ހޯޕް ކޮންފަރެންސްއަކީ ރިޔާސީ އިންތިޚާބުގެ ކެމްޕެއިންގެ ފެށުން:ހީނާ

އިދިކޮޅު ކޯލިޝަންއިން މާދަމައިން ފެށިގެން ހޮނިހިރު ދުވަހުގެ ނިޔަލަށް ބޭއްވުމަށް ހަމަ ޖެހިފައިވާ "ހޯޕް" ކޮންފަރެންސްއަކީ ރިޔާސީ އިންތިޚާބަށް ކެމްޕެއިން ކުރުމުގެ ފެށުން ކަމަށް ޕީޕީއެމްގެ ތަރުޖަމާން ހީނާ ވަލީދް ވިދާޅުވެއްޖެއެވެ.

ހޯޕް ކޮންފަރެންސް އާއި ގުޅޭ ގޮތުން "ވޮއިސް" އަށް ދެއްވި ބަސްދީގަތުމެއްގައި ހީނާ ވަނީ މިއަދު 13:30 އިން ފެށިގެން މިމަހުގެ 4 ވަނަ ދުވަހަށް ދަރުބާރުގޭގައި ކުރިއަށްދާ، މި ކޮސްފަރެންސް އަކީ މިހާތަނަށް ބޭއްވޭ އެންމެ ބޮޑު ކޮންފަރެންސް ކަމަށް ފާހަގަކޮށް މިކަމަށް ވާން ޖެހޭ ތައްޔާރީތައް ވަމުން ދާކަމަށް ވިދާޅުވެފައެވެ.

އެގޮތުން މިއަދު މެންދުރު ފަހު ދަރުބާރުގޭގައި ބޭއްވުމަށް ހަމަޖެހިފައިވާ ކޮންފަރެންސްގައި 1000 އަށް ވުރެ ގިނަ ބޭފުޅުން ބައިވެރިވެ ވަޑާއިގަންނަވާނެ ކަމަށް ހީނާ ވިދާޅުވިއެވެ.

މީގެ ތެރޭގައި ދާއިރާ ރައީސުންނާއި، ދާއިރާ ނައިބު ރައީސުންނާއި، ޒުވާނުންގެ ރައީސުންނާއި، އަންހެނުންގެ ރައީސުންނާއި، ސެނެޓަރުންނާއި، ކައުންސިލަރުން އަދި ޑަބްލިއުޑީސީ މެމްބަރުން ހިމެނޭ ކަމަށް ހީނާ ވިދާޅުވިއެވެ. އަދި މީގެ ތެރެއިން ގިނަ ބައިވެރިން މާލެ އައިސްފައިވާ ކަމަށް ވެސް ހީނާ ވަނީ ފާހަގަ ކޮށްފައެވެ.

މިއާއިއެކު ހީނާ ވިދާޅުވެފައިވަނީ މި ކޮންފަރެންސްއަކީ މި އަހަރު ސެޕްޓެމްބަރު މަހު ބޭއްވޭ ރިޔާސީ އިންތިޚާބުގައި ވާދަކުރެއްވުމަށް ޕީޕީއެމްގެ ރައީސް ޔާމީން އަބްދުލްގައްޔޫމްއަށް ކެމްޕެއިންކުރުމުގެ ފެށުން ކަމަށެވެ. އަދި މިކަމާއި ގުޅިގެން ދޭންޖެހޭ މެސެޖްތަކާއި ރަށްރަށުން ވާން ޖެހޭ ތައްޔާރީތައް ފެށުން ކަމަށެވެ. އަދި މި ކޮންފަރެންސްގައި ދިވެހިރާއްޖެއަށް ކުރިމަތިވެފައިވާ ގޮންޖެހުންތަކާއި ބެހޭގޮތުން ވާހަކަ ދެކެވިގެން ދާނެ ކަމަށްވެސް ހީނާ ވަނީ ވިދާޅުވެފައެވެ.

ކޮންފަރެންސް ނިންމުމަށްފަހު ބައިވެރިން އަނބުރާ ރަށްރަށަށް ވަޑައިގަތުމާއިއެކު އިންތިޚާބަށް ކެމްޕެއިން ކުރުމުގެ މަސައްކަތް ފެށިގެން ދާނެ ކަމަށް ވަނީ ފާަހަގަކުރައްވާފައެވެ.

މިއަދުގެ ކޮންފަރެންސްގެ އިތުރުން ހުކުރު ދުވަހުގެ ހަވީރު ވަނީ "ބުންވަރު" ގެ ނަމުގައި ހިނގާލުމެއް ބޭއްވުމަށް ހަމަ ޖެހިފައެވެ. މިކަމާއި ގުޅިގެން ހީނާ ފާހަގަ ކުރައްވާފައިވަނީ މި ހިނގާލުމުގައި ގިނަ އަދަދެއްގެ މީހުން ބައިވެރިވާނެ ކަމަށެވެ.

އަދި ހިނގާލުމަށްފަހު ގައުމީ ކޮންފަރެންސް ނިންމާލުމަށްޓަކައި އާޓިފިޝަލް ބީޗް ސަރަހައްދުގައި ހޮނިހިރު ދުވަހުގެ ރޭ "ދުއްޕާން" ގެ ނަމުގައި ޖަލްސާ ބޭއްވުމަށްވެސް ވަނީ ހަމަޖެހިފައެވެ.