ކޮންމެ ރަށެއްގައި ހުރި ކޮންމެ ރައްޔިތަކަށްވެސް ގެދޮރުވެރިކަމުގައި ހަމަހަމަކަން އޮންނާނެ: ޑރ. މުޢިއްޒު
އެމަނިކުފާނުގެ ވެރިކަމުގައި ރާއްޖޭގެ ކޮންމެ ރަށެއްގައި ހުރި ކޮންމެ ރައްޔިތަކަށްވެސް ގެދޮރުވެރިކަމުގައި ހަމަހަމަކަން އޮންނާނެ ކަމަށް އިންތިޚާބީ ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
މިދިޔަ ހޮނިހިރު ދުވަހު ބޭއްވި އިންތިހާބުން ލިބުނު ކާމިޔާބީ ފާހަގަ ކުރުމަށް ދިވެހި ރައްޔިތުންނާއި ބައްދަލު ކުރެއްވުމަށް ސޯޝަލް ސެންޓަރުގައި ބޭއްވި ރަސްމިއްޔާތުގައި މުއިއްޒު ވަނީ އެމަނިކުފާނު ވެރިކަމަށް ވަޑައިގެންނެވުމަށް އެކި ފަހަރު މަތިން އެކި ރަށްރަށުގައި ވެ ވަޑައިގެންނެވި ބައެއް ވަޢުދުތައް ތަކުރާރު ކުރައްވައި ހުރިހާ ރަށަކަށްވެސް ވެ ވަޑައިގެންނެވި ވަޢުދުތައް ފުއްްދަވާނެ ކަމުގެ ޔަގީންކަން ދިވެހި ރައްޔިތުންނަށް ދެއްވާފައެވެ.
މިއާއެކު މުޢިއްޒު ވިދާޅުވީ، އެމަނިކުފާނު އެންމެ އިސްކަމެއް ދެއްވި އެއް ވަޢުދެއްގެ ގޮތުގައި ހިމެނެނީ ރައްޔިތުންނަށް ގެދޮރުވެރިކަން ޔަގީން ކޮށްދެއްވުން ކަމަށެވެ. އެގޮތުން މާލޭ ސަރަޙައްދުގައި ދިރިއުޅޭ ރައްޔިތުންނަށް ވަޢުދުވެވަޑައިގެންނެވި ފަދައިން ފުށިދިއްގަރު ފަޅާއި، ގުޅި ފަޅާއި އަދި ގިރާވަރު ފަޅު އަންނަ އަހަރު ނިމުމުގެ ކުރިން ހިއްކައި ދެއްވާނެ ކަމަށް އެމަނިކުފާނު ވިދާޅުވި އެވެ.
ގާތްގަނޑަކަށް 65,000 ރައްޔިތުންނަށް 5 އަހަރުތެރޭގައި ގެދޮރުވެރިކަން ޔަގީންވާ ބިޔަ މަޝްރޫޢުގެ ބިން ހިއްކުމުގެ މަސައްކަތް މި ފެށޭ އަހަރު ނިމުމުގެ ކުރީގައި އެއްކޮށް ނިންމައި ދޭނަން. އެއީ އަޅުގަނޑު ވީ ވަޢުދެއް. އެކަން ކުރާނަން އިރާދަކުރެއްވިޔާ. ދެން މިހާރު ދީފައި ހުރި ގޯތިތައް ހަމަ އެގޮތަށް. ބައެއް ގޯތިތައް އަދި ޖެހޭނީ ދުނިޔެއަށް ގެންނަން. ކަނޑުއަޑީގައި ހުރީމާ. އެ ހުރިހާ ގޯއްޗެއް ދުނިޔެއަށް އަންނާނެ އިރާދަކުރެއްވިއްޔާ ބިން ހިއްކާ ނިމޭއިރު. ގެނެސްގެން ރައްޔިތުންނަށް ގެދޮރުވެރިކަން އިރާދަކުރެއްވިޔާ ޔަގީން ކޮށްދޭނަން.
އިންތިޚާބީ ރައީސް ޑރ މުހައްމަދު މުޢިއްޒު
މިއާއެކު މުޢިއްޒު ވިދާޅުވީ މާލޭގެ އިތުރުން ރާއްޖޭގެ ކޮންމެ ރަށެއްގައި ދިރިއުޅުނު ނަމަވެސް، ދިވެހި ކޮންމެ ރައްޔިތަކަށްވެސް އެމާނިކުފާނުގެ ވެރިކަމެއްގައި ގެދޮރުވެރި ކޮށްދިނުމުގައި ހަމަހަމަކަން އޮންނާނެ ކަމަށެވެ.
ރާއްޖޭގެ ކޮންމެ ރަށެއްގައި ހުރި ކޮންމެ ރައްޔިތަކަށްވެސް ގެދޮރުވެރިކަމުގައި ހަމަހަމަކަން އޮންނާނެ. އެއްވެސް ރައްޔިތަކު ބާކީ ނުވާނެ. އެ ސިޔާސަތު ތަންފީޒު ކުރެވިގެންދާނެ.
އިންތިޚާބީ ރައީސް ޑރ މުހައްމަދު މުޢިއްޒު
ގެދޮރުވެރިކަމުގެ މައްސަލަ އަކީ ރާއްޖޭއަށް ދިމާވެފައިވާ އެންމެ ބޮޑު މައްސަލަ ކަމަށާ، އިޖުތިމާއީ އެންމެ ގިނަ މައްސަލަ ތަކުގެވެސް އެއް ސަބަބަކީ އެއީ ކަމަށް ކެންޕެއިންގެ ތެރެއިން މުޢިއްޒު ދިޔައީ ތަކުރާރުކޮށް ވިދާޅުވަމުންނެވެ. އެހެންކަމުން އެ މައްސަލަ އަށް "ޓޯޓަލް ސޮލިއުޝަން އެއް" ނުވަތަ ދާއިމީ ހައްލެއް އެމަނިކުފާނު ގެނެސްދެއްވާނެ ކަމަށް މުޢިއްޒު ވަނީ ވަޢުދުވެވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
