ބާރުބޮޑުވާ ގަޑިތަކުގައި ބޭނުންކުރުމަށާއި ސްކޫލް ކުދިންނަށް ހާއްސަ ބަސްތަކެއް ތައާރަފްކުރުމަށް ދަނީ ތައްޔާރުވަމުން: ސައީދު
މާލެ ސަރަހައްދުގެ ޓްރެފިކް މައްސަލައަށް ހައްލު ހޯދުމުގެ ގޮތުން ސްކޫލް ދަރިވަރުންނަށް ޚާއްޞަ ބަސް ރޫޓުތަކާއި ބާރުބޮޑު ގަޑިތަކުގައި ދަތުރުކުރާނެ ބަސްތައް ފެށުމަށް މަސައްކަތްކުރައްވަމުން ގެންދަވާ ކަމަށް އިގްތިސާދީ ތަރައްޤީ އާއި ދަތުރުފަތުރާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސް އޮފީހާއި ޕީއެސްއެމް ގުޅިގެން ބާއްވާ އަހާ ފޯރަމުގެ މިފަހަރުގެ ޕްރޮގްރާމްގައި ވާހަކަފުޅު ދައްކަވަމުން ވަޒީރު ވިދާޅުވީ، މާލޭ މަގުތަކުގެ 82 އިންސައްތަ މިހާރު އޮތީ ވެހިކަލްތަކުން ފުރިބާރުވެފައިކަމަށެވެ. އެގޮތުން މާލެ ސަރަހައްދުގައި ޖުމްލަ 130,806 ވެހިކަލް ރަޖިސްޓްރީކޮށްފައިވާއިރު އޭގެ ތެރޭގައި 14,911 ކާރާއި 115,895 ސައިކަލު ހިމެނޭ ކަމަށް ވަޒީރު ވިދާޅުވިއެވެ.
މާލޭގެ ޖާގަ އިތުރަށް ފުޅާކުރެވެން ނެތުމާ އެކު ސަރުކާރުން ރާވާފައިވަނީ މާލެ ވެހިކަލް ރަޖިސްޓްރޭޝަން ކޮންޓްރޯލްކުރެވޭ ސަރަހައްދަކަށް ބަދަލުކޮށް ޢާންމު ދަތުރުފަތުރުގެ ނިޒާމަށް ބަރޯސާވުން އިތުރުކުރުން ކަމަށް ވަޒީރު ވިދާޅުވިއެވެ.
އެ މަސައްކަތް ކުރިއަށް ގެންދިޔުމަށްޓަކައި ޓްރެފިކް މައްސަލަތަކަށް ޚާއްޞަ މިނިވަން އޮފީހެއް ޤާއިމުކޮށް ޢަމަލީ މަސައްކަތް ފެށިފައިވާ ކަމަށް ވެސް އެ މަނިކުފާނު ވިދާޅުވިއެވެ.
ކުރިއަށް ރޭވިފައިވާ ބަސް ޚިދުމަތާ ގުޅޭ ގޮތުން ވަޒީރު ވިދާޅުވީ "ފޭސް 2 އަދި ފޭސް 1އިން އެކި ބޭނުންތަކަށް މާލެއަށް ވަޑައިގަންނަވާ ބޭފުޅުންނާއި އަދި މާލެއިން އެކި ބޭނުންތަކަށް ރަޝް އަވާސްތަކުގައި ހުޅުމާލެއަށް ވަޑައިގަންނަވާ ބޭފުޅުންނަށް މި ޕްލޭންގެ ތެރޭގައި ހިމެނޭނެ ފޭސް 2އިން ވެލަނާގެ ސަރަހައްދަށް އަދި ގްރީން ޒޯންތަކަށް ވަކި ގަޑިތަކެއްގައި ދަތުރުކުރާ ބަސްތަކެއް ތައާރަފްކުރުން. އަދި އަޅުގަނޑުމެން މި ގަސްތުކުރަނީ ސްކޫލްތަކަށް ދަތުރުކުރާ ސްކޫލް ފްރެންޑްލީ ބަސްތަކެއް ތަޢާރަފްކުރުމަށްވެސް"
ވަޒީރު މުހައްމަދު ސައީދު
މީގެ އިތުރުން މާލޭ ރިންގް ރޯޑުގެ މަސައްކަތް ނިމުމަކާ ގާތްވެފައިވާ ކަމާއި ޓްރެފިކް ލައިޓް ހަރުކުރުމާއި މަގުމަތީ ފުލުހުންގެ ދައުރު އިތުރުކުރުމާއި ވަކި ސީސީތަކަކުން ފީ ނެގުން ފަދަ ފިޔަވަޅުތައް މާސް ޓްރާންސްޕޯޓް މޮބިލިޓީ ޕްލޭންގެ ދަށުން ރޭވިފައިވާ ކަމަށް ވެސް ވަޒީރު ވިދާޅުވިއެވެ.
ވަޒީރު ސަޢީދު ވިދާޅުވި ގޮތުގައި މި މަސައްކަތްތައް ރޭވުންތެރިކަމާ އެކު ކުރިއަށް ގެންގޮސް ކުރިއަށް އޮތް ތިން އަހަރު ތެރޭގައި މާލޭގެ ޓްރެފިކް މައްސަލައަށް އެދެވޭ ހައްލެއް ލިބޭނެ ކަމަށް އުއްމީދުކުރައްވާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
