ޗާގޯސްގެ ކަނޑުން މިހާރުވެސް ދާ ޖަހައިގެން މަސް ނަގަމުން ދަނީ: ހުސައިން

ފުށުއަރާ ޗާގޯސްގެ ކަނޑުގެ ސަރަހައްދު މޮރިޝަސްއަށް ލިބުމާއެކު، މިހާރުވެސް އެ ސަރަހައްދުން ދާ ޖަހައިގެން މަސް ނަގަން ފަށައިފި ކަމަށް ވިދާޅުވެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ކަންބޮޑުވުން ފާޅުކުރައްވައިފިއެވެ.

ސެމްބެ މިއަދު ކުރެއްވި ޓުވީޓެއްގައި، ޗާގޯސް ކަނޑު ސަރަހައްދު ގެ މެރިން ޓްރެފިކް އެޕުގެ ސްކްރީން ޝޮޓެއް ހިއްސާ ކުރައްވައި ވިދާޅުވީ އެ ސަރަހައްދުގައި ދާ ޖަހައިގެން މިހާރުވެސް މަސްވެރިކަން ކުރަމުންދާކަމަށެވެ.

"މެރިން ޓްރެފިކް އެޕުން މިހާރުވެސް ލައިވްކޮށް ފެންނަނީ މި މަންޒަރު ސާފުކޮށް. ދާ ޖަހައިގެން މަސް ނަގަމުން މިދަނީ. މި ވެރިކަން ނިންމަން ހިނދުކޮޅެއް ލަސްކުރަން ތިބެވޭކަށް ނެތް،" ސެމްބެ ވިދާޅުވި އެވެ.

ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮތް އިރު، އެ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށް އިޓްލޮސް އިން ވަނީ ހުކުމް ކޮށްފައެވެ.

މޮރިޝަސްއަށް ލިބުނު ސަރަހައްދުން ދާ އަޅައިގެން މަސްވެރިކަން ކުރާނެ ކަމަށާ، އޭގެ ސަބަބުން ދިވެހި މަސްވެރިކަމަށް ގެއްލުން ވާނެ ކަމަށް މަސްވެރިންނާއި އިދިކޮޅު ފަރާތްތަކުން މީގެ ކުރިންވެސް ވަނީ ފާހަގަ ކޮށްފައެވެ.