ޑރ. މުޢިއްޒާއި ދެކޮޅަށް ފަތުރަމުންދާ ހަގީގަތާއި ޚިލާފު ވާހަކަތައް، ތަރުޖަމާނު ސާފުކޮށްދީފި!
ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒާއި ގުޅިގެން ފަތުރަމުން ގެންދާ ހަގީގަތާއި ޚިލާފު ވާހަކަތަކަށް އެމަނިކުފާނުގެ ތަރުޖަމާނު މުހައްމަދު ތޮލާލް ރައްދު ދެއްވައިފިއެވެ.
"އަދަދު" ނޫހުގައި "ބިދޭސީ ކުންފުނިތަކަކުން މުއިއްޒުގެ އެކައުންޓަށް ގިނަ އަދަދެއްގެ ފައިސާ" މި ސުރުޚީގެ ދަށުން ލިޔެފައިވާ ޚަބަރާއި ގުޅިގެން މީޑިއާ ތަކަށް މަޢުލޫމާތު ދެއްވަމުން ތޮލާލް ވަނީ، އެކަން ދޮގު ކުރައްވައި އެކަމުގެ ހަގީގަތް ހާމަކޮށްދެއްވާފައެވެ.
އެގޮތުން ތޮލާލް ވިދާޅުވީ 2015 ވަނަ އަހަރުން ފެށިގެން ޑރ. މުއިއްޒުގެ އެކައުންޓަށް ކޮންމެ މަހަކު ޖަމާވާ ޑޮލަރަކީ އެމަނިކުފާނުގެ ރޯހައުސް އިން ކުއްޔަށް ދެއްވާފައިވާ 2 އެޕާޓްމަންޓުން ކުލީގެ ގޮތުގައި އެފަރާތްތަކުން ދައްކަމުން ގެންދާ ފައިސާ ކަމަށެވެ. މީގެ ތަފްސީލުތައް ބޭންކަށްވެސް ޑިކްލެއާ ކުރެވިފައިވާނެ ކަމަށާ، އެމީހުންނަކީ 2015ގައި ރޯހައުސް ލިބިވަޑައިގަތް ހިސާބުންފެށިގެން ކުއްޔަށް ނަގައިގެން އުޅޭ ބައެއް ކަމަށް ތޮލާލް ވިދާޅުވި އެވެ. އަދި އެތަނުން ސަރުކާރަށް ދައްކަންޖެހޭ އިންކަމް ޓެސްވެސް މުޢިއްޒު ދައްކަވަމުން ގެންދަވާ ކަން ތޮލާލް ފާހަގަކުރެއްވިއެވެ.
ތޮލާލް އިތުރަށް ވިދާޅުވީ، ކުލީގެ ގޮތުގައި ފުރަތަމަ ޑޮލަރުން ފައިސާ ދެއްކި ނަމަވެސް ފަހުން ފައިސާ ދައްކަމުންގެންދަނީ އެއަދަދަށް ދިވެހި ފައިސާގެ މަގުން ކަމަށެވެ.
"ޑރ މުއިއްޒި ފޮރުވަން އަދި ސިއްރު ކުރަން ވެސް އެއްވެސް ކަމެއް ނޯންނާނެ. އެއްވެސް ޝައްކެއް އޮތް ނަމަ ތަހުގީހު ކުރައްވާ. އެއްބާރުލުން ދެއްވާނެ." ތޮލާލް މީޑިއާ ތަކަށް ފޮނުއްވި މެސެޖުގައި ވެއެވެ.
މީގެ ކުރިންވެސް އަދަދު ނޫހުން ވަނީ، ޑރ. މުޢިއްޒަށް ޕީޕީއެމްގެ ލީޑަރ އަދި ކުރީގެ ރައީސް ޔާމީން އަބްދުލްގައްޔޫމް ގެ ތާއީދު ނެތް ކަމަށް ބުނެ ޚަބަރު ފަތުރާފައެވެ. އެކަންވެސް ޕީޕީއެމުން ވަނީ ދޮގު ކޮށްފައެވެ. އަދި އެފަދައިން ކަން ކުރަނީ ސަރުކާރުން އަންގައިގެން ކަމަށްވެސް އިދިކޮޅުން ތުހުމަތު ކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
