ރަޝިޔާ-ޔޫކުރެއިން ހަނގުރާމަ އާއި ގުޅިގެން އިންވެސްޓަރުންގެ ޝައުގުވެރިކަން ބަދަލުވި: މައުސޫމު

ރަޝިޔާ-ޔޫކުރެއިން ހަނގުރާމައާއި ގުޅިގެން ދިވެހިރާއްޖެއަށް އިންވެސްޓުކުުރުމުގެ ޝައުގުވެރިކަން ހުރި އެތައް ފަރާތްތަކެއްގެ ވިސްނުން ބަދަލުވެގެން ދިޔަކަމަށް ފަތުރުވެރިކަމާއި ބެހޭ ވަޒީރު ޑރ މައުސޫމު ވިދާޅުވެއްޖެއެވެ.

މައުސޫމު މިފަދައިން ވިދާޅުވެފައިވަނީ ރާއްޖެއަށް އިންވެސްޓުކުރާ ފަރާތްތަކަށް ރައްކާތެރިކަން ކަށަވަރުކޮށްދިނުމަށް ޓުއަރިޒަމް މިނިސްޓްރީއިން ކުރަމުންދާ މަސައްކަތަކީ ކޮބައިތޯ އައްސަވާ މަޖިލީހުގެ ކާށިދޫ ދާއިރާގެ މެމްބަރު ޖާބިރު ކުރެއްވި ސުވާލަކަށް ޖަވާބުދެއްވަމުންނެވެ.

އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ފަތުރުވެރިކަމުގެ ސިނާއަތު މިއަދަށްވުރެ މާދަން ކުރިއެރުވުމުގެ ވިސްނުން މިނިސްޓްރީއިން އަބަދުވެސް ގެންގުޅޭކަމަށެވެ. އެހެން ނަމަވެސް އިންވެސްޓުމަންޓު ފަނޑު ހޯދުމަށް ބޮޑެތި ގޮންޖެހުންތަކެއް ހުރިކަން މިނިސްޓަރު ފާހަގަކުރެއްވިއެވެ.

އެއާއެކު ވިދާޅުވީ ރަޝިޔާ ޔޫކުރެއިން ހަނގުރާމައިގެން ކުރިން ވަރަށް ގިނަ އިންވެސްޓަރުންގެ ޝައުގުވެރިކަން ރާއްޖެއަށް އަމާޒުވެފައި ހުރިކަމަށެވެ. އެހެން ނަމަވެސް އެ ހަމަނުޖެހުމާއި ގުޅިގެން ވަރަށް ގިނަ ފަރާތްތަކެއްގެ ވިސްނުން ބަދަލުވެގެން ދިޔަކަން މިނިސްޓަރު ފާހަގަކުރެއްވިއެވެ.

" ރަޝިޔާ-ޔޫކުރެއިން ހަނގުރާމް ފެށެން، އެ ކޮންފްލިކްޓް ފެށުން އިރު އޭރު ވަރަށް ގިނަ އިންވެސްޓަރުން ރާއްޖެއަށް ޝައުގު ނަގައިގެން އުޅުނު، އެހެން ނަމަވެސް އެކަމާއި ހެދި ދުނިޔޭގެ މުޅި އިގްތިސާދަށް މި އައި ބަދަލުގައި އަޅުގަނޑުމެންނަށް ތަންކޮޅެއް ދަށްކޮށް އިންވެސްޓަރުންގެ ހަރަކާތްތައް މި ފެންނަނީ"

ޓުއަރިޒަމް މިނިސްޓަރު ޑރ މައުސޫމު

އެކަން ފާހަގަކުރައްވާ މިނިސްޓަރު ވިދާޅުވީ މި ހާލަތުގައި އެންމެ ބޮޑު އަހަންމިއްޔަތުކަމެއް ދޭން ޖެހެނީ ދިވެހި އިންވެސްޓަރުންގެ ދައުރު ފުޅާކުރުމަށްކަމަށެވެ. ބޭރު އިންވެސްޓަރުން ފަތުރުވެރިކަމުގެ ސިނާއަތަށް އިންވެސްޓުކުރުމަށް ބަރޯސާވެއްޖެނަމަ މި ސިނާއަތަކީ ބޭރުގެ އުފެއްދުމެއްކަމަށް ދުނިޔެއިން ގަބޫލުކުރުން ގާތްކަން މިނިސްޓަރު ވިދާޅުވިއެވެ.

ފަތުރުވެރިކަމުގެ ސިނާއަތަކީ ދިވެހިން ވަރަށް ބުރަ މަސައްކަތުން ދުނިޔެއަށް ދެއްކި ސިނާއަތެއްކަމަށް ވާއިރު އެ ގޮތުގައި މި ސިނާއަތު ދެމެހެއްޓުން މުހިންމުކަންވެސް މިނިސްޓަރުގެ ވާހަކަފުޅުގައި ވިދާޅުވިއެވެ.