ވޯޓު ގަންނަން ދޭ ފައިސާގައި ހިފާ ޤައުމުގެ މުސްގަތުބަލު ވިއްކާލާ ބަޔަކަށް ނުވާތި: ޑރ ޝަހީމު

ރިޔާސީ އިންތިޚާބުގައި ރައްޔިތުންގެ ވޯޓު ގަންނަން ދޭ ފައިސާގައި ހިފާ މި ޤައުމުގެ މުސްތަގުބަލު ވިއްކާލާ ބަޔަކަށް ނުވުމަށް ކުރީގެ އިސްލާމިކް މިނިސްޓަރު އަދި ޕީޕީއެމްގެ އެޑްވައިޒަރު ޑރ މުޙައްމަދު ޝަހީމު އަލީ ސައީދު ދިވެހި ރައްޔިތުންގެ ކިބައިން އެދިވަޑައިގެންފި އެވެ.

ލ ފޮނަދޫގައި އޮތް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ކެމްޕޭނު ޖަލްސާގައި ވާހަކަދައްކަވަމުން ޑރ ޝަހީމު ވިދާޅުވީ މި ރިޔާސީ އިންތިޚާބުގައި ރައްޔިތުން ލާ ވޯޓު ގަތުމަށް އެކި ސިޔާސީ ފަރާތްތަކުން ލާރި ބަހަމުންދާނެ ކަމަށެވެ.

އެހެން ނަމަވެސް އެ ލާރީގައި ހިފާ މި ޤައުމުގެ މުސްތަގުބަލު ނަގާލާ ބަޔަކަށް ދިވެހިރައްޔިތުން ވެގެން ނުވާނެކަމަށް ޑރ ޝަހީމު ވިދާޅުވި އެވެ. އަދި ރައްޔިތުން އެފަދައިން ކަންތައް ނުކުރައްވާނެ ކަމާއި މެދު އިތުބާރު ކުރައްވާކަމަށް ޑރ ޝަހީމު ވިދާޅުވި އެވެ.

"ފައިސާ ދޭނެ.. ވޯޓު ގަންނަން ފައިސާ ދޭނެ، ވަގުތީ އުފަލަކަށްޓަކައި މި ގައުމުގެ ދާއިމީ ހަމަޖެހުމާއި ދާއިމީ މުސްތަގުބަލު މި ގައުމުގެ މިނިވަންކަން ތިޔަ ބޭފުޅުން ގެއްލުވާ ނުލައްވާށޭ. އަޅުގަނޑުމެންގެ ފުރިހަމަ އިތުބާރު އެބައޮތޭ ދިވެހި އަޚުންނާއި އުޚުތުންނަށް"

ޕީޕީއެމްގެ އެޑްވައިޒަރު ޑރ ޝަހީމު

ޑރ ޝަހީމު ވިދާޅުވީ 21 ވަނަ ގަރުނުގައި، މި ގައުމުގެ ވެރިކަމަށް ގެންނަން ޖެހޭނީ ޒަމާނީ ތައުލީމު ލިބިވަޑައިގެން ހުންނެވި އިލްމީ ބޭފުޅެއް ކަމަށެވެ. އެ ގޮތުން ބަލާއިރު ޑރ މުއިއްޒަކީ މި ރިޔާސީ އިންތިޚާބުގައި ވާދަކުރައްވާ އެންމެ އިލްމީ ކެންޑިޑޭޓުކަމަށް އެމަނިކުފާނު ވިދާޅުވި އެވެ.

އޭގެ އިތުރުން ޑރ ޝަހީމު ވިދާޅުވީ، ދިވެހިރާއްޖޭގެ މިނިވަންކަމާއި އިސްތިގުލާލަށް ބުރޫއަރާ ގޮތަށް ސަރުކާރުން އެކި ކަންކަން ކުރަމުންދިޔައިރު، ސަރުކާރަށް ވާގިވެރިވަމުން ދިޔަ ޕާޓީތައް ވެސް މިއަދު ނިކުމެ މިނިވަންކަމުގެ ވާހަކަތައް ދައްކަވަމުންދާއިރު، އެމީހުންގެ އިޚްލާސްތެރިކަން މިނެ ކިރާލަން ރައްޔިތުންނަށް ވަރަށް ފަސޭހަވާނެ ކަމަށެވެ.

ދިވެހިރާއްޖޭގެ މިނިވަންކަމާއި އިސްތިގުލާލު ހިމާޔަތްކޮށް، ގައުމީ ވެރިކަމެއް ކޮށްދެވޭނީ ޕްރޮގްރެސިވް ކޮންގްރެސް ކޯލިޝަންގެ ކެންޑިޑޭޓު ޑރ މުހައްމަދު މުއިއްޒުއަށް ކަމަށް ޑރ ޝަހީމު ވިދާޅުވި އެވެ. އަދި ރައްޔިތުން އެކަން ޔަގީންކުރުމަށް ވެސް ޑރ ޝަހީމު ވަނީ އެދިވަޑައިގެންފަ އެވެ.