މިގަރުނުގައި ހުރި އެންމެ ޙިކްމަތްތެރި، އިޤްތިޞާދު ނެގެހެއްޓޭނި ލީޑަރަކީ ރައީސް ޞާލިޙް: ސިޔާމް

މިގަރުނުގައި ރައީސެއްގެ މަޤާމުގައި ހުރި އެންމެ މޮޅު އެންމެ ޙިކްމަތްތެރި އިޤްތިޞާދު ކޮޅައްޖެހޭނެ ބޭފުޅަކަށް ހުރީ ހަމައެކަނި ރައީސް އިބްރާހިމް މުޙައްމަދު ޞާލިޙް ކަމަށް އެމްޑީއޭގެ ލީޑަރު އަދި ދ.މީދޫ ދާއިރާގެ މެމްބަރު އަޙްމަދު ސިޔާމް މުޙައްމަދު ވިދާޅުވެއްޖެއެވެ.

ސިޔާމްގެ ވާހަކަފުޅު ފެއްޓެވީ ކޮވިޑްގެ ތެރޭގައި ރާއްޖޭގެ އިޤްތިޞާދަށް ކޮވިޑްގެ ދުވަސްވަރު އައި ހީނަރުކަން ފުހެލައްވަން ރައީސް ޞާލިޙް އެޅުއްޗި ފިޔަވަޅުތަކުގެ ވާހަކައާއި އެކަމަށް ތަޢުރީފް ކުރައްވަމުންނެވެ.

"އެދުވަހު މުޅި ދުނިޔެ ބަންދުވެގެން ދިޔަ، ރާއްޖޭގެ ވިޔަފާރިވެރިންނާއި ރާއްޖެގެ އެންމެހާ ރައްޔިތުން އަދި ޚާއްސަކޮށް ސަރުކާރު ހިންގަވާ ބޭފުޅުންވެސް އެންމެހާ ބޭފުޅުން ތިބީ ވަރަށްބޮޑު ހާސްކަމެއްގެ ތެރޭގައި"

މީދޫ ދާއިރާގެ މެމްބަރު އަހްމަދު ސިޔާމް

ސިޔާމް ވިދާޅުވީ އެދުވަހު ވިޔަފާއިވެރިންގެ ތެރޭގައި ހިމެނޭ ފުންނާބު އުސް ވިޔަފާރިވެރިން ބައްދަލުކޮށް ވިޔަފާރި ހިންގާނެ ގޮތެއް ނެތްކަމަށާއި، ވިޔަފާރި ހަލާކުވެއްޖެކަމަށް ވިދާޅުވިކަމަށެވެ.

ހަމައެދުވަހު ވިޔަފާރިވެރިން ރައީސް ޞާލިޙާއި ބައްދަލުކުރި ކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ އެދުވަހު ރައީސް ޞާލިޙް ވިދާޅުވީ ދުނިޔޭގެ އެކި ބޭންކުތަކުން ފައިސާ ހޯއްދަވައި ފަތުރުވެރިކަމުގެ ސިނާޢަތް ކޮޅައްޖައްސަވާނެ ކަމަށެވެ. އަރަނީގެ ގޮތުގައި ވަރަށް ބައިވަރު ފައިސާ އެކި ޤައުމުތަކުން ރައީސް ޞާލިޙް ނެންގެވި ކަމަށާއި އޭގެ ސަބަބުން ކޮވިޑާއި ގުޅިގެން ދިމާވި ކަންތައްތަކުން އަރައި ގަނެވުނު ކަމަށެވެ. އަދި ތިންމަސް ދުވަހުން ބޯޑަރު ހުޅުވި މިއަދު މިއޮތީ އިޤްތިޞާސު އެންމެ ބޮޑަށް ކޮއްޅަށް ޖެހިފައި ކަމުގައި ސިޔާމް ވިދާޅުވިއެވެ.

ސިޔާމް ވިދާޅުވީ ރާއްޖޭގެ އިޤްތިޞާދު އެހާއަވަހަށް ކޮޅަށް ޖެހެވުނު ސަބަބަކާއި ގެންގުޅު "ރެސިޕީ" އާއި މެދުގައި ދުނިޔޭގެ އެކި ޤައުމުތަކުން ސުވާލު ކުރި ކަމަށާއި އޭގެ ތެރޭގައި ދުނިޔޭގެ ވަރުގަދަ އިޤްތިޞާދުތައް ވެސް ހިމެނޭކަމަށް ސިޔާމް ވިދާޅުވިއެވެ.

"މި ޤަރުނުގައި ރައީސެއްގެ މަޤާމުގައި ހުންނެވި އެންމެ މޮޅު އެންމެ ޚިކްމަތްތެރި، އެންމެ އޯގާތެރި އެންމެ ވިސްނުންތޫނު، އިޤްތިޞާދު ކޮޅައްޖެހޭނެ ބޭފުޅަކަށް ހުރީ ހަމައެކަނި އަޅުގަނޑުމެންގެ ރައީސުލް ޖުމްހޫރިއްޔާ ރައީސް ޞާލިޙް"

މީދޫ ދާއިރާގެ މެމްބަރު އަހްމަދު ސިޔާމް

ސިޔާމް ވިދާޅުވީ އެކަމާއި ދެބަސްވާނެ ހަމަ އެއްވެސް ފަރާތެއް ނުހުންނާނެ ކަމަށެވެ.

ރޭ މާލެ ސިޓީގައި ބޭއްވި އެމްޑީޕީ ކޯލިޝަން ޖަލްސާގައި ވަނީ "އުފާވެރި މާލެ" ނަމުގައި މާލެ ސަރަހައްދަށް ޚާއްސަ މެނިފެސްޓޯއެއް ތަޢާރަފްކޮށްފައެވެ.