

ދިވެހިރާއްޖެއާއި ޗައިނާއާއި ދެމެދު އޮތް ޒަމާންވީ ގުޅުމަށް އަލިއަޅުވާލައްވާ ރައީސް ޔާމީންގެ ތަހުނިޔާ މެސެޖުގައި ވަނީ ދިވެހިރާއްޖެއާއި ޗައިނާއާއި ދެމެދުގައި އޮތް ގުޅުމަށް 50 އަހަރު ފުރިފައިވީނަމަވެސް ޗައިނާއާއެކު މީގެ 600 އަހަރު ކުރިން ގުޅުން އުފެދިފައިވާކަމަށް ތާރީހުގައި ފެންނަން އޮތް ކަމަށެވެ.

ޗައިނާއާއި ދިވެހިރާއްޖެއއި ދެމެދުގައި އުފެދުނު ގުޅުން ވަރުގަދަ ވުމުގެ އަސްލަކީ ޗައިނާއިން ރާއްޖޭގެ ތަރައްގީއާއި ކުރިއެރުމަށް ފޯރުކޮށްދޭ އެހީތެރިކަން ކަމަށް ރައީސް ޔާމީން ވިދާޅުވިއެވެ. އަދި ޗައިނާއަކީ ރާއްޖޭގެ ތަރައްގީގެ މުހިންމު ހިއްސާދާރެއްގެ ގޮތުގައި ގަބޫލުފުޅުކުރައްވާކަމަށް ވިދާޅުވިއެވެ.

އެކަން ފާހަގަކުރައްވާ ރައީސް ޔާމީންގެ އެ މެސެޖުގައިވަނީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެގެން ދިއުމަށް އުންމީދުކުރައްވާކަމަށް ވިދާޅުވެފައެވެ. އަދި އެ މަގަށް މަސައްކަތް ކުރައްވާނެކަމުގެ ޔަގީންކަންވެސް ދެއްވާފައެވެ.

ޗައިނާއާއި ރާއްޖެއާއި ދެމެދު އޮތް ގުޅުން މިހާރަށްވުރެ ވަރުގަދަ ކުރައްވާނެކަމަށް ރައީސް ޔާމީން ވިދާޅުވެފައިވާއިރު، އެމަނިކުފާނުގެ ޒައާމަތުގައި ހިންގި ބިޔަ މަޝްރޫއުތަކަށް ޗައިނާގެ އެހީތެރިކަން ލިބިފައިވާކަން ފާހަގަކޮށްލެވެއެވެ.

އޭގެ ތެރޭގައި ރައީސް ޔާމީންގެ އެންމެ ބޮޑު އެއް ކާމިޔާބީ ކަމަށްވާ މާލެ އާއި ހުޅުމާލެ ގުޅާލަދިން ބްރިޖަކީ ޗައިނާ ސަރުކާރުގެ ވަރަށް ބޮޑު އެހީތެރިކަމެއް ލިބިގެން ދިޔަ މަޝްރޫއެކެވެ. އަދި އެ ބިނާއަކީ ދެ ގައުމުގެ ދެމެދުގައި އޮތް ޒަމާންވީ އެކުވެރިކަން ރަމްޒުކޮށްދޭ ބިނާއެއްގެ ގޮތުގައި ދެ ގައުމުންވެސް ގެންދަނީ ސިފަކުރަމުންނެވެ.