އިއްޔެގެ އެކްސިޑެންޓްގައި އަނިޔާވިި ޒުވާނާގެ ހާލު ސީރިއަސް

ހުޅުމާލެ 2 ވަނަ ފިޔަވަހީގައި އިއްޔެ ހިނގި ނުރައްކާތެރި އެކްސިޑެންޓްގައި އަނިޔާވި ޒުވާނާގެ ހާލު ސީރިއަސް ކަމަށް ފުލުހުން މައުލޫމާތު ދީފިއެވެ.

ހުޅުމާލެ 2 ވަނަ ފިޔަވަހީގެ ނިރޮޅު މަގުގައި ޕިކަޕަކާއި ސައިކަލެއް ޖެހި އެކްސިޑެންޓް ވެފައިވާ ކަމުގެ މައުލޫމާތު ފުލުހުންނަށް ލިބިފައިވަނީ އިއްޔެ 15:17 ކަންހާއިރު ކަމަށް ފުލުހުންގެ މީޑިއާ އޮފިޝަލް ވަނީ ވިދާޅުވެފަ އެވެ.

އަދި މި އެކްސިޑެންޓްގައި 20 އަހަރުގެ މީހަކަށް އަނިޔާވެފައިވާ ކަމަށާއި އޭނާއަށް ހުޅުމާލެ ހޮސްޕިޓަލްގައި ފަރުވާ ދެމުންދާ ކަމަށްވެސް އިއްޔެ މީޑިއާ އޮފިޝަލް ވިދާޅުވިއެވެ.

މީގެ އިތުރުން އެކްސިޑެންޓްގައި އަނިޔާވި އެ ޒުވާނާ ނިޔާވެފައިވާ ކަމަށް މީސްމީޑިއާގައި ދައުރުވަމުންދާ ވާހަކައާއި ގުޅިގެން ފުލުހުންގެ މީޑިއާ އޮފިޝަލް މިއަދު ވިދާޅުވީ، އެ ޒުވާނާ ނިޔާ ނުވާ ކަމަށާ، އެހެން ނަމަވެސް ހާލު ވަރަށް ސީރިއަސް ކަމަށް މައުލޫމާތު ލިބޭ ކަމަށެވެ.