މި ސަރުކާރުން އެޅި ފްލެޓުތައް ވަކި ބަޔަކަށް ބަހާލަން އުޅޭ މައްސަލަ އޭސީސީއަށް

ރައީސް އިބްރާހިމް މުހައްމަދު ޞާލިހުގެ ސަރުކާރުން ތަރައްގީކުރި 4000 ހައުސިން ޔުނިޓު އެއްވެސް އުސޫލެއް ނެތި ވަކިބަޔަކަށް ބަހާލަން އުޅޭކަމަށް ބުނެ އެ މައްސަލަ ބަލާދިނުމަށް އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށައަޅައިފި އެވެ.

އެ މައްސަލަ ހުށައަޅާފައިވަނީ ބޯހިޔާވަހިކަމުގެ ހައްގު ހޯދައިދިނުމަށް ވަކާލާތު ކުރަމުން އަން އާންމުންގެ އެކުވެރި ގުޅުން ޖަމުއިއްޔާގެ ރައީސް މިދުއަމް ސައުދެވެ.

އެ މައްސަލަ ބަލައިިދިނުމަށް އެދި އޭސީސީއަށް އޭނާ ހުށައެޅި މައްސަލައިގައި ބުނެފައިވަނީ މި ސަރުކާރުން އިއުލާނުކުރި ގެދޮރުވެރިޔާ ސްކީމަށް ކުރިމަތިލީ ފަރާތްތަކުގެ ތެރެއިން ޝަރުތުހަމަވާ އެންމެންނަށް (13000 މީހުންނަށް) ރައީސް ޞާލިހުގެ ސަރުކާރުން ވަނީ ފްލެތު ލިބޭނެކަން އަންގާފައި ކަމަށެވެ.

ރިޔާސީ އިންތިޚާބުގެ ކެމްޕޭނު ތެރޭގައި ގެދޮރުވެރިޔާ މަޝްރޫއަށް ޝަރުތު ހަމަވާ 13000އަށްވުރެ ގިނަ މީހުންނަށް ފްލެޓު ދޭނެކަމަށް ސަރުކާރުން ބުނި ނަމަވެސް މިހާތަނަށް އަޅަން ހަވާލުކުރެވިފައިވަނީ 4000 ފްލެޓުކަން މިދުއަމް ފާހަގަކޮށްފައިވެއެވެ. އެހެންކަމުން 10000 މީހުންނަށް ދޭނެ ފްލެޓު އެޅުމުގެ އެއްވެސް އަމަލީ މަސައްކަތެއް އަދި އެ މަޝްރޫއުގެ ފައިނޭންސް ވެސް ހަމަޖެހިފައި ނުވާކަމަށް އޭނާގެ މައްސަލައިގައި ބުނެފައި ވެއެވެ.

އެހެން އެކަން އޮތްއިރު، މިހާރު އަޅަން ފަށާފައިވާ 4000 ފްލެޓު، ގެދޮރުވެރިޔާ ސްކީމަށް ހުށައެޅި މީހުންގެ ތެރެއިން ވަކި ލިސްޓެއް ކަނޑައަޅައި، އެ ލިސްޓުގައި ތިބި ފަރާތްތަކަށް ދިނުމަށް ތައްޔާރުވަމުން އަންނަކަމށް މިދުއަމް ވަނީ ބުނެފައެވެ.

އޭނާގެ މައްސަލައިގައި ބުނެފައިވަނީ ޝަރުތުހަމަވާ މީހުންގެ ތެރެއިން އެންމެ ފުރަތަމަ ފްލެޓު ލިބޭނެ 4000 މީހުން ކަނޑައެޅުމުގެ އެންމެ އިންސާފުވެރިގޮތަކީ ރާއްޖޭގއި އަބަދުވެސް ކަންކުރަމުންދާ ގޮތަށް ޕޮއިންޓުތަކަށް ބަލައި، ޕޮއިންޓު ތަރުތީބަށް އިސްކަން ދީގެން ފްލެޓު ހަވާލުކުރުން ކަމަށެވެ.

އެހެން ނަމަވެސް، މި ސަރުކާރުން ފްލެޓު ލިބޭނެކަމަށް ކަނޑައެޅި މީހުންގެ ލިސްޓު އަދި ލިބުނު ޕޮއިންޓު އާންމުކޮށްފައި ނުވާކަން އޭސީސީއަށް ހުށައެޅި މައްސަލައިގައި ފާހަގަކޮށްފައި ވެއެވެ. އަދި ހަމައެއާއެކު ފްލެޓު ހަވާލުކުރާނީ ދިރިއުޅުމުގެ ހާލަތަށް ބަލާފައިކަމަށް ސަރުކާރުން ބުނެފައިވީ ނަމަވެސް، ފެލްޓު ލިބޭނެކަމަށް ކަނޑައެޅި އެންމެންގެ ދިރިއުޅުމުގެ ހާލަތު ބަލަން ގޮސްފައިވެސް ނުވާކަން އެ މައްސަލައިގައި ވަނީ ބަޔާންކޮށްފަ އެވެ.

އަދި ހަމައެއާއެކު ގެދޮރުވެރިޔާ ސްކީމަށް ކުރިމަތިލި މީހުންގެ ތެރެއިން 13000އަށް ވުރެ ގިނަ މީހުން ޝަރުތު ހަމަވާއިރު، 4000 މީހުންނަށް ފްލެޓުދޭން ކަނޑައެޅި އުސޫލެއްވެސް ހާމަކޮށްފައި ނުވާކަން އޭނާ ފާހަގަކޮށްފައި ވެއެވެ.

އެކަންކަން ފާހަގަކޮށް އޭނާ ވަނީ ގެދޮރުވެރިޔާ ސްކީމަށް 13000 އަށް ވުރެ ގިނަ މީހުން ޝަރުތުހަމަވާއިރު، އެ މަޝްރޫއުގެ ތެރެއިން އަމަލީ މަސައްކަތް ފަށާފައިވާ 4000 ފެލްޓު ދޭނެ މީހުން ސަރުކާރުން އާންމު ނުކުރާ ސިއްރު އުސޫލެއްގެ ތެރެއިން އާންމުކޮށް އެކަން ކުރާ އުސޫލުތަކާއި ޚިލާފަށް ޝަރުތުހަމަވާ އެންމެންގެ ހާލަތު ބަލާ ނުނިންމާ އިންތިގާލީ މަރުހަލާގެ ފަހު ދުވަސްކޮޅު އިންސާފުވެރިކޮށް ކަނޑައެޅޭނެ އެއްވެސް ގޮތެއް ނޯންނާނެ ކަމަށެވެ.

އަދި މި ގޮތަށް ފެލްޓުތަށް ބަހާލުމަކީ އެ މައްސަލަތައް ބަލާ ހައްލުކުރުމުގައި އަންނަން އޮތް ސަރުކާރަށް ވެސް ބޮޑެތި ގޮންޖެހުންތަކާއި ކުރިމަތިލާން ޖެހޭނެ ކަމެއްކަން މިދުއަމްގެ މައްސަލައިގައި ފާހަގަކޮށްފައި ވެއެވެ.

އެހެންކަމުން އުސޫލުތަކާއި ޚިލާފަށް ފްލެޓުތައް ބަހާލުމަކީ 13000 އަށްވުރެ ގިނަ މީހުންގެ ހައްގުތަކަށް އަރައިގަތުންކަމަށް ވާތީ، އެ މައްސަލަ އެންޓި ކޮރަޕްޝަން ކޮމިޝަނުން ބަލައިދިނުމަށް ވަނީ ހުށައަޅާފަ އެވެ.