ހުޅުމާލޭގެ ދެވަނަ ފިޔަވަހިން ފެންނަނީ ރައީސް ޔާމީންގެ ދުރުވިސްނޭ ސިޔާސަތު: ޑރ މުއިއްޒު
ހުޅުމާލޭގެ ދެވަނަ ފިޔަވަހީގައި ބަލާލި ކޮންމެ ދިމާލަކުންވެސް ފެންނަނީ ކުރީގެ ރައީސް ޔާމީން އަބްދުލްގައްޔޫމުގެ ދުރުވިސްނޭ ސިޔާސަތުތައްކަމަށް އެމަނިކުފާނުގެ ކެބިނެޓުގެ ހައުސިން މިނިސްޓަރު އަދި މިހާރު މާލޭ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
ޑރ. މުއިއްޒު މިފަދައިން ވިދާޅުވެފައި ވަނީ ހިޔާ މަޝްރޫއުގެ ދަށުން އެމްއޭސީއެލުން އަޅާ ފްލެޓުތައް ލިބުނު ފަރާތްތަކަށް މަރުހަބާ ދަންނަވަމުން ކުރެއްވި ޓްވީޓެއްގައެވެ.
ޑރ. މުއިއްޒު ވިދާޅުވީ ހިޔާ މަޝްރޫއުގެ ތެރެއިން ސަރުކާރުގެ ކުންފުނިތަކުން ކުރިއަށް ގެންދިއުމަށް ރައީސް ޔާމީން ހަލާވުކުރެއްވި ފްލެޓުތަކުގެ ތެރެއިން އެމް.އޭ.ސީ.އެލްގެ ފްލެޓުތައް ލިބުނު ރައްޔިތުންނަށް މަރުހަބާ ދަންނަވާކަމަށެވެ.
އެއާއެކު ޑރ. މުއިއްޒު ވިދާޅުވީ ހިޔާ މަޝްރޫއުގެ ފްލެޓުތައް އަޅަމުންދާ ހުޅުމާލޭ ދެވަނަ ފިޔަވަހީގެ ބަލާލި ކޮންމެ ދިމާއަކުންވެސް ފެންނަނީ ރައީސް ޔާމީން ތަރައްގީގެ ލެގެސީއާއި އެމަނިކުފާނުގެ ދުރުވިސްނޭ ސިޔާސަތުތައްކަމަށެވެ.
ހުޅުމާލޭ ދެވަނަ ފިޔަވައްސަކީ ރައީސް ޔާމީންގެ ޒައާމަތުގައި ހިއްކާފައިވާ ސަރަހައްދެކެވެ. އެ ސަރަހައްދު ހިއްކެވުމަށްފަހު ރައީސް ޔާމީންގެ ޒައާމަތުގައި ހިޔާ މަޝްރޫއުގެ ދަށުން 7000 ހައުސިން ޔުނިޓުގެ އަމަލީ މަސައްކަތް ވަނީ ނިންމަވާފައެވެ. އަދި އެ މަޝްރޫއުގެ ދަށުން ފެށި ގިނަ ފްލެޓުތަކުގެ މަސައްކަތް މިހާރު ނިމުމަކާއި ގާތްވެފައިވާކަން ފާހަގަކޮށްލެވެއެވެ.
ހުޅުމާލެ ދެވަނަ ފިޔަވހި ތަރައްގީކުރުމަށް އޭރު ވަނީ މާސްޓަރ ޕްލޭނެއް އެކުލަވާލެވިފައެވެ. އެހެން ނަމަވެސް ސަރުކާރު ބަދަލުވުމާއި ގުޅިގެން، ހުޅުމާލޭގެ ދެވަނަ ފިޔަވަހީގެ މަސައްކަތް ކުރީ ސަރުކާރުން އެކުލަވާލާފައި އޮތް މާސްޓަރ ޕްލޭނާއި އެއްގޮތަށް ނުދާތީ އިދިކޮޅު ފަރާތްތަކުން ގެންދަނީ ކަންބޮޑުވުން ފާޅުކުރަމުންނެވެ.
އޭގެ އިތުރުން ހުޅުމާލޭގެ ދެވަނަ ފިޔަވަހީގައި މީހުން އާބާދުވާން ފެށިއިރު އަސާސީ ގިނަ ޚިދުމަތްތަކެއް އެތަނުގައި ލިބެން ނުތުމަކީ އާންމުންގެ ބޮޑު ޝަކުވާއެއް އޮތް މައްސަލައެއްކަންވެސް ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
