ވައުދުތައް ފުރިހަމަވުމުގެ ސިއްރަކީ އެއްވެސް ރަށެއް ބާކީނުކޮށް ސުލްހަވެރިކަމާއެކު މުޅި ރާއްޖެ ކުރިއަރުވަން އަމާޒު ހިފުން : ރައީސް ސޯލިހް
މި ސަރުކާރުން ރައްޔިތުންނަށް ވީވައުދުގެ %90 ފުރިހަމަވަމުން ދިއުމުގެ ސިއްރަކީ، ސިޔާސީ ހަލަބޮލިކަން ދޫކޮށް މުރައިދޫ ފަދަ އަޅާނުލާ ހުރި ރަށްތައްވެސް ބާކީނުކޮށް ސުލްހަވެރިކަމާއެކު މުޅި ރާއްޖެ ކުރިއަރުވަން އަމާޒުހިފުން ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، މި އަހަރުގެ ރިޔާސީ އިންތިހާބަށް ކެމްޕެއިން ކުރެއްވުމަށް ހއ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކުރެއްވި ޓުވީޓެއްގައެވެ.
އަދި އެ މަނިކުފާނުގެ އަންނަ ދައުރުގެވެސް އަމާޒަކީ ހަމަޖެހުން ދަމަހައްޓައި ވައުދުތައް ފުއްދުން ކަމުގައިވެސް އެ ޓުވީޓުގައި އިތުރަށް ބުނެފައިވެއެވެ.
މީގެ އިތުރުން ރައީސް ކުރެއްވި ޓުވީޓެއްގައި ވިދާޅުވެފައިވަނީ، ހއ، ށ، މ، އަދި ވ އަތޮޅުގެ ހުރިހާ ރަށަކުންނާ ފުވައްމުލަކުން ހަމަޖެހުމާ ތަރައްގީއަށް ރައްޔިތުން އެދޭމިންވަރު ފެނިވަޑައިގެން އުފާވެރި އަމާން ރާއްޖެއެއް ހޯދުމަށް ކުރަމުންދާ ދަތުރުގައި ރައްޔިތުން އެ މަނިކުފާނާއެކު ތިއްބެވި ކަމުގެ ހިތްހަމަ ޖެހުން ލިބިވަޑައިގެންފި ކަމުގައެވެ.
ތިކުރާ އިތުބާރާއެކު، ރައްޔިތުން އެދޭ އިތުރު ތަރައްގީ ހޯދައިދީ ރަށު ފަތުރުވެރިކަމަށް ފައްކާވަމުން އަންނަ ބޮޑުތިލަދުންމައްޗަށް ފަހި ފުރުސަތުތަކެއް މިފެށޭ ދައުރުގަ ހޯދައިދޭނަން
ރައީސްގެ އިތުރު ޓުވީޓެއްގައި ވިދާޅުވެފައިވެއެވެ.
މި އަހަރުގެ ރިޔާސީ އިންތިހާބަށް ތައްޔާރުވުމުގެ ގޮތުން ރާއްޖޭގެ ގިނަ ރަށްތަކަކަށް ރައީސް ދަތުރުކުރައްވަމުން ގެންދަވާއިރު، އައު ދައުރަކަށް އެ މަނިކުފާނު ގެންދަވަނީ ގިނަ ވައުދުތަކެއް ވެ ވަޑައިގަންނަވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
