ފްރާންސް ބަލިކޮށް ޖަރުމަނު ޗެންޕިއަންކަން ހޯދައިފި

އިންޑޮނޭޝިޔާގައި މިހާރު ކުރިއަށްދާ 17 އަހަރުން ދަށުގެ ފިރިހެން ވޯލްޑްކަޕް ފުޓްބޯޅަ މުބާރާތުގެ ފައިނަލްގައި މިއަދު ހަވީރު ފުރާންސް ބަލިކޮށް މުބާރާތުގެ ޗެމްޕިއަންކަން ޖަރުމަނުން ހޯދައިފިއެވެ.

އިންޑޮނޭޝިޔާގެ ސުރަކަތާގެ މަނަހަން ސްޓޭޑިއަމްގައި ކުޅެވުނު މިމެޗު 90 މިނެޓްގެ ކުޅުން ނިމުނު އިރު 2-2 ގެ ނަތީޖާއަކުން ދެޓީމް އެއްވަރުވެ، ނަތީއްޖާނެރުމަށް ޖެހި ޕެނަލްޓީގައި ޖަރުމަނުން ކުރިހޯދީ 4-3 ގެ ނަތީޖާއަކުންނެވެ. އަދި މިއަހަރުގެ ޖޫން މަހު ހަންގޭރީގައި ބޭއްވުނު 17 އަހަރުން ދަށުގެ ޔޫރަޕިއަން ޗެމްޕިއަންޝިޕްގެ ފައިނަލުގައި ވެސް މިދެޓީމު ވާދަކުރި މެޗު 0-0 ގެ ނަތީޖާއަކުން އެއްވަރުވެ، ނަތީއްޖާނެރުމަށް ޖެހި ޕެނަލްޓީގައި 5-4 ގެ ނަތީޖާއަކުން މޮޅުވެ ޗެމްޕިއަންކަން ހޯދީ ޖަރުމަނުންނެވެ.

މި މުބާރަތުގެ ފައިނަލުން ޖަރުމަނު ޖާގަ ހޯދީ ސެމީފައިނަލްގައި އާޖެންޓީނާ އާއި ދެކޮޅަށް ކުޅުނު މެޗު 3-3 ގެ ނަތީޖާއަކުން އެއްވަރުވެ، ޕެނަލްޓީގައި އެޓީމު ބަލިކުރުމަށްފަހު އެވެ. އަދި ފްރާންސް ފައިނަލުގެ ޖާގައެއް ހޯދީ ސެމީ ފައިނަލުގެ ދެވަނަ މެޗުގައި 2-1 ގެ ނަތީޖާއަކުން މާލީ ބަލިކުރުމަށްފަހު އެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިއަކަށް ހޮވިފައި އާޖެންޓީނާގެ ފޯވާޑް އަގަސްޓިން ރުބާޓޯ އެވެ. އޭނާ ވަނީ މި މުބާރާތުގައި 8 ލަނޑު ކާމިޔާބުކޮށްފައެވެ. މީގެ އިތުރުން މުބާރާތުގެ އެންމެ މޮޅު ގޯލްކީޕަރު ގެ މަގާމު ލިބުނީ ފްރާންސްގެ ޕައުލް އާރގްނީ އަށެވެ. އަދި މުބާރަތުގެ އެންމެ މޮޅު ކުޅުންތެރިޔަކަށް ހޮވުނީ ޖަރުމަނުގެ ޕެރިސް ބާނާރ އެވެ.

ފައިނަލް މެޗުގެ ފުރަތަަމަ ހާފުގައި ޖަރުމަނުން ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރި އިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މިލަނޑު ފުރަތަމަ ހާފުގެ 29 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދީ އެޓީމުގެ ފޯވާޑް ޕެރިސް ބާނާރ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޖަރުމަނު ކުރީގައި އޮވެގެންނެވެ

މެޗުގެ ދެވަަނަ ހާފު ވެސް ވަރުގަދަކޮށް ފެށީ ޖަރުމަނުންނެވެ. އެގޮތުން މިހާފު ފެށިގެން ހަވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ބާސެލޯނާގެ ޒުވާން މިޑްފީލްޑަރު ނޯއާ ޑާވިޗް އެވެ.

ނަމަވެސް އޭގެ ދެމިނެޓު ފަހުން ފްރާންސް އިން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް ސައިމަން ބޯއެބާރއެވެ. އަދި މެޗުގެ ކޮންޓްރޯލް ފްރާންސް އަށް ލިބުނީ ދެވަނަ ހާފުގެ 69 ވަނަ މިނެޓުގައި ޖަރުމަނުގެ މިޑްފީލްޑަރު ވިނާރސް އޮސަވީ އަށް ދެވަނަ ރީނދޫ ކާޑާއެކު ރަތް ކާޑެއް ދައްކާ ދަނޑުން ފޮނުވާލި ހިސާބުންނެވެ.

މިމެޗުގައި ފުރާންސް ޓީމުން ނަތީޖާ އެއްވަރުކުރި ލަނޑު ފަހުހާފުގެ 85 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފިލްޑަރު މާތިސް އަމޫގޫ އެވެ. މިލަނޑާއެކު މެޗުގެ ފުރިހަމަ ވަގުތުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ނަތީޖާ ނެރުމަށްޓަކައި ޖެހި ޕެނަލްޓީގައި ފްރާންސް އިން ކުރިއަށް ފޮނުވާލި ހަ ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ތިން ޕެނަލްޓީ އެވެ. އަދި ޖަރުމަނުން ޖެހި ހަ ޕެނަލްޓީގެ ތެރެއިިން އެޓީމުން ވަނީ ހަތަރު ޕެނަލްޓީ ކާމިޔާބުކޮށް މުބާރާތުގެ ޗެމްޕިއަންކަން ހޯދާފައެވެ.