ހަސަން ލަތީފު މޮޅުވެއްޖެކަން އަމިއްލަފުޅަށް އިއުލާނު ކުރައްވައިފި!
ދަ ޑިމޮކްރެޓްސްގެ ރައީސަކު ހޮވުމަށް ހޮނިހިރު ދުވަހު ބޭއްވި އެ ޕާޓީގެ އެތެރޭގެ އިންތިޚާބު ކާމިޔާބު ކުރެވިފައިވާކަމަށް، އިންތިޚާބުގައި ވާދަކުރެއްވި މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު އަމިއްލަފުޅަށް އައިލާނުކުރައްވައިފި އެވެ.
ހަސަން ލަތީފު މިފަދައިން އިއުލާނު ކުރައްވާފައިވަނީ އޭނާ އެކްސްގައި ކުރެއްވި ޕޯސްޓެއްގަ އެވެ.
އެގޮތުން ހަސަން ލަތީފު ވިދާޅުވީ އެތެރޭގެ އިންތިޚާބުގެ ވޯޓުފޮށިތަކުގެ ނަތީޖާތައް ދައްކާގޮތުން ބޮޑު ތަފާތަކުން އެ އިންތިޚާބު އެ ބޭފުޅާއަށް ކާމިޔާބުވެފައިވާ ކަމަށެވެ.
ޑިމޮކްރެޓްސްގެ އެތެރޭގެ އިންތިޚާބަކީ މުޅި ރާއްޖޭގައި ހިންގުނު މުހިންމު ސިޔާސީ ހަރަކާތެއް ކަމަށާއި، ދެން އޮތީ ހަގީގީ މަސައްކަތް ފަށައިގަތުންކަމަށް ހަސަން ލަތީފު ވިދާޅުވި އެވެ.
"ވޯޓު ފޮށިތަކުގެ ނަތީޖާ ޝީޓުތަކުން ދައްކަނީ ބޮޑު ތަފާތަކުން މި އިންތިޚާބު ކާމިޔާބު ވެއްޖެކަން. މިއަދު މުޅި ރާއްޖޭގައި އެ ހިންގުނީ މުހިއްމު ސިޔާސީ ހަރަކާތެއް. ދެން އޮތީ ހަގީގީ މަސައްކަތް ފަށައިގަތުން"
ހަސަން ލަތީފު
ހަސަން ލަތީފުގެ އެ ޕޯސްޓުގައި ވަނީ ޑިމޮކްރެޓްސްގެ ރައީސަކު ހޮވުމަށް ބޭއްވި އިންތިޚާބުގައި އޭނާ އަށް ތާއީދުކޮށް ވޯޓުދެއްވި ހުރިހާ މެމްބަރުންނަށް ޝުކުރު ވެސް އަދާކުރައްވާފަ އެވެ.
ޑިމޮކްރެޓްސްގެ ރައީސަކު ހޮވުމަށް ބޭއްވި އިންތިޚާބު ކާމިޔާބު ކުރެވުނުކަން ހަސަން ލަތީފު އަމިއްލަފުޅަށް އިއުލާނު ކުރެއްވި ނަމަވެސް، ޕާޓީން އަދި ނަތީޖާ އިއުލާނުކޮށްފައެއް ނުވެއެވެ.
ނަތީޖާ އިއުލާނު ކުރުމަށް އެ ޕާޓީގެ ބައެއް އިސް މުއައްސަސުން ގޮވާލައްވާފައިވާއިރު، މީގެ ކުޑައިރުކޮޅެއް ކުރިން ޕާޓީން ކުރި ޕޯސްޓެއްގައި ބުނެފައިވަނީ ނަތީޖާ އިއުލާނު ކުރާނީ އާދިއްތަ ދުވަހުގެ ވަގުތެއްގައި ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
