ކޮންމެ ރައްޔިތަކީ އަޅުގަނޑުގެ ކުރިމަތީގައި ހަމަހަމަ ރައްޔިތެއް: ޑރ މުއިއްޒު
ދިވެހި ކޮންމެ ރައްޔިތަކީ އެމަނިކުފާނުގެ ކުރިފުޅުމަތީގައި ހަމަހަމަ ރައްޔިތެއްކަމުގައި ދިވެހިރާއްޖޭގެ އިންތިހާބީ ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
އިއްޔެ ކުރިއަށްދިޔަ ރިޔާސީ އިންތިހާބުގެ ދެވަނަ ބުރުގެ ވޯޓު ކާމިޔާބުވެވަޑައިގެން ރޭ ބޭއްވި ނޫވެސްވެރިންގެ ބައްދަލުވުމުގައި ވާހަކަދައްކަވަމުން ޑރ މުއިއްޒު ވިދާޅުވީ، ކުރިއަށް އޮތީ ރައްޔިތުން އެދޭ ގޮތަށް ރާއްޖޭގެ ކަންކަން ކުރިއަށް ގެންދެވޭނެ ދުވަސްތައް ކަމުގައެވެ.
އަޅުގަނޑުމެންގެ ގައުމުގެ މިނިވަންކަން އިރާދަކުރެއްވިއްޔާ ހިމާޔަތް ކުރެވޭނެ. އަޅުގަނޑުމެންގެ އިގްތިސާދު އިރާދަކުރެއްވިއްޔާ ނަގައި ކޮޅަށް ޖެހޭނެ. އެހެންވީމަ ކުރިއަށް މިއޮތް ދުވަސްތަކަކީ ދިވެހި ލޮބުވެތި ރައްޔިތުން ތި އުންމީދުކުރައްވާ ގޮތަށް ގައުމު ކުރިއަށް ގެންދެވޭނެ ދުވަސްތައް
އިންތިޚާބީ ރައީސް ޑރ މުހައްމަދު މުއިއްޒު
މީގެ އިތުރުން އިންތިޚާބީ ރައީސް ޑރ މުހައްމަދު މުއިއްޒު ވިދާޅުވީ، އެމަނިފާނު ވެ ވަޑައިގަންނަވާނީ އިތުބާރު ދަމަހައްޓަވާ, ބަހާއި އަމަލާ ދިމާވާ، ރާއްޖޭގެ ރައްޔިތުން އެދޭގޮތަށް ކަންކަން ކުރައްވާ ރައީސެއްކަމުގައި ކަމަށެވެ.
ވެރިކަން ބަދަލުވުމުން ގައުމުގެ ހަމަޖެހުން ނަގާލަން މަސައްކަތްކުރާ ބަޔަކުވެސް އުޅޭނެކަން ފާހަގަކުރައްވައި ޑރ. މުއިއްޒު އެދިލެއްވީ ގައުމުގެ ކުރިމަގަށް ހުރަސް އެޅޭފަދަ އެއްވެސް ކަމަކަށް އަދި އެއްވެސް ހަމަނުޖެހުމަކަށް ފުރުސަތު ނުދެއްވުމަށެވެ.
އެމްޑީޕީގެ ރިޔާސީ ކެންޑޑޭޓް ރައީސް އިބްރާހީމް މުހައްމަދު ސޯލިހާ ވާދަކުރައްވައި ޑރ. މުއިއްޒު އިންތިހާބު ކާމިޔާބުކުރެއްވީ 18،000 އަށްވުރެ ގިނަ ވޯޓުގެ ތަފާތާއެކު، ވޯޓުލެވޭ އާބާދީގެ 53.93 ޕަސެންޓު ހޯއްދަވައިގެންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
