30 ޖޫން އިން ފެށިގެން ބަލާނީ ހިޔާ އިމާރާތުގެ އާންމު ތަންތަނުގެ މައްސަލަތައް: އާބަންކޯ

30 ޖޫން އިން ފެށިގެން އާބަންކޯއިން ބަލަހައްޓައި ހައްލުކޮށް ހަދާނީ ހިޔާގެ ފްލެޓްތަކުގެ އާންމު ތަންތަނާއި ވަސީލަތް ތަކަށް ދިމާވާ މައްސަލަތައް ކަމަށް އެކުންފުނިން ބުނެފިއެވެ.

އެކުންފުނިން މިކަމާއި ގުޅިގެން ނެރެފައިވާ އިއްލާނެއްގައި ބުނެފައިވަނީ ހިޔާ މަޝްރޫޢުގެ ދަށުން މިހާތަނަށް ދޫކޮށްފައިވާ ފްލެޓްތަކުގައި ދިމާވާ ފެންލީކުވުމުގެ މައްސަލަތަކާއި، ފާޚާނާ އަދި ބެލްކަނީގެ ސްލޯޕްގެ މައްސަލަތަކުގެ އިތުރުން، ފާޚާނާގެ ޑްރެއިން ބްލޮކްވުމާއި ކަރަންޓުގެ މައްސަލަތައް އެ ކޯޕަރޭޝަންގެ މެއިންޓެއިންސް ޓީމުން ކޮންޓްރެކްޓަރގެ ޑިފެކްޓްސް ލައިބިލިޓީ ޕީރިއަޑްގެ މުއްދަތު ކަމަށް ވާ 2022 ޑިސެމްބަރ 31 ގެ ފަހުންވެސް ހައްލު ކޮށްދެމުން ދާކަމަށެވެ.

އަދި ހިޔާ ފްލެޓް އެއްބަސްވުމުގެ 10 ވަނަ މާއްދާގައި ފްލެޓާއި ހަވާލުވާ ދުވަހުން ފެށިގެން ފްލެޓް ހުންނާނީ ގަންނަ ފަރާތުގެ ފުރިހަމަ ޒިންމާއާއި ބެލުމުގެ ދަށުގައި ކަން ބަޔާން ވެގެން ވާ ކަމަށެވެ.

އެހެން ނަމަވެސް ހިޔާ ސަރަހައްދަކީ ބޮޑު އާބާދީއެއް ދިރިއުޅޭ ތަނަކަށްވެފައި، އެެއްފަހަރާ މިފްލެޓްތަކުގައި މީހުން ދިރިއުޅެން ފެށުމުގެ ސަބަބުން ފްލެޓް ތަކުގައި ދިމާވާ މައްސަލަތައް ހައްލުކޮށްދިނުމުގެ ގޮތުން އެ ކޯޕަރޭޝަނުން ނިންމީ  އެކޯޕަރޭޝަނުގެ ޚިދްމަތް ވީހާ ދިގު މުއްދަތަކަށް ފޯރުކޮށްދިނުމަށް ކަމަށެވެ.

އަދި މިހާތަނަށް ހިޔާ ފްލެޓް ތަކަށް ދިމާވި މިފަދަ މައްސަލަތައް އެ ކޯޕަރޭޝަނަށް ހުށައެޅި އެމައްސަލަތައް ހައްލު ކޮށްދެވި، އެފަދަ މައްސަލަތައް ހުށައަޅާ ޢަދަދު މިހާރު މަދުވެފައިވާ ކަމަށް އެއިޢްލާނުގައި ބުނެފައިވެއެވެ.

އެހެން ކަމުން 30 ޖޫން 2023 ފެށިގެން އާބަންކޯއިން ބަލަހައްޓަމުން ގެންދާނީ ހިޔާ ޢިމާރާތުގައި ހިމެނޭ އާންމު ތަންތަނާއި ވަސީލަތްތައް ކަމަށް އެ ކޯޕަރޭޝަންގެ އިއްލާނުގައި ވެއެވެ. އަދި ފްލެޓް ތަކުގެ އެތެރެއަށް ދިމާވާ މައްސަލަތަކުގައި އެކޯޕަރޭޝަން އިން ފޯރުކޮށްދޭނީ ފަންނީ އެހީ އެކަނި ކަމަށް ވެސް އެ އިއްލާނުގައި ބުނެފައިވެއެވެ.