ޖަލަށް ލައިގެން މިއުޅެނީ ރައީސް ޔާމީން އެއް ނޫން؛ ޖަލަށް ލައިގެން މިއުޅެނީ މިނިވަންކަން: އަބްދުއްރަހީމް

ޖަލަށް ލައިގެން މިއުޅެނީ އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ނޫން ކަމަށާ، ޖަލަށް ލައިގެން މިއުޅެނީ ދިވެހިންގެ މިނިވަންކަން ކަމަށް ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

މިއަދު ފެށުނު އިދިކޮޅު އިއްތިހާދުގެ ބޮޑު މަހާސިންތާ "ހޯޕް ކޮންފަރެންސް" އިފްތިތާހުކުރައްވައި ވާހަކަ ދައްކަވަމުން އަދުރޭ ވަނީ ރައީސް ޔާމީން އެމަނިކުފާނުގެ ސަޕޯޓަރުންނަށާއި، ގައުމު ދެކެ ލޯބިވާ އެންމެހައި ރައްޔިތުންގެ ކިބައިން އެދިލައްވާ އެދިލެއްވުންތައް ހާމަކޮށްދެއްވާފައެވެ. އެގޮތުން، އެމަނިކުފާނު ޖަލުގައި އިންނެވި ނަމަވެސް މާޔޫސް ނުވުމަށާއި، ދިވެހިންގެ މިނިވަންކަން ދިވެހިންގެ އަތުން ފޭރިގެންދާއިރު މަޑުން ނުތިބުމަށް އެދިވަޑައިގެންފައިވާ ކަމަށް އަދުރޭ ވިދާޅުވިއެވެ.

"މި ކޮންފަރެންސް އަކީ އުފާވެރި ކޮންފަރެންސް އެއް ކަމަށް އަޅުގަނޑަށް ދެންނެވިދާނެ ކަށް ނެތް. މި ކޮންފަރެންސް އުފާވެރި ނުވީ މިއަދު މިއޮތް ސަރުކާރުގެ އަނިޔާވެރި ކަމުން. ނުބައި ނުލަފާ ކަމާއި ހުރެ. ގޮތެއް ފޮތެއް ނެތުމުގެ ސަބަބުން."

އަބްދުއްރަހީމް

މިސަރުކާރުން ރައީސް ޔާމީން އަށް އަނީޔާވެރި ވަމުންދާ ސަބަބެއް ކަމަށް އަދުރޭ ވިދާޅުވީ، އެމަނިކުފާނު ދިވެހިރާއްޖެއަށް ހޯދައިދެއްވި ފުދުންތެރި ކަމާއި ކެރުންތެރިކަމުގެ އިތުރުން ދިވެހިއްޔަތުގެ ސަބަބުން ކަމަށެވެ.

މިއާއެކު އަދުރޭ ވިދާޅުވީ މި ސަރުކާރުން ޖަލަށް ލައިގެން އުޅެނީ ރައީސް ޔާމީން ނޫންކަމަށާއި ޖަލަށް ލައިގެން އުޅެނީ ރާއްޖޭގެ މިނިވަންކަންކަމަށެވެ.

"ޖަލަށް ލައިގެން މި އުޅެނީ ދިވެހި ޒުވާނުން މާދަމައަށް ކުރަމުން ގެންދާ އުންމީދު، ޖަލަށް ލައިގެން މި އުޅެނީ ދިވެހުން ދިވެހި ގައުމާ ދޭތެރޭ ކުރަމުން ގެންދާ އުންމީދު، މާތްވެގެންވާ އިސްލާމް ދީނާއި ދިވެހި ގައުމިއްޔަތުގެ ހުޅުކޮޅު، މާދަމާގެ ކުޑަކުދިންގެ ހުވަފެން، މިއަދު ދިރިތިބީން އެބައެއްގެ ހިތުގައި މިހާތަނަށް ދިވެހި ގައުމުގެ ވެރިއަކަށް ނުދޭ ފަދަ ގަދަރާއި އިހްތިރާމް ދެއްވާފައިވާ ހުރި ދިވެހިރާއްޖޭގެ ވަތަނީ ސިޔާސީ ލީޑަރު" އަދުރޭ ވިދާޅުވިއެވެ.

މީގެއިތުރުން އަދުރޭ ވިދާޅުވީ ރައީސް ޔާމީން ވެރިކަމަށް ވަޑައިގެން ގޮނޑީގައި އިށިނދެ ވަޑައިގަންނަވާއިރު 5 އަހަރު ދުވަސް ވާއިރު އެމަނިކުފާނު ހާސިލް ކުރަން ބޭނުންވާ ލަނޑުދަނޑި ކުރިމަތީގައި އޮންނަކަމަށާއި އެއަށް ވާސިލްވާނެ ގޮތް އެމަނިކުފާނަށް އެނގިވަޑައިގަންނަވާކަމަށެވެ.

"ބަޔަކަށް އަޅުދާސްތުވެގެން ބަޔަކަށް ސަލާން ޖަހައިގެން ބަޔަކު ކައިރީގައި ރޮއެ ހޭރިގެން ކަންކަން ކުރަން ހުރުމަކީ ރައީސް ޔާމީންގެ ސިޔާސަތެއް ނޫން" އަދުރޭ ވިދާޅުވިއެވެ.