ޑރ މުޢިއްޒަށް ބިރު ދައްކައި މަރުގެ އިންޒާރުދިން މައްސަލަ ބަލަން ގޮވާލައިފި!

ޕީޕީއެމްގެ ނައިބުރައީސް އަދި މާލެ ސިޓީގެ މޭޔަރ ޑރ މުޙައްމަދު މުޢިއްޒަށް ބަޔަކު އިންޒާރުދިން މައްސަލަ ޕީޕީއެމް އިން ކުށްވެރިކޮށްފިއެވެ.

މިކަމާއި ގުޅިގެން ޕީޕީއެމުން ނެރުނު ނޫސްބަޔާނެއްގައި ބުނެފައިވަނީ ޕީޕީއެމް ގެ ނާއިބު ރައީސް ޑރ. މުޙައްމަދު މުޢިއްޒަށް އިންޒާރުދީ ބިރު ދެއްކި މައްސަލަ ހަރުކަށި އިބާރާތުން ކުށްވެރިކުރާ ކަމަށެވެ. އަދި އެމައްސަލަ ބެލުމަށް ފުލުހުންނަށް ގޮވާލާ ކަމަށްވެސް ޕީޕީއެމުން ބުނެފައިވެއެވެ.

"ޕީޕީއެމް ގެ ނާއިބު ރައީސް އަދި މާލޭ ސިޓީގެ މޭޔަރު ޑރ. މުޙައްމަދު މުޢިއްޒުގެ އަނބިކަނަބަލުންގެ ފޯނަށް ކާކުކަން ނޭނގޭ (ރާއްޖެއިން ބޭރުގެ) ނަންބަރަކުން މެސެޖްކޮށް، ޑރ. މުޢިއްޒަށް ހަމަލާދޭނެކަމަށް ބުނެ ބިރުދައްކާ މަރުގެ އިންޒާރު ދިނުން އެންމެ ހަރުކަށި އިބާރާތުން ކުށްވެރިކުރަން" ޕީޕީއެމްގެ ނޫސް ބަޔާނުގައި ވެއެވެ.

މީގެ އިތުރުން އެބަޔާނުގައި ބުނެފައިވަނީ މިފަދަ ނާތަޙުޒީބު ދަށުދަރަޖައިގެ ފިނޑި ޢަމަލުތަކުން، މިކޯލިޝަންގެ ލީޑަރޝިޕް ބައިބައި ކުރެވިދާނެކަމަށް ހީކުރުމަކީ އެކަން އެކުރާ ބަޔަކަށް ކުރެވޭ ކުށްހީއެއް ކަމަށެވެ.

ޑރ މުޢިއްޒަށް އިންޒާރު ދީ ފޮނުފައިވާ މެސެޖުތަކުގައި ރައީސް ޔާމީންގެ ނިންމެވުން ބަދަލު ކުރަން މަސައްކަތް ކުރާ ކަމަށް ތުހުމަތު ކޮށްފައެވެ. އަދި، އެގޮތަށް ކަންތައް ކޮށްފިނަމަ ބޮޑެތި ކަންތައްތަކާ ކުރިމަތިލާން ޖެހޭނެ ކަމަށް ބުނެ ވަނީ އިންޒާރު ދީފައެވެ.

އަދި ރައީސް ޔާމީނަށް ވާދަ ނުކުރެވިއްޖެ ހާލަތެއްގައި ޕީޕީއެމް ޕީއެންސީ ކޯލިޝަންގެ ކެންޑިޑޭޓަކަށް ވާނީ އެ މަނިކުފާނުގެ ރަނިންމޭޓު އަދި އިސް ގާނޫނީ ވަކީލު ޑރ. މުޙައްމަދު ޖަމީލް އަޙްމަދު ކަމަށް ވެސް އެ މެސެޖުގައި ވަނީ ބުނެފައެވެ.

މި މެސެޖުތައް ފޮނުވި މައްސަލާގައި ޕީޕީއެމުން ނެރުނު ބަޔާނުގައި ބުނެފައިވަނީ އެކޯލިޝަންގެ ލީޑަރޝިޕްވެސް އަދި ސެނެޓްވެސް މަސައްކަތް ކުރާނީ އެފަދަ ބިރުދެއްކުންތަކާއި އިންޒާރުތަކަށް ބެލުމެއް ނެތި، އެކޯލިޝަންގެ ރިޔާސީ ކެންޑިޑޭޓް އަދި ލީޑަރ، ޕީޕީއެމްގެ ރައީސް ރައީސް ޔާމީން ޢަބްދުލްޤައްޔޫމަށް ސަރުކާރުން ކުރަމުން ގެންދާ އަނިޔާތަކުން އެމަނިކުފާނު މިންޖުކޮށް ކުރިއަށް އޮތް ރިޔާސީ އިންތިޚާބު އެމަނިކުފާނަށް ކާމިޔާބުކޮށް ދިނުމުގައި އެކަތިގަނޑެއްގެ ގޮތުގައި ކަމަށެވެ.

ޕީޕީއެމުން ގޮވާލައިފައިވަނީ އެފަދަ ކަންކަން ހުއްޓާލުމަށެވެ. އަދި ޑރ. މުޢިއްޒުގެ އަނބިކަނބަލުންގެ ފޯނަށް އިންޒާރުދީ މެސެޖް ކުރި ފަރާތެއް ހޯދައި އަޅަންޖެހޭ އެންމެހައި ފިޔަވަޅުތައް އެޅުމަށް ދިވެހި ފުލުހުންގެ ޚިދުމަތަށް ޕީޕީއެމުން ގޮވާލައިފައިވެއެވެ.