މި އަހަރު ހަތް ރިސޯޓް ހުޅުވާނެ، މި ދައުރުގައި 7،000 އެނދު އިތުރުވެއްޖެ

މި އަހަރުގެ ތެރޭގައި އިތުރު ހަތް ރިސޯޓް ހުޅުވޭނެ ކަމަށް ފަތުރުވެރިކަމާއި ތިމާވެއްޓާއި ބެހޭ މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.

ވަޒީރު މިހެން ވިދާޅުވީ ފަތުރުވެރިކަމާ ބެހޭ ވުޒާރާއިން ކުރަމުންދާ މަސައްކަަތްތަކުގެ މައުލޫމާތު ހިއްސާކުރުމަށް މިއަދު ރައީސް އޮފީހުގައި އޮތް ނޫސްވެރީންގެ ބައްދަލްވުމުގަ އެވެ. ވަޒީރު ވިދާޅުވި ގޮތުގުގައި މިދިޔަ އަހަރު ފަތުރުވެރިކަމާއި ގުޅުންހުރި އެކި ވިޔަފާރިތަކަށް ވަނީ ގިނަ ހުއްދަތަކެއް ދޫކޮށްފަ އެވެ. އެގޮތުން 43 ރިސޯޓެއް ތަރައްގީކުރުމަށް ހުއްދަ ދީފައިވެ އެވެ. އަދި 280 ގެސްޓްހައުސް އަކށާއި 122 ޑައިވް ސެންޓަރަކަށް ވެސް ހުއްދަ ދޫކުރި އެވެ.

މީގެ އިތުރުން 14 ހޮޓަލަކަށްވެސް މިދިޔަ އަހަރު ވަނީ ލައިސަންސް ދޫކޮށްފަ އެވެ.

ވަޒީރު ވިދާޅުވި ގޮތުގައި މިވަގުތުވެސް 168 ރިސޯޓެއް ތަރައްގީ ކުރުމުގެ މަސައްކަތް އެކި މަރުހަލާތަކުގައިވެ އެވެ. އަދި މި އަހަރުގެ ތެރޭގައި ހަތް ރިސޯޓެއް ތަރައްގީކޮށް ހުޅުވޭނެ ކަމަށް ވަނީ ވިދާޅުވި އެވެ. މި ރިސޯޓްތަކުން އެކަނި ވެސް 1,000 ވުރެ ގިނަ އެނދުނު ފަތުރުވެރިކަމަށް އިތުރުވާނެ ކަމަށް ވަޒީރު ވިދާޅުވި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒައާމަތުގައި މިވޭތުވެދިޔަ ދެ އަހަރާއި ބައިގެ ތެރޭގައި 7,000 ވުރެ ގިނަ އެނދު ފަތުރުވެރިކަމުގެ ސިނާއަތަށް އިތުރުކުރެވިފައިވާ ކަމަށް ވެސް ވިދާޅުވި އެވެ. އެގޮތުން ރިސޯޓްތަކާއި ގެސްޓްހައުސްތަކާއި ލިވްބޯޑްތަކާއި ހޮޓާތަކާއި ހޯމްސްޓޭފެ ގޮތުގައި ޖުމްލަ 7,195 އެނދު ނެރެވިފައިވާ ކަމަށް ވިދާޅުވި އެވެ.