ރައީސް ޔާމީން އެދެނީ އިންޑިއާއަށް އަޅުވެތިވެފައި އޮތް މި ސަރުކާރު ނިންމަން: ސައީދު
ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު އެދިވަޑައިގަންނަވަނީ އިންޑިއާއަށް އަޅުވެތިވެފައި އޮތް މި ސަރުކާރު ނިންމާދިނުމަށް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެ އެވެ.
ސައީދު މިފަދައިން ވިދާޅުވެފައި ވަނީ ލ ފޮނަދޫގައި ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.
ސައީދު ވިދާޅުވީ ޑރ މުއިއްޒާއި ޕްރޮގްރެސިވް ކޮންގްރެސް ކޯލިޝަންގެ ވާދަވެރިން ރިޔާސީ އިންތިޚާބުގެ ވޯޓަށް ކުޑަތަންވަމުންދާ ވަރަކަށް ރައީސް ޔާމިނުގެ ނަންފުޅު ބޭނުންކުރައްވާ، ފިތުނަ އުފެއްދުމުގެ މަސައްކަތްތައް ކުރައްވަމުން ގެންދަވާނެ ކަމަށެވެ. އަދި ތަފާތު ދޮގު ވާހަކަތައް ވެސް ދައްކަވަމުން ގެންދަވާނެ ކަމަށެވެ.
އެގޮތުން ރައީސް ޔާމިނުގެ ތާއީދު ޑރ މުއިއްޒަށް ނެތް ކަމަށާއި، އެކަމާއި ގުޅޭގޮތުން ވެސް ތަފާތު ދޮގު ވާހަކަތައް ދައްކަވަމުން ގެންދަވާނެ ކަމަށެވެ.
އެހެން ނަމަވެސް ޕީޕީއެމް-ޕީއެންސީއަކީ ތަހުޒީބު ފިކުރުގެ ޕާޓީއެއް ކަމަށާއި، މީހުން ދައްކާހާ ވާހަކައަކަށް ޕާޓީގެ އާންމު މެމްބަރުން ނުހެއްލޭނެކަމުގެ ޔަގީންކަން އޮތްކަމަށް ސައީދު ވިދާޅުވި އެވެ. އެއާއެކު އޭނާ ވިދާޅުވީ ރައީސް ޔާމީނުގެ ފުރިހަމަ ތާއީދު ޑރ މުއިއްޒަށް އޮތް ކަމަށެވެ.
އެމަނިކުފާނު އެދިވަޑައިގަންނަވަނީ އިންޑިއާއަށް އަޅުވެތިވެފައި އޮތް މި ސަރުކާރު، މިއަހަރުގެ ސެޕްޓެމްބަރު މަހުގެ 9 ގައި ނަގާ ވޯޓުން އެއްބުރުން ބަލިކުރުމަށް ކަމަށް ސައީދު ވިދާޅުވި އެވެ.
"ރައީސް ޔާމިނުގެ މެސެޖަކީ، އެމަނިކުފާނު ދިވެހި ލޮބުވެތި ރައްޔިތުންގެ ކިބައިން އެދިވަޑައިގަންނަވަނީ އިންޑިއާއަށް އަޅުވެތިވެފައި އޮތް މި ސަރުކާރު ނިންމާށޭ:
މާވަށު ދާއިރާގެ މެމްބަރު ސައީދު
ސައީދު މިފަދައިން ވިދާޅުވެފައިވާއިރު، ޑރ މުއިއްޒަށް ނުރުހުން ފާޅުކޮށް ރައީސް ޔާމިނު ފޮނުވި ނޯޓެއްކަމަށް ބުނެ ސޯޝަލް މީޑިއާގައި ދަނީ ލިޔުމެއް ދައުރުކުރަމުން ނެވެ.
އެ ލިޔުމަކީ ރައީސް ޔާމިނުގެ ނޯޓެއް ނޫން ކަމަށާއި، އަދި އޭގައި ބަޔާންކޮށްފައިވާ ފަދަ އެއްވެސް ވާހަކަފުޅެއް ރައީސް ޔާމީން ވިދާޅުވެފައި ނުވާކަމަށް އެމަނިކުފާނުގެ ޤާނޫނީ ވަކީލުން ވަނީ ކަށަވަރުކޮށްދެއްވާފަ އެވެ.
އަދި އެފަދަ ފިތުނަވެރި ވާހަކަތަކުގައި ރައީސް ޔާމިނުގެ ސަޕޯޓަރުން ޖެހިވަޑައި ނުގެން މި ރިޔާސީ އިންތިޚާބު ޑރ މުއިއްޒަށް ކާމިޔާބުކޮށްދިނުމަށް މަސައްކަތްޕުޅު ކުރެއްވުމަށް ރައީސް ޔާމީން އެދިވަޑައިގަންނަވާ ކަމަށް ވެސް ޑރ ޤާނޫނީ ވަކީލުންގެ ބަޔާނުގައި ބުނެފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
