ލަމްޕާޑްގެ އިރުޝާދުގެ ދަށުން ޗެލްސީ ކުޅުނު 6 ވަނަ މެޗުން ވެސް ބަލިވެއްޖެ!

އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 3-1 ގެ ނަތީޖާއަކުން ޗެލްސީ ބަލިކޮށް އާސެނަލް އިން ދެ މެޗު އިތުރަށް ކުޅެ ވަގުތީގޮތުން ތާވަލުގެ އެއްވަނަ މަގާމަށް ކުރިއަށް ޖެހިލައިފިއެވެ.

ޗެލްސީގެ ކޯޗުކަމާ ފްރޭންކް ލަމްޕާޑް ހަވާލުވި ފަހުން އެޓީމު ކުޅުނު ހަވަނަ މެޗުން ވެސް ބަލިވިއިރު، މިރޭގެ މެޗުގެ ފުރަތަަމަ ހާފުގައި އާސެނަލް އިން ތިން ލަނޑުގެ ލީޑެއް ނެގި އެވެ.

އާސެނަލްގެ ފުރަތަަމަ ދެ ލަނޑު އެޓީމުގެ ކެޕްޓަން މާޓިން އޮޑެގާޑް ކާމިޔާބުކޮށްދިން މި ދެ ލަނޑު ޖެހުމަށް ފުރުސަތު ތަނަވަސްކޮށްދިނީ އެޓީމުގެ ސްވިޒަލޭންޑް މިޑްފީލްޑަރު ގްރެނިޓް ޒަކާ އެވެ. ފުރަތަަމަ ލަނޑު 18 ވަނަ މިނެޓުގައި އަދި ދެވަނަ ލަނޑު 31 ވަނަ މިނެޓުގައި އޮޑެގާޑް ކާމިޔާބުކޮށްދިން އިރު، އާސެނަލްގެ ތިންވަނަ ފުރަތަަމަ ހާފުގެ 34 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ގެބްރިއަލް ޖީސަސް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން އާސެނަލް ކުރީގައި އޮވެގެންނެވެ.

މެޗުގެ ދެވަނަ ހާފުގައި ޗެލްސީން ބަދަލުތަކެއް ގެނެސް އެޓީމުގެ ކުޅުން ރަގަޅުކުރިއެވެ. ނަތީޖާއެއްގެ ގޮތުން ދެވަނަ ހާފުގެ 65 ވަނަ މިނެޓުގައި އެޓީމުން ލަނޑެއް ކާމިޔާބުކޮށް ނަތީޖާގެ ފަރަގު ކުޑަކުރި އެވެ. މިލަނޑު އެޓީމަށް ކާމިޔާބުކޮށްދިނީ ޒުވާން ފޯވާޑް ނޯނީ މަޑޫކް އެވެ. މިއީ އެޓީމުގެ ކްރޮއޭޝިޔާ މިޑްފީލްޑަރު މެޓްރޯ ކޮވަސިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 34 މެޗު ކުޅެގެން އާސެނަލް އަަށް 78 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 32 މެޗު ކުޅެގެން ލިބިފައިވަނީ 76 ޕޮއިންޓެވެ. އަދި މިރޭގެ މެޗުން ބަލިވި ޗެލްސީ 33 މެޗު ކުޅެފައިވާއިރު އެޓީމަށް ލިބިފައިވަނީ 39 ޕޮއިންޓާއެކު ލީގު ތާވަލުގެ 12 ވަނައެވެ.

2021 ވަނަ އަހަރުގެ ޔޫރަޕުގެ ޗެމްޕިއަން ޗެލްސީއަށް ލީގުގައި ބާކީ ފަސް މެޗު އޮތްއިރު، ލީގު ތާވަލުގެ 19 ވަނައިގައި އޮތް އެވަޓަން އާއި އެޓީމާއި ދެމެދުގައި އޮތީ 10 ޕޮއިންޓްގެ ފަރަގެކެވެ. ވުމާއެކު ބާކީ އޮތް ފަސް މެޗުގައި ގަދަ ދިހައެއްގައި ހިމެނުމަށް ވުރެ ރެލިގޭޝަނުން ސަލާމަތްވުމަށް އެޓީމު ކުރަންޖެހޭ މަސައްކަތްތައް މިހާރު ވަނީ އިތުރުވެފައެވެ.