ސްޕްރީމްކޯޓްގެ ނިންމުމުން ހެކި ދައްކައި އީސީ ގެ ނިންމުން ގާނޫނާއި ޚިލާފްކަން ހާމަކޮށްދީފި!

ސްޕްރީމްކޯޓްގެ ނިންމުމުން ހެކި ދައްކައި, އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް ގެ ކެންޑިޑެސީ ގަބޫލު ނުކުރަން އީސީން ނިންމި ސަބަބު ގާނޫނާއި ޚިލާފްކަން ހާމަކޮށްދީފިއެވެ.

މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު އިލެކްޝަންސް ކޮމިޝަނަށް އިއްޔެ ހުށަހަޅާފައިވާއިރު، އީސީން ވަނީ އެމަނިކުފާނުގެ ކެންޑިޑެސީ ބަލައި ނުގަންނަން ނިންމައި ޕީޕީއެމަށް ލިޔުން ފޮނުވާފައެވެ.

"ޖިނާއީ ކުށެއް ސާބިތުވެ، 12 މަސް ދުވަހަށް ވުރެ ދިގު މުއްދަތެއް (11 އަހަރު) ހުކުމެއް އައިސްފައިވާ މީހަކަށް ވުމާއި އެކު، އެ ހުކުމް، ތަންފީޒުކޮށް ނިމިފައި ނުވާ ކަން، ލިބިފައިވާ ކުށުގެ ރިކޯޑަށް ބެލުމުން އެނގެން އޮންނާތީ، ގާނޫނު އަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު އަބްދުالله ޔާމިން އަބްދުލްގައްޔޫމް ކިބައިގައި ފުރިހަމަ ނުވުން" ރައީސް ޔާމީން ގެ ކެންޑިޑެސީ ގަބޫލު ނުކުރި ސަބަބު ހާމަކޮށް އީސީން ބުނެފައިވެއެވެ.

ގާނޫނު އަސާސީގެ 109 ވަނަ މާއްދާގެ (ޅ) އާއި ހަވާލާދީ ޔާމީންގެ ކެންޑިޑެސީ ގަބޫލުނުކުރަން އީސީން ނިންމާފައިވާއިރު، އެ ނިންމުން ސްޕްރީމް ކޯޓުގެ ނިންމުމާއި ޚިލާފްކަން ހާމަކޮށް، ޕީޕީއެމްގެ ރެޖިސްޓްރަރ އަހުމަދު ހަމްދާން ކުރެއްވި ޓުވީޓެއްގައި ވިދާޅުވީ، ރައީސް ޔާމީންގެ ކެންޑިޑޭސީ ބަލައިނުގަންނަން އިލެކްޝަން ކޮމިޝަނުން ނިންމާފައިވަނީ ސަރުކާރުގެ ނުފޫޒުން ކަމަށެވެ.

ހަމްދާންގެ އެ ޓުވީޓުގައި އޭނާ ވަނީ އޭނާ އެހެން ވިދާޅުވި ސަބަބު ސާބިތު ކޮށްދެއްވުމަށް ސްޕްރީމްކޯޓްގެ ނިންމުމުގެ ފޮޓޯއެއްވެސް ހިއްސާކުރައްވާފައެވެ.

ހަމްދާން ހިއްސާ ކުރެއްވި ސްޕްރީމް ކޯޓުގެ ހުކުމުގައި ބުނެފައިވާ ގޮތުން، ދިވެހިރާއްޖޭގެ ޝަރުއީ ނިޒާމުގައި ކޯޓުތަކުން ކުރާ މަދަނީ އަދި ޖިނާއީ ހުކުމްތައް އިސްތިއުނާފު ކުރުމުގެ ހައްގަކީ މައްސަލައާ ގުޅުންހުރި ކޮންމެ މީހަކަށްވެސް ލިބިދީފައިވާ ޙައްގެއް ކަމަށެވެ.

އަދި ގާނޫނުއަސާސިގެ 66 ވަނަ މާއްދާއަށް ބެލުމުން، ރައްޔިތުންގެ މަޖިލީހުން ފާސްކުރާ ގާނޫނެއް އަދި ގާނޫނެއްގެ ދަށުން ހަދާ ގަވާއިދެއްގައިވެސް، ގާނޫނު އަސާސީން ކަށަވަރުކޮށްދީފައިވާ ޙައްޤަކާ ފުށުއަރާގޮތަށް، ޤަވާއިދެއްގެ މާއްދާއެއް ހިމަނައިގެން އެމައްޗަށް އަމަލު ކުރުމަކީ ގާނޫނު އަސާސީ ހުއްދަކުރާ ކަމެއް ނޫންކަން އެނގޭ ކަމަށްވެސް އެ ހުކުމުގައިވެ އެވެ.

"ވުމާއެކު، ޝަރުއީ ކޯޓަކުން ކުށް ސާބިތުވެ ހުކުމެއް މީހެއްގެ މައްޗަށް އައިސްފައިވާކަމަށް ބެލެވޭނީ އެ ކޯޓަކުން ކުރި ޙުކުމެއް އެއީ އިސްތިއުނާފު މުއްދަތުތައް ފަހަނައަޅައިދިއުމަށްފަހު ނިހާއީ ހުކުމަކަށްވާ ފަހުންނެވެ." ސްޕްރީމްކޯޓްގެ ނިންމުމުގައި ވެއެވެ.