އޭޕްރީލް މަހުގެ ނިޔަލަށް ނުކުޅެދުންތެރިކަން ހުންނަ މީހުންގެ ދަފްތަރުގައި 15،403 މީހުން، މާލީ އެހީއަށް 55 މިލިއަން ރުފިޔާ

މިއަހަރުގެ އެޕްރީލް މަހުގެ ނިޔަލަށް ރާއްޖޭގައި ނުކުޅެދުންތެރިކަން ހުންނަ މީހުންގެ ގޮތުގައި 15،403 ފަރާތެއް ދަފްތަރުކުރެވިފައިވާ ކަމަށް އެންސްޕާއިން ބުނެފިއެވެ. މީގެ ތެރޭގައި އޭޕްރީލް މަހު އަލަށް ރަޖިސްޓަރީވި 96 ފަރާތެއްވެސް ހިމެނެއެވެ.

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، ދަފްތަރުގައި ހިމެނޭ ފަރާތްތަކުގެ ތެރެއިން އެންމެ ގިނައީ ފިރިހެނުންނެވެ. އެގޮތުން ދަފްތަރުގައި 8،915 ފިރިހެނުން ހިމެނޭއިރު އަންހެނުންގެ އަދަދަކީ 6،488 އެވެ.

އުމުރުފުރާތަކަށް ބަލާއިރު، 18 އަހަރާއި 64 އަހަރާ ދެމެދުގެ 7،773 މީހުން ހިމެނޭއިރު، 18 އަހަރުން ދަށުގެ 5،226 ކުދިން އަދި 65 އަހަރުން މަތީގެ 2،404 މީހުން ދަފްތަރުގައި ރަޖިސްޓްރީވެފައިވެއެވެ.

ނުކުޅެދުންތެރިކަމުގެ ގިންތިތަކަށް ބަލާއިރު، އެންމެ ގިނައީ ޖިސްމާނީ ނުކުޅެދުންތެރިކަން ހުންނަ ފަރާތްތަކެވެ. އެ ގިންތީގައި 4،287 ފަރާތެއް ހިމެނެއެވެ. މީގެ އިތުރުން، މަލްޓިޕަލް ޑިސްއެބިލިޓީ ހުންނަ 3،489 މީހުންނާއި، ނަފްސާނީ ނުކުޅެދުންތެރިކަން ހުންނަ 2،285 މީހުން އަދި ސިކުނޑީގެ ނުކުޅެދުންތެރިކަން ހުންނަ 1،841 މީހުން ހިމެނެއެވެ. އަޑުއިވުމާއި ވާހަކަ ދެއްކުމުގެ ނުކުޅެދުންތެރިކަން 1،828 ފަރާތެއްގެ ހުރިއިރު، ފެނުމުގެ ނުކުޅެދުންތެރިކަން ހުންނަ 1،025 މީހުންނާއި، އޯޓިޒަމް ހުންނަ 590 ކުދިން އަދި އުނގެނުމުގެ ނުކުޅެދުންތެރިކަން ހުންނަ 58 ފަރާތެއް ދަފްތަރުގައި ހިމެނެއެވެ.

މާލީ އެހީތެރިކަމަށް ބަލާއިރު، ނުކުޅެދުންތެރިކަން ހުންނަ ފަރާތްތަކަށް ދެވޭ މާލީ އެހީގެ ގޮތުގައި 15،146 ފަރާތަކަށް ޖުމްލަ 55,920,000 (ފަންސަވީސް މިލިއަން ނުވަލައްކަ ވިހިހާސް) ރުފިޔާ ވަނީ ދޫކޮށްފައެވެ.

ތެރަޕިއުޓިކް ފަރުވާގެ އެހީގެ ދަށުންވެސް ބޮޑެތި ހޭދަތަކެއް ކުރެވިފައިވާކަން ތަފާސްހިސާބުތަކުން ހާމަވެއެވެ. އެގޮތުން ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕިއުޓިކް ފަރުވާގެ ޕްރޮގްރާމްގެ ދަށުން 253 ފަރާތަކަށް 7,072,834 ރުފިޔާ ހަމަޖައްސައިދީފައިވެއެވެ.

އަދި ބޭސްފަރުވާގެ އެހީގެ ޕްރޮގްރާމްގެ ދަށުން ތެރަޕިއުޓިކް ފަރުވާއަށް 80 ފަރާތަކަށް 524,615 ރުފިޔާގެ އެހީ ފޯރުކޮށްދީފައިވެއެވެ.