ވަޒީރު ސައީދު މިދިޔަ ސަރުކާރަށް: ކޮވިޑުގައި ހިލޭ އެހީގެ ގޮތުގައި ލިބުން 4 ބިލިޔަން ރުފިޔާ ކޮބާ؟

ކޮވިޑް 19 ގެ ބަލިމަޑުކަމުގެ ތެރޭގައި މިދިޔަ ސަރުކާރަށް ހިލޭ އެހީގެ ގޮތުގައި އެކި އެކި ބޭންކު ތަކުންނާއި ޖަމިއްޔާތައް އަދި ގައުމުތަކުން ލިބުނު 4 ބިލިއަން ރުފިޔާއަށް ވީގޮތެއް ނޭނގޭކަމަށް އގްތިޞާދީ ތަރައްގީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

"ހަފްތާ52"ގެ ނަމުގައި ކުރިއަށްގެންދިޔަ ހާއްސަ ޕެނަލް ޑިސްކަޝަންއެއްގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، ކޮވިޑާއި ގުޅިގެން ރާއްޖޭގެ ހާލަތު މެނޭޖު ކުރުމަށްޓަކައި، އެކި ފަރާތްތަކުން ހިލޭ އެހީގެ ގޮތުގައި 565 މިލިޔަން ޑޮލަރު ނުވަތަ 8.7 ބިލިޔަން ރުފިޔާގެ ހިލޭ އެހީ ދިން ކަމަށެވެ.

އެހެންނަމަވެސް، މިދިޔަ ސަރުކާރުގެ އެކްސްޕެންޑިޗަރ ރިޕޯޓްތަކުން ދައްކާގޮތުގައި، ކޮވިޑާއި ގުޅިގެން ހޭދަކޮށްފައިވަނީ  4.2 ބިލިޔަން ރުފިޔާ ކަމަށާއި، އަނެއް 4 ބިލިޔަން ރުފިޔާއަށް ވީނުވީއެއް ނޭނގޭ ކަމަށް ވަޒީރު ސައީދު ވިދާޅުވިއެވެ.

މިކަން ފާހަގަކުރައްވާ ވަޒީރު ސައީދު ވިދާޅުވީ، އެ ފައިސާއަށް ވީ ގޮތާއި އެ ފައިސާ ލިބުނު އެކައުންޓްތައް ނުބެލޭކަމަށްވާނަމަ،  ރައްޔިތުންގެ އިތުބާރު އެބަޔަކާ ދޭތެރޭގައި ގެއްލިގެންދާތަން މާޒީގައި ފެނިފައިވާކަމަށާއި، ދައުލަތުން ވައްކަން ކޮށްފިކަމަށްވާނަމަ އެކަން ބެލޭނެ ޖާގަ މިއަދު އެބައޮތްކަމަށެވެ.

"އަޅުގަނޑުގެ ސުވާލަކީ ކޮބާހޭ ކޯވިޑަށް ލިބުނު އަނެއް 4 ބިލިޔަން ރުފިޔާ. އެ ފައިސާއަށް ވީ ގޮތާއި ކޮންބައެއްގެ އެކައުންޓްތަކަކަށްތޯ، އެ ފައިސާ ދިޔައީ ނުބެލޭކަމަށްވަންޏާ ރައްޔިތުންގެ އިތުބާރު އެބަޔަކާ ދޭތެރޭގައި ގެއްލިގެންދާތަން މާޒީގައި ފެނިފައި އޮތީ. ދައުލަތުން ވައްކަން ކޮށްފިކަމަށްވާނަމަ އެކަން ބެލޭނެ ޖާގަ މިއަދު އެބައޮތް،"

ވަޒީރު ސައީދު ވިދާޅުވިއެވެ.

މިއާއިއެކު، ވަޒީރު ސައީދު ވިދާޅުވީ، ކޮވިޑާ ބެހޭ އޮޑިޓެއް ސަރުކާރުން ހަދަމުންދާ ކަމަށާއި އެ އޮޑިޓް ނިމުމުން ކުރީ ސަރުކާރުން ވެފައިވާ ޚިޔާނާތުގެ ތަފްޞީލު އެނގިގެންދާނެކަމަށެވެ.