އެމްއާރުއެމުން ސަރުކާރު ކޯލިޝަންގައި އޮވެގެން ކުރަނީ ޖެއްސުން: ޝަރީފް
ކުރީގެ ރައީސް މައުމޫނު އަބްދުލްގައްޔޫމުގެ މޯލްޑިވްސް ރިފޯމް މޫވްމެންޓު(އެމްއާރުއެމް) ސަރުކާރު ކޯލިޝަންގައި އޮވެގެން ކުރަނީ ޖެއްސުންކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައިވަނީ ސަރުކާރު ހިންގާ މައި ޕާޓީ އެމްޑީޕީއާއި އެމްއާރުއެމާ އެއްކޮށް މަޝްވަރާތަކެއް ކުރަން ފަށާފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.
އެގޮތުން ޝަރީފު ވިދާޅުވީ ސަރުކާރު ކޯލިޝަންގެ ހިއްސާދާރެއްގެ ގޮތުގައި އެމްއާރުއެމް މިހާތަނަށް ދެމިއޮތީ ވަކި ބޭނުމެއްގައި ކަމަށް ބެލެވޭ ކަމަށެވެ. ކޯލިޝަން ޕާޓުނަރެއްގެ ގޮތުގައި އޮވެގެން އެމްއާރުއެމުން ގެންދަނީ ސަރުކާރަށް ޖެއްސުން ކުރަމުން ކަމަށާއި، އަދި ސަރުކާރާއި ދެކޮޅަށް މަސައްކަތް ކުރަމުންކަން އޭނާ ފާހަގަކުރެއްވި އެވެ.
އެއާއެކު ޝަރީފު ވަނީ އެމްއާރުއެމްގެ ސްލޮޓުތަކުގައި ސަރުކާރުގެ ސިޔާސީ މަޤާމުތަކުގެ ތިބި ފަރާތްތައް ސަރުކާރުން ބޭރުކުރުމަށް ގޮވާލައްވާފަ އެވެ.
"އެމްއާރުއެމް ކޯލިޝަން އެމްޑީޕީއާއެކު އޮތީ ވަކި ބޭނުމަކު. ސަރުކާރުގައި ތިބެގެން ކުރަނީ ސަރުކާރަށް ޖެއްސުން. ސިޔާސީ މަޤާމުތަކުގައި ތިބި އެމްއާރުއެމްގެ ވަކި ކޯލިޝަނުން އެމްއާރުއެމް ބޭރުކޮށްލަން ގޮވާލަން"
މަރަދޫ ދާއިރާގެ މެމްބަރު އިބްރާހިމް ޝަރީފް
ޝަރީފު ވަނީ މީގެ ކުރިންވެސް އެމްއާރުއެމްއަށް ނިސްބަތްކޮށް މިފަދަ މޭރުމުން ވާހަކަދައްކަވާފަ އެވެ.
އެގޮތުން އޭރު ޝަރީފު ވަނީ ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ތާއީދު ނުކުރާކަމަށް ވާނަމަ އަވަހަށް އެމްޑީޕީއާއެކު ހަދާފައިވާ ކޯލިޝަން ރޫޅާލުމަށް އެ ޕާޓީއަށް ގޮވާލައްވާފަ އެވެ.
އަދި ޝަރީފު ވިދާޅުވީ ރައީސް ޞާލިހާއެކު ކޯލިޝަން ހެދިކަމުގައި ވިޔަސް ކުރީގެ ރައީސް މައުމޫނުގެ ދަރިކަލުން ފާރިޝް މައުމޫނަށް ނައިބުރައީސްކަން ދޭނެކަމަށް އެ ޕާޓީން ދެކިގެން ނުވާނެ ކަމަށެވެ.
އެމްޑީޕީގެ ބައެއް މެމްބަރުން އެމްއާރުއެމަށް ފާޑުކިޔުން އަމާޒުކުރަމުން ދިޔަ ނަމަވެސް މިހާތަނަށް ރަސްމީކޮށް އެމްއާރުއެމުން ކޯލިޝަން ރޫޅާލާފައެއް ނުވެއެވެ. އަދި މިހާރު ދެ ޕާޓީގެ ދެމެދުގައި ފަށާފައިވާ ބައްދަލުވުންތަކުގައި ވަނީ ދެ ފަރާތައް އެއްބަސްވެވޭ އުސޫލެއްގެ ތެރެއިން ދައުރު ނިމެންދެން ކޯލިޝަން ދަމަހައްޓާނެ ގޮތާއި ގުޅިގެންވެސް މަޝްވަރާތައް ފަށާފައެވެ.
އޭގެ އިތުރުން ގައުމުގައި ހުރި ރައްޔިތުންގެ ކަންބޮޑުވުން އޮތް މައްސަލަތަކާއި ގުޅިގެންވެސް ދެ ޕާޓީން ދަނީ މަޝްވަރާ ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
